Татарстан Президенты Нәҗип Зыятдиновка республиканың югары бүләге – “Татарстан Республикасы алдындагы хезмәтләре өчен” орденын тапшырды

25 июльда Казан Кремлендә ТР Президенты Минтимер Шәймиев Бөек Ватан сугышы ветераны, өч Ленин ордены иясе, Социалистик хезмәт герое Нәҗип Зыятдиновка Татарстан Республикасы алдындагы хезмәтләре өчен” орденын тапшырды. Бу бүләккә ул яшьләрне патриотик һәм әхлакый тәрбияләүгә зур өлеш керткәне өчен лаек булган.

Бүләкләү алдыннан Минтимер Шәймиев Нәҗип Зыятдиновка рәхмәт сүзләрен һәм 80 яшьлек юбилее уңаеннан котлауларын җиткерде. “Үзенең яшәү рәвеше һәм хезмәтенә күрә ул танылган кеше булды. Өч Ленин ордены, Социалистик хезмәте герое ордены, башка күп кенә бүләкләр алды. 1942 елдан 1945 елга кадәр Бөек Ватан сугышының барлык хәлиткеч сугышларында булган. Ул – батыр, Татарстан һәм безнең күпмилләтле халкыбыз каһарманы, данлыклы язмышы булган кеше”, - дип билгеләп үтте республика башлыгы.

Минтимер Шәймиев Нәҗип аганың хезмәт биографиясе турындагы истәлекләре белән уртаклашты. Ярты гасыр ул республика хуҗалыкларында җитәкче урыннарда эшләгән: иң элек Баулы районында, соңыннан Чаллы янындагы “Гигант”совхозында. “Үз вакытында без бергә кырларны 100 процент диярлек сугаруга, ә иң мөһиме, “КАМАЗ”ны азык белән тәэмин итүгә ирештек”, - дип сөйләде Президент.

Үзенең беренче бүләкләре турында сөйләгәндә, Нәҗип ага “Батырлык өчен” фронт медален – гади солдат өчен иң югары бүләкне билгеләп үтте, ул аны Беларусь сугыш кырларындагы яуда алган. Моннан тыш, ул I дәрәҗәдәге Ватан сугышы ордены, мактау билгеләре белән бүләкләнгән.

Бүләкләү тантанасында ТР авыл хуҗалыгы һәм азык-төлек министрының беренче урынбасары Минсәгыйр Нуретдинов, республиканың Тукай районы хакимияте башлыгы Таһир Хәрмәтуллин катнашты.