Кукмара станциясендә яңа вокзал ачылды

16 декабрьдә Татарстан Президенты Минтимер Шәймиев республиканың 75 еллыгын билгеләп үтүче Кукмара районында эшлекле сәфәрдә Кукмара станциясендә яңа төзелгән тимер юл вокзалы бинасын ачу тантанасында катнашты.

ТР Президенты билгеләп үткәнчә, Кукмара районының 75 еллыгын билгеләп үтү республика тормышында чираттагы мөһим вакыйга. “Соңгы елларда без “Россия тимер юллары” ААҖ белән республикада Яшел Үзәннекеннән кала, зур вокзаллар төзедек. Кукмара вокзалы соңгыдан алдагысы”, - диде Минтимер Шәймиев. Республика башлыгы район халкын яңа бина ачылу белән котлап, 20нче елларда төзелгән элеккеге вокзал кукмаралылар хәтерендә калачак, чөнки бу вакытта булган вакыйгалар аның белән бәйле. “Тимер юл ил өчен социаль-хуҗалык мәгънәгә ия иде һәм ия булачак та”, - дип ассызыклады ул.

Кукмара станциясендә тәүлек саен 12гә кадәр поезд туктала торган вокзал 2005 елның февралендә төзелә башланган иде. Вокзал 80 елга якын хезмәт күрсәткән бинаны алыштырачак. Минтимер Шәймиев Кукмараның 75 еллыгына яхшы бүләк булачак яңа тимер юл вокзалы төзелешендә катнашучыларга рәхмәт белдерде.

Вокзал төзелеше Татарстан Республикасы Хөкүмәте һәм Горький тимер юлы арасында хезмәттәшлек итү турындагы килешү кысаларында чынга ашырыла. Проектчы – «Нижегороджелдорпроект» комплексы проектлау институтының Казан бүлеге, генераль подрядчысы - «Кукморстройсервис» ААҖ. Төзелешнең смета бәясе – 39,8 миллион сум. Эшне Горький тимер юлы Татарстан Республикасы Хөкүмәте белән бергә финанслаган.

Тантаналар барышында “ГТЮ” башлыгының беренче урынбасары Анатолий Лисун Кукмара станциясе башлыгы Ирина Бабушкинага символик бәллүр станция кыңгыравы тапшырды. “Кукморстройсервис” вәкиле аңа алтын ачкыч бүләк итте. Шуннан соң республика башлыгы традицион кызыл тасманы кисеп, Кукмараның яңа “тимер юл капкаларын” ачты. Яшел түбәле, кызыл кирпечтән төзелгән яңа бер катлы вокзал бинасы 50 пассажирга исәпләнгән. Бинаның мәйданы – 1310 квадрат метр. Яңа бинада пассажирлар уңайлыгы өчен бөтен нәрсә бар: зур көтү залы, ике тимер юл кассасы, кафетерий, балалы пассажирлар өчен бүлмә, медицина бүлмәсе. Моннан тыш, бинада милиция бүлеге, тауар конторасы, станция администрациясе өчен бүлмәләр бар. Бинаның эчке бизәкләү эшләре озак вакытка чыдый торган классик материаллардан башкарылган: диварлары мәрмәрдән, идәне гранит. Коляскалы инвалидлар өчен вокзалга кергәндә пандуслар куелган һәм аерым бәдрәф бар.

Ачылыш тантанасында ТР Премьер-министры урынбасары – транспорт һәм юл хуҗалыгы министры Владимир Швецов, ТР Премьер-министры урынбасары – авыл хуҗалыгы һәм азык-төлек министры Марат Әхмәтов, ТР Дәүләт Советы Рәисе урынбасары Римма Ратникова, Кукмара районы хакимияте башлыгы Рауль Рәхмәтуллин катнашты.