Минтимер Шәймиев Чаллыда

Бүген Татарстан Президенты Минтимер Шәймиев республиканың Чаллы шәһәренә килде. Эш визитын Президент "РАССТАЛ" Ябык акционерлык җәмгыятенең җитештерү базасы белән танышудан башлады. Әлеге корпорация алюминийдән сәүдә җиһазлары, машина төзелеше предприятиеләре өчен эшләнмәләр, төрле конструкцияләрне җитештерү һәм сату белән шөгыльләнә.

Үткән ел предприятиедә 1006,2 миллион сум күләмендә товар продукциясе җитештерелгән. Бу 2002 ел белән чагыштырганда 34,8 процентка күбрәк. Шулай ук узган елда 1105,9 миллион сумлык продукция сатылган, 125 төрле яңа профильләр үзләштерелгән, төзелеш өчен биш яңа фасад һәм башка конструкцияләр җитештерү башланган. Финанс-хуҗалык эшчәнлеге нәтиҗәләре буенча 2003 елда 58,9 миллион сум күләмендә табыш алынган (2002 елда табыш 22,2 миллион сумны тәшкил иткән булган). Генераль директор Сергей Рачков җитәкчелегендәге предприятиедә 1524 кеше эшли, аларның уртача хезмәт хакы - 6819 сум.

2004 елда предприятие җитештерүне 1,3 миллиард сумга җиткерергә ниятли. Шул уңайдан корпорация профильләрне пресслау җиһазларын алу өчен "COMETALL" Италия фирмасы белән килешү төзеп, әлеге җиһазлар ярдәмендә пресслау күләме 2-3 тапкырга артыр дип көтелә.

Быел шулай ук яңа продукция җитештерү исәбенә алюминь профильләрне тирәнрәк эшкәртү дә планлаштырыла.

"РАССТАЛ" корпорациясендә булганнан соң Татарстан Президенты шәһәрнең "Чаллы-ТВ" телерадиотапшырулар редакциясенең иҗат лабораториясе белән танышты. "Чаллы-ТВ" шәһәр хакимияте һәм халык депутатлары Советы карары белән 1992 елдан бирле эшли. Бүген редакциядә (баш мөхәррир Хәбибрахман Шәфигуллин) 116 кеше эшли, тәүлегенә 5 сәгать телетапшыру, 18 сәгать - радио чыга. "Чаллы-ТВ" 51 нче ДМВ, "К 1/4 ел" радиосы 67,79 МГц УКВ эфирына чыга. Аларны Татарстанның Төньяк-Көнчыгыш ягындагы Чаллы, Тукай, Менделеевский, Зәй кебек 15 район һәм күрше Удмуртия Республикасының кайбер районнарда тыңлыйлар.

Ретрансляция исә НТВ белән килешү буенча бара. "Чаллы-ТВ"да 27 төрле тапшыру чыга. Алар арасында "Хәерле иртә", "Чаллы" "Яңалыклар", "Чал тарихлы кала", "Яшь йөрәкләр" һәм башкалар. Һәр чәршәмбе хакимият башлыгы, аның урынбасарлары, идарә, преприятие җитәкчеләре катнашында "Ачыктан-ачык сөйләшү" исемле туры элемтә үткәрелә.

Редакция ике ел рәттән "Минем Чаллы" шәһәр бәйгесендә "Иң яхшы иҗади коллектив" исеменә лаек булган, республика һәм Россия конкурсларында 32 приз алган.

"Чаллы-ТВ"ның барлык телетапшыруларның үз төшерү павильоннары бар. Үз хисабына редакция бинасы төзекләндерелгән. Үткән ел редакциягә яңа заманча җиһазлар алынган. Моның өчен республика бюджетыннан 10 миллион сум акча бирелгән.

"Мәгълүматны сыйфатлы һәм оператив тапшыру өчен зур адым ясыйбыз, - диде Президент бүген әлеге яңа цифрлы телевидение технологияләрен тәкъдир итүдә. - Без корреспондентларның эшен җиңеләйтәбез, уңышлар сезгә, хәзер калганы сезнең профессиональлектән тора".

Төштән соң Минтимер Шәймиев Сара Садыйкова исемендәге Концертлар залында үткән Чаллы халык депутатларының 25 нче хисап сессиясендә катнашты.