Минтимер Шәймиев «Татарстан» журналы коллективын басманың 85 еллыгы белән котлады

2 декабрьдә Татарстан Президенты Минтимер Шәймиев «Татарстан» журналы коллективы белән очрашты, быел басмага - 85 ел.

Очрашу алдыннан журналның баш мөхәррире Рифат Фәттахов республика башлыгына архивта сакланган беренче сан нөсхәсен күрсәтте (1920 елның 1 декабре), ул вакытта «Вестник Татарского областного комитета РКП (б)» дип аталган.

Минтимер Шәймиев “Татарстан” журналының коллективын һәм даими авторларны котлап, совет чорында ук басманың популяр булуын, безнең республикада гына түгел, ә бөтенсоюз дәрәҗәсендә танылганлыгын билгеләп үтте. “Журналның хәзер дә яңа җәмгыяви шартларда үз урыны бар”, - диде Президент һәм конкуренция журнал редакциясен яңача эшләргә мәҗбүр итүен өстәде. Журналга ихтыяҗ булу – баш мөхәррир һәм талантлы коллектив хезмәте, дип билгеләп үтте республика башлыгы. “Татарстан” журналы бай иҗади традицияләре белән горурлана ала. Үз вакытында басманы танылган публицист, әдәбият белгече, тәнкыйтьче Рафаэль Мостафинның җитәкләве очраклы түгел, ул хәзер дә редакция составында эшли. Минтимер Шәймиев заманча яшәүнең тизлегенә һәм кулланучыга эләккән зур мәгълүмат агымына карамастан, журналның укучыларсыз калмаячагына ышаныч белдерде.

Рифат Фәттахов сүзләренчә, 85 ел – катлаулы һәм каршылыклы юл. Журнал гамәлдә булу тарихында анда үз милләте өчен горурлык, шулай ук эчке җаваплылык һәм профессиональлек берләштергән республика патриотлары эшләгән. Баш мөхәррир 1998 елда Татарстан Президенты Минтимер Шәймиев тарафыннан редакция коллективы алдында түбәндәге бурыч куелуын искәртте: “Татарстан” иҗтимагый-сәяси басмасын республиканың йөзек кашы итү. “Бу елларда башкарылган эшләр аз булмады, ләкин алда – тагын да күбрәк”, - дип билгеләп үтте Рифат Фәттахов. Аның фикеренчә, яңа шартларда төп публикацияләр һәм реклама материаллары саны арасында баланс саклап калу зарур, соңгылары хәзер басманың гомуми мәйданының биштән бер өлешен били. Журнал тотылган чыгымнарын үзе каплата алсын өчен, аның җитәкчелеге заказга буклетлар, брошюралар һәм башка басма продукция чыгару өчен махсус нәшрият үзәге төзергә, шулай ук төп санга кушымталар бастырырга ниятли. “Эшлекле Татарстан” исеме астында коммерция кушымтасы, Бөтендөнья татар конгрессы һәм Федераль татар милли-мәдәни мохтәрияте катнашында “Татар дөньясында” уртак басмасы проектлары буенча фикер алышына. Очрашу тәмамлангач, республика башлыгы журнал редакциясе коллективына имзалы “TARTARICA” иллюстрацияле атласын бүләк итте. Рифат Фәттахов, үз чиратында, Президентка басма эмблемасы һәм юбилей саны – 85 төшерелгән сувенир тәлинкәсе бүләк итте.

Очрашуда шулай ук ТР Премьер-министры урынбасары – мәдәният министры Зилә Вәлиева, ТР Дәүләт Советы Рәисе урынбасары Римма Ратникова, ТР “Татмедиа” массакүләм коммуникацияләр агентлыгы генераль директоры Марат Моратов һәм башкалар катнашты. 16 декабрьдә Сәйдәшев исемендәге Дәүләт зур концертлар залында “Татарстан” журналының 85 еллыгына багышланган тантаналы кичә узачак.