Р.Миңнеханов: “Фәнни-тикшеренү институтлары белән партнерлык мөнәсәбәте урнаштыру мөһим”

Нефть химиясе комплексы Татарстанның икътисади үсеш ноктасы булып саналды һәм ул шулай булачак та. Бүген “Татнефтехиминвест-холдинг” ААЌ Директорлар советы утырышында ТР Премьер-министры Рөстәм Миңнеханов әнә шулай дип белдерде. Хөкүмәт башлыгы искәртүенчә, нефтьне тирәнтен эшкәртү, яңа куллану үзлекләре булган материаллар алу бу өлкәдә төп бурычлар булып кала.

Бүгенге утырышта Мәскәүнең Топчев исемендәге Нефть химиясе синтезы институты директоры урынбасары Евгений Антиповның полимерлар перспективасы һәм нанотехнологияләр өлкәсендә мөмкинлекләр хакында чыгышы тыңланды, дип хәбәр итә ТР Министрлар Кабинетының Матбугат хезмәте. Премьер-министр белдергәнчә, бүген фәнни-тикшеренү институтлары белән партнерлык мөнәсәбәтләре урнаштыру тагын да мөһим. Ул химия һәм нефть химиясе өлкәләрендә яңа эшләнмәләр белән танышырга, конкурентлык өстенлеген булдырырга ярдәм итә.

Утырышта, аерым алганда, “Казан синтетик каучук заводы” ААЌ үсеш перcпективалары хакында сүз кузгатылган. Заводның генераль директоры Алексей Контуров сүзләренә караганда, 2008 елның баштагы 3 кварталында җитештерүдә тотрыклы үсеш биргән предприятиедә, дүртенче кварталда төшү күзәтелгән. Шунысы игътибарга лаек, узган 2 ел дәвамында биредән Кытайга каучук озату туктаган булса, быелның февралендә бу эш торгызылган. Алексей Контуров республика Хөкүмәтенә җитештерү кооперациясе кысаларында заводның Татарстан базарында продукциясен сатуда ярдәм сорап мөрәҗәгать иткән. Предприятиенең алдагы планнарына килгәндә, ул акрил һәм полиуретан герметиклар, стеклопакетлар җитештерү белән бәйле (бүгенге көндә Синтетик каучук заводы Россия автогерметиклар базарының 60 процентын тәэмин итә). 2009 елда биредә тиокол җитештерүне 11 процентка арттырырга ниятлиләр.

Бүгенге утырышта “Татнефтехиминвест-холдинг” ААЌ Директорлар советы һәм ревизия комиссиясенә әгъзалыкка кандидатлар исемлеге дә расланган. “Татнефтехиминвест-холдинг” Директорлар советының чираттагы утырышы агымдагы елның 13 апрелендә узачак. Анда республика нефть химиясе тармагы предприятиеләренең 2009 елның беренче кварталындагы эш йомгаклары игълан ителәчәк.