Минтимер Шәймиев Каннада "MIPIM-2006" күргәзмәсе ачылышында катнаша

14 мартта ТР Президенты Минтимер Шәймиев җитәкчелегендәге Татарстан делегациясенең Каннага рәсми визитының икенче көне башланды.

Бүген ТР Президенты Канна шәһәрендәге (Франция) Фестивальләр һәм конгресслар сараенда ачылачак "MIPIM-2006" XVII Халыкара коммерцияле күчемсез милек күргәзмә-ярминкәсе эшендә катнаша. Татарстан делегациясе иртән Россия делегациясе эшенә кушылыр дип планлаштырыла. Күргәзмәдә Россияне РФ субъектларыннан 45 делегация тәкъдим итә. Россия делегациясен РФ икътисади үсеш һәм сәүдә министры Герман Греф җитәкли.

Иртән Минтимер Шәймиев “Россия төбәкләре” стенды, Мәскәү өлкәсе һәм Краснодар крае стендлары белән танышачак. Моннан тыш, Татарстан делегациясе Екатеринбург, Липецк, Ульян, Пенза өлкәләре, Мәскәү, Санкт-Петербург, Владивосток һәм башка шәһәр, төбәк экспозицияләрен караячак. Көннең беренче яртысында ТР Президентының НТВ каналының “Россиягә инвестицияләр: яңа базарлар – яңа мөмкинлекләр” ток-шоуында катнашуы планлаштырылган. Тапшыруны журналист Владимир Соловьев алып барачак.

Көннең икенче яртысында Татарстан Республикасы стенды һәм республика инвестиция проектлары тәкъдир ителәчәк. Татарстан экспозициясе 142 кв.метр мәйдан били. Республика 38 инвестиция проекты тәкъдим итә: “Торак кварталлар һәм комплекслар”, “Сәүдә үзәкләре”, “Кунакханә бизнесы”, “Спорт-сәламәтләндерү һәм мәдәни-күңел ачу комплекслары”, “Транспорт инфраструктурасы проектлары”, технопарклар һәм башкалар. Аерым алганда, ТР Президенты каршындагы Дәүләт торак фонды “Татарстан Республикасында социаль ипотека” проектын тәкъдир итә. Күргәзмәдә тәкъдим ителгән проектларның башлап йөрүчеләре арасында Казан муниципаль берәмлеге башкарма комитеты, ТР Эчке эшләр министрлыгы, “Фон” торак төзелеше фирмасы, “Камгэсэнергострой” ААҖ (Чаллы), бар. Әлмәт, Алабуга, Кама Аланыннан проектлар тәкъдим ителәчәк. Оештыручылар Алабуга районы территориясендә сәнәгый-җитештерү төрендәге махсус икътисади зонаны тәкъдир итүгә һәм Алабуга инфраструктурасы объектларын төзүгә аерым игътибар бирәчәк.

Аннары Татарстан делегациясенең Каннада “Россия күчемсез милкенә инвестицияләр: төбәкләр күтәрелә” халыкара конференциясендә катнашыр дип көтелә. Аерым алганда анда катнашырга Татарстан Президенты Минтимер Шәймиев, РФ РФ икътисади үсеш һәм сәүдә министры Герман Греф, Түбән Новгород өлкәсе губернаторы Валерий Шанцев, Пермь крае губернаторы Олег Чиркунов, Калининград өлкәсе губернаторы Георгий Боос, шулай ук чит ил инвесторлары, банк, халыкара девелопер компанияләре вәкилләре чакырылган.

"MIPIM-2006" күргәзмәсе Ауропада иң эре һәм абруйлы инвестиция форумы булып тора. Күргәзмәдә катнашу шәһәр инфраструктуралары үсеше өчен яңа инвестицияләр җәлеп итәргә, яңа табышлы килешүләр төзергә мөмкинлек бирә.

"MIPIM-2006"да Татарстан беренче тапкыр катнаша. Республикабыз чит ил инвесторлары өчен зур кызыксыну тудыра, чөнки ул инвестицияләр ягыннан Россиянең иң җәлеп итүчән төбәкләреннән берсе. Татарстан РФ төбәкләре арасында җәлеп ителгән чит ил инвестицияләре күләме буенча унынчы урын алып тора. Татарстан Идел буе федераль округында җәлеп ителгән туры чит ил инвестицияләре буенча беренче урында тора: Татарстанга барлык капитал салуларның 19,8 проценты туры килә. 2005 елда Идел буе федераль округына кергән чит ил инвестицияләре күләмендә Татарстан өлешенә 28,1 процент туры килгән. ТР Сәүдә һәм тышкы икътисади хезмәттәшлек министрлыгы мәгълүматларына караганда, республикада чит ил инвестицияләренең гомуми күләме – 843,6 миллион доллар, шул исәптән туры инвестицияләр – 214 миллион доллардан артык. 2005 елда республика икътисадына 9 илдән чит инвестицияләре килгән, шул исәптән Бөекбритания, Люксембург, Кипр, Германия, Италия, Төркия, АКШтан.