Татарстан Президенты - Санкт-Петербургта

26 майда Татарстан Республикасы Президенты Минтимер Шәймиев Санкт-Петербургка килде. Ул шәһәр көне бәйрәмендә катнаша.

Аэропортта Минтимер Шәймиевны Санкт-Петербург губернаторы Валентина Матвиенко, вице-губернатор Александр Вахмистров, ТР Тышкы элемтәләр департаменты директоры Тимур Акулов, Татарстанның Санкт-Петербургтагы даими вәкиле Шамил Әхмәтшин һәм башкалар каршы алды. Президент белән Петербургка шулай ук Казан шәһәре башлыгы Камил Исхаков та килде.

Санкт-Петербург шәһәре җиренә аяк баскач ук Татарстан Президенты шәһәрнең соңгы арада шактый үзгәрүен билгеләп узды (бу инде аэропортта ук күренә) һәм елмаеп өстәде: "Монда килүдән безгә җиңелерәк булмаячак. Казанның 1000 еллыгына билгеләнгән эшләрне башкарыр өчен вакытны ничек җиткерергә дә белмим инде, - шул кадәр күп эшкә өлгерергә кирәк", - диде.

Билгеле булганча, 2003 елда Татарстан һәм Санкт-Петербург башкаласы хакимиятләре арасында "Казанның 1000 еллыгы һәм Санкт-Петербургның 300 еллыгына бәйле уртак чаралар уздыру" килешүе гамәлгә кертелде. Ике ел элек кенә Казан Петербургның 300 еллыгына әзерлек буенча Казан урамын реставрацияләп бар бурычларын да үтәде. Минтимер Шәймиев Казанда хәзер Санкт-Петербург урамы барлыгын һәм анда төзекләндерү, матурлату эшләре баруын искә төшерде. "Без сезнең алда зур бурычлы булып калырбыз дип саныйм мин. Чөнки Санкт-Петербургның 300 еллыгына шул кадәр эш башкара алмадык. Әмма бер-беребезгә дустанә бурычлы булып калуыбыз яхшы да әле", - диде Президент.

Валентина Матвиенко хәзер Петербург Казанда үз урамын ясаячагын, үз йөзен булдырачагын билгеләп узды. Шулай ук ул әлеге урамның берничә проекты каралуы, әмма 1000 еллык тарихы булган Казанга берсенең дә туры килмәвен әйтте. "Әлеге урам Казанның бизәлеше булып Санкт-Петербургны искә төшереп торыр дип өметләнәбез", - дип билгеләде В. Матвиенко.

Бүген Татарстан Президенты Пискарев зиратында булып Ленинградны яклап ятып калган татарстанлыларга мәрмәр плитәгә, шулай ук Ватан-Ана монументына веноклар һәм Санкт-Петербургка нигез салучы Петр Iга Петропалов соборында чәчәкләр куйды.

Төп-төгәл төшке вакытта Татарстан Президенты Петропалов крепостеның Нарышкин бастионыннан, Казанның 1000 еллыгы хөрмәтенә, 122 миллиметрлы коралдан ату ясаячак. Шулай итеп Санкт-Петербург юбилей бәйрәмнәре эстафетасын Татарстан башкалсына тапшырачак. Минтимер Шәймиев шулай ук шәһәр көненә багышланган тантаналы митингта катнашачак. Моннан тыш Санкт-Петербург губернаторы Валентина Матвиенконың да Татарстан Президенты белән рәсми очрашуы каралган.