3 гыйнвар көнне “Дакар-2009” старт ала

3 гыйнвар көнне Буэнос-Айреста планетаның төп марафон ралли-рейды – “Дакар-2009” башлана. Њз тарихында беренче мәртәбә Көньяк Америка таулары буйлап узачак ярышларда “КАМАЗ-Мастер” командасының өч “сугышчан” экипажы стартка чыгачак.

Руль артына “Дакар” ралли-рейдында күп тапкырлар катнашкан Владимир Чагин, Фирдәвес Кәбиров һәм Илгизәр Мәрдиев утырачак. Чагин белән бергә штурман Сергей Савостин һәм механик Эдуард Николаев бара. Кәбиров экипажында шулай ук Андрей Беляев һәм Андрей Мокеев, Илгизәр Мәрдиев экипажында исә аның улы Айрат Мәрдиев, штурман сыйфатында Вячеслав Мизюкаев чыгыш ясаячак. Россия спортчысы Олег Уперенко тагын бер шәхси "Mercedes" экипажының штурманы булачак.

“Дакар” ветераннары Леонид Новицкий һәм Олег Тюпенкин 316нчы номерлы BMW, Алексей Беркут һәм Антон Николаев 348нче номерлы "Mitsubishi", Борис Букатов һәм Сергей Додонов 349нчы номерлы "Mitsubishi" руле артына утырачак. Марафонда шулай ук Buggy (356) прототибында Ярослав Соловьев һәм Константин Жильцов, Илья Кузнецов һәм Андрей Нешин (369), Александр Мироненко һәм Сергей Лебедев (370, икесе дә "Mitsubishi"да), "Nissan"да (370) Павел Логинов һәм Кирилл Шубин, "Toyota"да (474) Виктор Волков һәм Алексей Кузьмич катнаша. Француз Денис Шургер Россиянең тагын бер узышчысы Александр Бараненконың штурманы булачак.

Быелгы, исәп буенча 31нче “Дакар”да барлыгы 500дән артык экипаж катнаша. Аларның барысы да техник тикшерү узды инде һәм беренче этапның стартына әзерләнәләр. Соңгысының озынлыгы 733 чакрым тәшкил итәчәк, шуның 371 чакрымы махсус участокларга туры килә.