Казанда дүртенче чакырылыш ТР Дәүләт Советының беренче утырышы уза

19 март көнне Казанда дүртенче чакырылыш ТР Дәүләт Советының беренче утырышы уза. Сессиядә Татарстан Республикасы Президенты Минтимер Шәймиев катнашты. 

Дүртенче чакырылыш ТР Дәүләт Советының беренче утырышында депутатлар парламент рәисе итеп Бердәм Россия" партиясеннән тәкъдим ителгән депутат Фәрит Мөхәммәтшинны сайлады. Аның кандидатурасын яшерен тавыш бирү барышында 90 депутат хуплады. КПРФ партиясеннән Хафиз Миргалимов 7 тавыш җыйды.

Фәрит Мөхәммәтшин, депутатлар алдында чыгыш ясап, парламентка сайлаулар вакытында халыкның, "Бердәм Россия" партиясе өчен тавыш биреп, гадәти булмаган вакытта хакимияткә ышаныч белдерүен билгеләп үтте. Спикер, алга таба эш юнәлешләрен билгеләп, оппозициянең конструктив тәкъдимнәрен исәпкә алып эш алып барырга җыенуларын әйтте.
"Депутатлар республиканың иминлеге өчен эшләячәк", - диде спикер һәм булган тәҗрибәне кулланып эш алып барырга вәгъдә бирде.

Фәрит Мөхәммәтшин журналистлар белән очрашу вакытында алдагы 5 елда парламентның конструктив эшен оештыру зарурлыгын, икътисади кризис шартларында моның җиңелдән булмаячагын билгеләп үтте. "Алда проблемалар аз түгел. Без халык фикерен тыңлап эшләргә тиеш булабыз", - диде ул һәм бюджет өлкәсендә эшләүчеләргә хезмәт хакы түләү, халыкны эш белән тәэмин итүнең көн үзәгендә торачагын ассызыклап үтте.

ТР Президенты Минтимер Шәймиев, Фәрит Мөхәммәтшинны котлап, аның яңа чакырылышта да ТР парламенты белән уңышлы идарә итүенә ышаныч белдерде. "Ул ышанычлы, тәҗрибәле һәм моны халыкка эше белән күрсәтә", - диде Президент Фәрит Мөхәммәтшин турында.

ТР Президенты Минтимер Шәймиев чыгышында  депутатларны халыкның ышаныч күрсәтүе белән котлады. "Сайлаулар сезгә ТР Конституциясе тарафыннан билгеләнгән хокукларны тормышка ашырырга мөмкинлек бирде", - диде Президент.

Минтимер Шәймиев үз чыгышында бүген төрле партияләрдән спикерлыкка дәгъва иткән кандидатларның конструктив эшчәнлек яклы булуларын бик әһәмиятле дип билгеләп үтте. "Партияләр, халыкның фикерен исәпкә алып, стратегик бурычларны чишәргә тырыша", - диде ул. Президент шулай ук икътисади кризисның Россиягә, шул исәптән Татарстанга нык йогынты ясавын һәм шул нисбәттән "кризис китергән авырлыкларны үтәр өчен бик күп эшләргә туры киләчәген" белдерде.

М. Шәймиев сүзләренчә, бу кризис социаль кризиска әйләнергә тиеш түгел. Президент үз чыгышында инде бер генә кризис булмавын, ул вакытларда пенсияләр һәм хезмәт хакы түләү белән проблемалар килеп чыгуын, нефть скважиналарының зыянга эшләвен билгеләп үтте. "Хәзер вәзгыять андый булмаячак. Безгә тормыш сыйфатын саклап калырга кирәк", - дип, Президент, көн үзәгендә эшсезләрне арттырмау мәсьәләсе торуын белдерде. М. Шәймиев бу нисбәттән җирлекләрдә эш урыннарын югалтмауга басым ясады. "Бу очракта безгә соңыннан аякка басарга җиңел булачак. Без үзебездән торганны төптән уйлап эшләргә тиешбез. Кабул ителгән карарларның да вакытында үтәлүе зарури", - диде Президент.

Минтимер Шәймиев үз чыгышында, депутатларның нинди юл белән сайлануына карамастан (партия исемлеге яки бер мандатлы округлар буенчамы), халык белән элемтәне нык тотарга чакырды. "Без шундый вакытта яшибез - халык очрашуларга мохтаҗ. Аларга дәүләт дәрәҗәсендә алып барылган эшләр турында җиткерергә кирәк. Депутат булып сайлану - җаваплылык ул", диде Президент. Ул халыкның авыр вакытта хакимияткә өмет баглавын белдереп, халыкка якынрак булырга чакырды.