Кафил Әмиров: “Татарстан Прокуратурасы хезмәткәрләренең уңышлары сизелерлек”

ТР Прокуратурасы хезмәткәрләре үзләренең һөнәри бәйрәмнәрен билгеләп үтте. Бүген Прокуратурада алдынгы хезмәткәрләрне хөрмәтләделәр.

ТР прокуроры Кафил Әмиров үз чыгышын Россия Прокуратурасының оешу тарихы хакында сөйләүдән башлады. “Әгәр без ведомствоның 300 еллык тарихына күз салсак, кыенлыклар туу белән законны үтәү ихтыяҗы барлыкка килүен, закон үтәлешенә күзәтчелек итү кирәклеге алга килеп басуын һәм прокуратураның әһәмияте артуына игътибар итәчәкбез”, – диде ул.

“Әле күптән түгел генә прокуратура кирәкме–юкмы дигән бәхәсләр барды, әмма алар бик тиз онытылды, чөнки прокуратураның кирәклеге бәхәссез. Өстәвенә, бүгенге кыен чорда аңа законнарның үтәлешен көчәйтергә ярдәм итүче өстәмә вәкаләтләр бирү хакында сүз бара. Бу хакта шушы көннәрдә РФ Президенты да әйтте, ә бүген, прокуратура хезмәткәрләрен котлап, РФ Генераль прокуроры Юрий Чайка тагын бер тапкыр прокуратура органнарына ихтыяҗ зур булуын ассызыклады”, – дип өстәде Кафил Әмиров.

Сүз уңаеннан, бүген ТР прокуроры узган елда башкарылган эшләр турында хисап тотмады. “Бәйрәм көнендә эш турында сөйлисе килми, – диде ул. – Елның киеренке булуына да карамастан, коллектив үзенә йөкләнгән бурычларны үтәде. Татарстан прокуратурасы хезмәткәрләренең уңышлары сизелерлек, шунлыктан быел безнең алда позицияләрне ныгыту бурычы тора”, – дип сүзен йомгаклады ул.