М.Сафиуллин Идарәче кадрлар әзерләүче Президент программасында катнашучылар белән очрашты

ТР икътисад министры, Халык хуҗалыгы оешмалары өчен идарәче кадрлар әзерләү буенча төбәк комиссиясе рәисе Марат Сафиуллин Идарәче кадрларны әзерләү буенча Президент программасында катнашучылар белән очрашты.

Даими рәвештә уздырыла торган мондый очрашуларда, гадәттә, уку процессын оештыру, башка актуаль мәсьәләр хакында фикер алышына. Бу юлы очрашуның төп темасы ТР Хөкүмәте тарафыннан гамәлгә ашырылучы кризиска каршы программа, уңайсыз конъюнктура шартларында предприятиеләрдә килеп туган проблемалар булды, дип хәбәр итә Икътисад министрлыгының матбугат хезмәте.

ТР Икътисад министрлыгы Президент программасы буенча укып чыккан, әмма кризис вакытында эшен югалткан идарәчеләргә ярдәм итәргә әзерме? Очрашуда яңгыраган сорауларның берсе әнә шуннан гыйбарәт булган. Министр белдергәнчә, әгәр программаны тәмамлаучы яхшы белгеч һәм ул кызыклы, квалификацияле хезмәт яза икән, аны эшкә урнаштыруда бернинди проблема булмаячак. Президент программасы буенча укучыларны шулай ук, укуны тәмамлагач һөнәри эшчәнлек перспективалары да кызыксындырган. Марат Сафиуллин сүзләренә караганда, әлеге программа махсус тармак белемнәре һәм күнекмәләр алган белгечләргә менеджмент буенча дәресләр бирә. Ул эш төркемнәре төзергә, кешеләрдә мотивация формалаштырырга, куеган максатка ирешергә өйрәтә. “Без идарәче кадрлар резервын формалаштырырга уйлыйбыз. Сез яхшы нәтиҗәләр күрсәткәндә, карьера үсешенә ярдәм итәчәкбез”, - дип ышандырды министр. Чит илләрдә стажировка узуга килгәндә, министр, аның, беренче чиратта, курс үтүчеләрнең үзләре өчен файдалы дип саный. Алар читтәге алдынгы предприятиеләрдә эшнең оештырылуы белән таныша, компания вәкилләре белән яхшы мөнәсәбәтләр урнаштыра, алар белән перспектив контрактлар төзи. “Шулар аша республика территориясендә яңа конкурентлыкка сәләтле предприятиеләр төзелүгә өметләнәбез. Иң яхшы вариант- курсларны бетергән һәркемнең үз эшен ачуы”,- ди министр.