Татарстан Республикасы Президенты Минтимер Шәймиевнең мөрәҗәгате

16 нчы октябрь көнне без сезнең белән барлык җирле үзидарә органнарына депутатлар сайлаячакбыз. Республика тарихында беренче мәртәбә җирле хакимият халыкның үз кулына бирелә. Без сәяси тормышта яңа чорга аяк басабыз.

Дөньяның алга киткән илләрендә дәүләт үзидарәгә таянып эш итә. Дөрес, Россия Федерациясендә үзидарә формалашу процессы без теләгәннән акрынрак бара. Әмма, демократик җәмгыять төзү максаты куйганбыз икән, без моңа омтылырга тиешбез.

Сез яхшы беләсез, без һәрвакыт реформаларны тиешле саклык белән, җиренә җиткереп башкарырга тырышабыз. Тормышыбызда моңа мисаллар күп. Соңгы елларда күп кенә башка төбәкләр җирле үзидарә реформасын ашыгып, гамәлгә кертеп уңышсызлыкка очрадылар. Җиде кат үлчә, бер кат кис, ди халык мәкале. Чынлап та, хәзергә кадәр җәмгыять мондый җитди адымга рухи яктан да, матди яктан да әзер түгел иде.

Үзгәртеп кору елларында Татарстан бу өлкәдә үз юлын сайлады. Республикада моңа кадәр җирле хакимият башлыкларын билгеләп кую тәртибе үз-үзен аклады. Ул күпчелек икътисадый һәм социаль проблемаларны уңай хәл итүдә искиткеч зур роль уйнады. Без ялгышмадык дип уйлыйм. Шушы вакыт эчендә башка илләрдән гыйбрәт алдык, үз илебездә бик мөһим вакыйгалар кичердек. Яңа шартларда яшәү тәҗрибәсе тупланды. Россиядә җирле үзидарә органнары турында махсус закон кабул ителде, анда муниципаль органнарның вәкаләтләрен финанс ягыннан тәэмин итүгә дә зур игътибар бирелә. Шуңа күрә, хәзерге көндә Татарстанда әлеге реформаны үткәрер өчен тиешле җирлек барлыкка килде. Аны үткәрми калып булмый, кичектерүнең дә мәгънәсе юк дип саныйм. Чөнки җирле үзидарә системасын кертмичә торып, төп максатыбызга - халык тормышының дәрәҗәсен күтәрүгә ирешү мөмкин түгел. Быелгы сайлауларның асылы да шунда – ул һәр кешенең, һәр гаиләнең тормыш-көнкүрешенә, иминлегенә турыдан-туры кагыла. Һәркем үз тавышын биреп, җирле органнарны төзүдә үзе катнаша. Димәк, аларның карарларына да турыдан-туры йогынты ясый ала. Менә шуңа күрә дә бу сайлауларга бармый калырга ярамый. Ә инде җирле үзидарәгә сез сайлаган депутатлар арасыннан төрле баскычтагы муниципаль берәмлекләрнең башлыклары сайланачак. Монда сайлаучылар да, депутатлар һәм алар сайлаган үзидарә органнары да кулга-кул тотышып хезмәттәшлек итәргә тиеш булалар.

Кадерле ватандашлар! Татарстан халкы хәлиткеч мизгелләрдә бервакытта да битарафлык күрсәтеп, читтә калмады, һәрчак үз сүзен әйтә белде. Республика язмышына кагылышлы иң мөһим эшләрне сезнең теләктәшлек, сезнең ярдәмегез белән матур итеп башкарып барабыз. Казанның әле күптән түгел генә узган меңьеллык юбилее - моның ачык мисалы. Без үзебезнең дус-тату, алга баручы халык икәнебезне бөтен дөньяга исбат иттек.

16 октябрьдә барыбызның да сайлауларда актив катнашуы һәм лаеклы депутатларга тавыш бирүе гаять әһәмиятле. Без үз-үзебезне хөрмәт итәргә һәм сынатмаска тиешбез.

Хәерле сәгатьтә!