Минтимер Шәймиев: "Мансур Хәсәнов һәрвакыт белем дәрьясына омтылучы шәхес буларак эш итте"

3 февральда ТР Фәннәр Академиясенең чираттан тыш гомум җыелышында академиянең беренче президенты, Фәннәр Академиясенең Татар энциклопедиясе институты директоры, профессор, филология фәннәре докторы Мансур Хәсәнов үзен ТР Фәннәр Академиясе президенты вазыйфасыннан азат итүне сорап чыгыш ясады.

ТР Президенты Минитмер Шәймиев бу вакыйганың шактый аңлашылырлык булуын билгеләп үтте. “Кемнедер озатканда, һәрвакыт аның үткән юлын, кылган гамәлләрен күздән кичерәсең һәм килеп чыккан бу хәлгә билгеле бер мөнәсәбәт туа. Без Мансур Хәсәновны актив дәүләт эшлеклесе һәм галим буларак та бик яхшы беләбез, аның бу ике төп эше гел янәшә үрелеп барды. Аның дәрәҗәсе һәм интеллектуаль көчлелеге һәм намуслы хезмәтенең күрсәткечләре уңай фикер калдыра. Ул һәрвакыт белем дәрьясына омтылучы шәхес буларак эш итте”, - ди ул. Әйе, теләгенең нык һәм нигезле булуы аны мәдәният һәм гуманитар өлкәләрдә дә эшкә этәрде. Минтимер Шәймиев Мансур агага ихтирамның тирән булуын һәм яшь белегечләрнең дә аны өлге итеп күреп, аның белән горурланганнарын ассызыклады һәм бу сүзләренә дәлил буларак, Мансур Хәсәновны “сирәк шәхес” дип атады.

“Мин һәрвакыт Мансур Хәсәновның эшчәнлеге артыннан күзәтеп бардым һәм аның ТР Фәннәр Академиясе өчен лаеклы җитәкче булуына һәм үз эшен җиренә җиткереп башкаруына инандым. Фән бит ул шундый өлкә, аны гадиләштерү һәм аңа җиңел караш ташлау мөмкин түгел”, - дип бәян итте ил агасы чыгышының дәвамында. Минтимер Шәймиев 1991 елда ТР Фәннәр Академиясенең уңышлы гына оешып китүе һәм алга таба аның отышлы нәтиҗәле эшчәнлегенә бәйле рәвештә, татлы җимешләр генә бирүен дә искәртте. “Ул вакыттагы илнең сәяси-икътисади халәтенә карамыйча, бу оешмага нигез салу өчен ныклы карар кабул итү бик дөрес эш булды. ТР Фәннәр Академиясе – республиканың зур әһәмияткә ия институты һәм ул вакытта аның эшчәнлеге нинди юнәлештә барыр икән дигән борчулы сорауга да ул җавап тапты”, - диде ул.

Гомумән, Минтимер Шәймиев тарафыннан Мансур Хәсәновка карата гел мактау сүзләре генә яңгырады. “Әгәр дә, ул үзе акыллы, максатчан булмаса, бәлки уңышларга ирешелмәс тә иде, белеп эшли торган җитәкчегә ярдәм итү җиңелрәк”, - дип раслады ул аның нәтиҗәле эшчәнлеген. ТР Президенты галимнәрнең дәүләт өчен зур хәзинә һәм аларның ачышлары зур кыйммәткә ия булуына басым ясады. “Хәзер ныклы нигез ташлары салынган һәм сезнең лаеклы җитәкче сайлап куюыгызга минем шигем юк”, - дип белдерде.