Татарстан һәм Иран педагогика университетлары Меморандум нигезендә хезмәттәшлек итәчәк

15 гыйнвар көнне Татар дәүләт гуманитар-педагогика университеты белән Иран Ислам Республикасының Шәркый Азәрбайҗан провинциясе (останы) Тәбриз шәһәрендәге Әзәрбайҗан педагогика университеты арасында фән, мәгариф һәм мәдәният өлкәләрендә хезмәттәшлек буенча килешү турындагы Меморандум имзаланды. Татар дәүләт гуманитар-педагогика университетының актлар залында тантаналы шартларда әлеге уку йортларының ректорлары, профессорлар Рәдиф Җамалетдинов белән Мөхәммәд Әмини Фәрднең тарихи әһәмияткә ия документка кул кую вакыйгасының шаһитлары буларак анда Иран Ислам Республикасының Шәркый Азәрбайҗан губернаторы (остандары) Алиреза Биги, Иранның Казандагы генераль консулы Реза Багбан Кондор, ТР сәнәгать һәм сәүдә министры Александр Когогин һ.б. рәсми затлар, ТДГПУ проректорлары, деканнар, галимнәр, студентлар катнашты.

Документ, белем бирү һәм фәнни тикшеренү процессларын киңәйтү һәм ныгыту максатында, ике арада галимнәр, хезмәткәрләр, студентлар, академик мәгълүмат һәм материаллар алмашу, шушы университетлар хезмәткәрләре, тикшеренүчеләре һәм студентлары арасында алмашу программасы ярдәмендә үзара аңлашу буенча 3 еллык хезмәттәшлекне күздә тотып төзелгән. Аерым алганда, 8 маддәдән торган әлеге Меморандумда якларның ике илдә дә укыту процессын тәэмин итү чаралары һәм фәнни тикшеренүләр белән үзара танышу; фарсы теле һәм мәдәнияте өлкәләрендә тикшеренүләргә нисбәтле озак вакытны күздә тоткан фәнни багланышлар урнаштыру; фарсы телен һәм әдәбиятын башлангыч һәм югары дәрәҗәдә үзләштерү өчен курслар, ә укыту методикалары һәм методологияләре буенча мастер-класслар үткәрү; фән, мәдәният, әдәбиятка кагылышлы уртак кызыксынуга бәйле конференцияләрдә, академик очрашуларда катнашу һәм ике илнең фәнни юнәлешләре, мәдәни үзенчәлекләре белән танышу; фарсы телендәге борынгы кулъязмаларны өйрәнү максатында, тикшеренүчеләрне һәм экспертларны татар китапханәләренә эш сәфәренә җибәрү һ.б. буенча килешүе хакында әйтелә. Болардан тыш, анда шулай ук ике илнең мәдәниятен, тарихын өйрәнү һәм компаратив анализлау буенча үзәк төзү, фарсы телен өйрәнү белән кызыксынган Татарстан студентларына һәм аспирантларына, татар тарихы һәм мәдәнияте белән кызыксынган Иран студентларына һәм аспирантларына стипендияләр бирү дә карала.