Түбән Камада яңа Боз сарае ачылды

23 ноябрьдә Татарстан Президенты Түбән Камада "Боз сарае" спорт-мәдәни комплексын ачуда катнашты. Бәйрәм тантанасы "Шүрәле" композициясе белән башланды, аны синхрон фигуралы шуу буенча Россия призеры – Казанның "Татарстан" командасы тәкъдим итте.

Президент шәһәрлеләрне шундый мөһим вакыйга белән котлап: "Мин Түбән Камада яңа боз сарае төзелеше турында белә идем, әмма ул шулкадәр күркәм булыр, дип уйламаган идем. Татарстан нефть химиячеләренең уңышлары тагын бер тапкыр "Булдырабыз!" девизын раслады. Түбән Камада икенче булган Боз сарае - республикада 15нче. Сез уңышка ирешәсез һәм җиңәргә сәләтле", - диде Түбән Кама хоккейчыларына республика башлыгы һәм аларга кирәкле спорт инвентарьлары алу өчен сертификат тапшырды.

Бу уңайдан тантанада катнашучы РФ Олимпия комитеты президенты Леонид Тягачев Татарстанда спортның җәйге һәм кышкы төрләре буенча 20 дән артык сарай төзү, беренче чиратта республика башлыгы хезмәте булуын ассызыклады. Аннары РФ Хоккей федерациясе президенты Александр Стеблин "Нижнекамскнефтехим" ААҖнең генераль директоры Владимир Бусыгинга "Хоккейга тугърылык өчен" истәлек билгесен тапшырды. Предприятие җитәкчесе сүзләренчә, Түбән Камада хоккей күптән беренче урында тора, ул яңа спорт-мәдәни комплексы төзелешен финанслаган. Ул "Нефтехимик" хоккей командасы капитаны һәм үсмерләр командасы капитанына Боз сараеның символик бәллүр ачкычын тапшырды.

Яңа Боз сарае хоккей матчлары һәм мәдәни чаралар үткәрү өчен билгеләнгән. Төзелештә Түбән Кама, Казан, Чаллы һәм Әлмәтнең 25 подрядчы оешмалары катнашкан. Генераль проектчы - "Союзхимпромпроект" проект институты.

Спорт-мәдәни комплексы 5 меңгә якын спорт җанатарларын сыйдыра. Тамашачы урыннары мәйданы 1800 квадрат метр тәшкил итә. Биредә VIP-кунаклар урыны, комментатор бүлмәләре, шулай ук инвалидлар өчен урыннар билгеләнгән.

Яңа бина заманча кондиционерлау системасы белән җиһазланган. Боз сарае янында 200 урынга исәпләнгән машина кую урыны төзелгән.

11 ноябрьдә яңа боз аренасында "Нефтехимик" хоккейчылары беренче күнегүләрен үткәрде, анда команданың яңа голкиперы канадалы Чад Албан катнашты. Икенче көнне Түбән камалылар яңа комплекста беренче уеннарын үткәрде. "Лада" (Тольятти) белән иптәшлек матчы 4:2 исәбе белән хуҗалар файдасына тәмамланды.

Бүген "Нефтехимик" Тверьнең ЭЭМ хоккей клубы командасы белән очрашты. Матч башында Сарайга спорт сөючеләр төркеме җыелды.

Боз сараен ачу тантанасында Россиянең халык артисты Лев Лещенко чыгыш ясады. Чакырылган дәрәҗәле кунаклар арасында танылган хоккейчы Сергей Макаров та бар иде. Бәйрәм тантанасында, шулай ук Казан хакимияте башлыгы Илсур Метшин һәм Түбән Кама шәһәре һәм районы башлыгы Олег Власов һәм башка рәсми затлар катнашты.