Минтимер Шәймиев: «Төп җаваплылык җирле үзидарә органнарына төшәчәк, чөнки иң катлаулы мәсьәләләрне көндәлек эш барышында хәл итәргә кирәк»

24 октябрьдә Татарстан Президенты Минтимер Шәймиев башкала ратушасында Казан шәһәренең яңа оештырылган муниципаль берлеге вәкиллекле органы утырышында катнашты.

Тавыш бирү һәм муниципалитетның вәкиллекле органына җитәкче сайлангач, ТР Президенты депутатлар алдында чыгыш ясады. «Җирле үзидарә органнарына сайлаулардан соң, республика үзенең үсешендә яңа сәяси этап башлый», - дип билгеләп үтте ул. Россия Федерациясе һәм Татарстан Республикасы Конституцияләре буенча демократик җәмгыять нигезләренең нигезе булып торучы хакимиятнең мөстәкыйль органы барлыкка килде.

Минтимер Шәймиев Россия һәм Татарстанның төп законы нигезендә, җирле үзидарә органнары дәүләт хакимияте системасына кермәвен искә төшереп үтте. «Бу залда тарихи вакыйга булды - хәзердән башлап хакимият тулысынча сезнең үзегездә һәм бер үк вакытта сез республика башкаласының социаль-икътисади үсеше өчен җаваплылык та алдыгыз», - дип ассызыклады Татарстанның Илбашы. Президент билгеләп үткәнчә, Казан шәһәре муниципаль берлегенең вәкиллекле органына сайланган җитәкче Камил Исхаков югары вәкаләткә ия зат булып тора һәм ул билгеләнеп түгел, ә сайланып куелды.

Казан шәһәре муниципаль берлегенең башкарма органына керәчәк җитәкчеләрнең эшкә сәләтле кешеләр булуына ышанычын белдерә Илбашы. Ул муниципалитетларның башкарма органнарын формалаштырачак конкурс комиссиясенең 50 проценты Татарстан Президенты вәкилләре тәшкил итәчәген искә төшереп үтте. «Монда каршылыклар булмаячак, без күбрәк сезнең фикерне тыңлаячакбыз. Безнең шартлар куярга һәм муниципаль хакимияткә ничек йогынты ясарга өйрәтергә ниятебез юк», - диде Минтимер Шәймиев.

Минтимер Шәймиев шәһәр төзелеше планнары турында сөйләгәндә, шәһәрнең Казансу елгасы артындагы яңа өлеше үтә дә заманча булырга тиеш, ә тарихи үзәк корылмалары, шул исәптән Иске Татар бистәсендә барысын да уйлап , фикерләшеп эшләргә кирәклеген ассызыклады.

Татарстан Президенты 5 сентябрьдә РФ Президенты Владимир Путин игълан иткән милли проектларның берсе булган социаль ипотеканың нәтиҗәлелеген аеруча билгеләп үтте. Минтимер Шәймиев үз чыгышында, шулай ук сәламәтлек саклау һәм мәгариф мәсьәләләренә дә тукталды. Республиканың заманча җиһазландырылган эре медицина үзәкләреннән тыш беренчел табиб учреждениеләренең дә зарурлыгын билгеләп үтте Президент . Ул шулай депутатларның игътибарын уйланылган шәһәр мохитен оештырырга ихтыяҗ булуга юнәлтте.

Утырыш ахырында Татарстан Президенты яңа сайланган депутатларга дәүләт хакимияте органнары белән муниципалитетлар арасында вәкаләтләрне чикләү мәсьәләсе ахырына кадәр хәл ителмәгәнлеген искәртте. Федераль закон тарафыннан бу мөнәсәбәтләрне җайга салуга өч ел каралган, нәкъ шул чор дәвамында хезмәттәшлекнең оптималь параметрлары табылачак, диде Минтимер Шәймиев.