Путин Казанда узачак Универсиаданың оештыру комитетын төзү турындагы боерыкны имзалады

РФ Премьер–министры Владимир Путин 2013 елда Казанда XXVII Бөтендөнья җәйге универсиадасын әзерләү һәм үткәрү буенча оештыру комитетын төзү турындагы боерыкка кул куйды.

Моннан тыш, Россия Премьер–министры оештыру комитетының составын раслады, диелә Путинның РФ Хөкүмәте сайтында дөнья күргән карарында. Оештыру комитетын Россиянең беренче вице–премьеры Игорь Шувалов җитәкләде. Аның составына ТР Премьер–министры Рөстәм Миңнеханов, Казан мэры Илсур Метшин, ТР яшьләр эшләре, спорт һәм туристлык министры Марат Бариев, Россия студентлар спорт берлеге президенты Олег Матыцин, шулай ук министрлар Мутко, Левитин, Нәбиуллина, Нургалиев, Фурсенко, Щеголев һәм башка рәсми затлар керде.

Оештыру комитеты эшчәнлеген оештыру–техник яктан тәэмин итү эше Россиянең Спорт һәм туристлык министрлыгына тапшырылды. Министрлыкка ике ай эчендә Бөтендөнья җәйге универсиадасын әзерләү һәм үткәрүгә бәйле төп чаралар планын эшләү һәм аны оештыру комитетына раслауга тәкъдим итү йөкләнде. “Россия Федерациясе Хөкүмәте хәл итүне таләп иткән мәсьәләләр буенча вакыт, күләм һәм финанслау чыганакларын күрсәтеп, килештерелгән тәкъдимнәр кертергә кирәк”, – диелә боерыкта.

Казан 2008 елның 31 маенда Брюссельдә Халыкара студентлар спорты федерациясе (FISU) башкарма комитеты әгъзаларының тавыш бирү нәтиҗәләре буенча 2013 елгы Универсиаданың башкаласы итеп сайланды. Испаниянең Виго һәм Көньяк Кореяның Гван Джу шәһәрләре Казанның төп көндәшләре булды.

Казанда Универсиада 2013 елның июль ахырында – август аенда узар дип фараз ителә. Ул 20 көнгә якын дәвам итәчәк. Анда 150дән артык илдән 10 меңнән артык спортчы катнашыр дип көтелә.

Универсиаданың мәҗбүри программасы спортның 13 Олимпия төре буенча ярышларны үз эченә ала.

Универсиада Россиядә бары тик бер тапкыр – 1973 елның җәендә Мәскәүдә узды.