Минтимер Шәймиев Казан Кремлендә Милли телерадиотапшырулар ассоциациясе президенты Эдуард Сагалаевны кабул итте

13 мартта Татарстан Президенты Минтимер Шәймиев Казан Кремлендә Милли телерадиотапшырулар ассоциациясе президенты, Россия Иҗтимагый палатасы әгъзасы Эдуард Сагалаевны кабул итте.

1980 елдан башлап, Эдуард Сагалаев “Юность” радиостанциясе баш мөхәррире, аннан соң Үзәк телевидениенең яшьләр редакциясе баш мөхәррире булып эшләгән, “12нче кат” исемле популяр программаны оештыручы һәм алып баручы, “Караш” программасының җитәкчеләренең берсе булган. 1990 елдан башлап 1991 елга кадәр - СССР Журналистлар берлеге рәисе, 1991-1992 елларда “Останкино” дәүләт телерадиокомпаниясенең генераль директоры булып торган. Мәскәү мөстәкыйль тапшырулар корпорациясенә (ТВ-6 Мәскәү) нигез салучы һәм җитәкчесе. 1996 елдан 1997 елга кадәр – Бөтенроссия дәүләт телерадиокомпаниясе рәисе. Милли телерадиотапшырулар ассоциациясе – коммерцияле булмаган оешмасы – 1995 елның августында Эдуард Сагалаев һәм тагын 43 телекомпания җитәкчеләре инициативасы белән оешкан булган.

Милли телерадиотапшырулар ассоциациясе башлыгы сүзләренә караганда, Татарстан Президенты белән бүгенге очрашуда “Тасис” Ауропа берлеге проекты кысаларында финанслана торган төбәк гаммәви мәгълүмат чараларына ярдәм итү программасын тормышка ашыру мәсьәләләре хәл ителде. Әлеге максатларга 2,5 миллион сум акча бүлеп бирелгән. Татарстан әлеге программа ике ел эчендә тормышка ашырылачак алты төбәкнең берсе булган. Телевидение журналистлары, телекомпанияләрнең топ-менеджерлары, гаммәви мәгълүмат чаралары җитәкчеләре өчен төрле темаларга багышланган семинарлар, конференцияләр, “түгәрәк өстәлләр” һәм тренинглар узачак. Өстәвенә, Э.Сагалаев хәбәр иткәнчә, республика башлыгы белән булган әңгәмәдә реклама турындагы яңа законга бәйле рәвештә төбәк телерадиокомпаниеләренең проблемалары, көнбатыш матбугатындагы карикатурага бәйле низаг турында да сүз булган.