Безне зур фестиваль көтә

23 гыйнварда Казан Кремлендә Татарстан Президенты Минтимер Шаймиевнең Россия Композиторлар берлеге рәисе, Россия авторлар җәмгыяте советы президенты Владислав Казенин белән очрашуында Казанның 1000 еллыгын бәйрәм итү кысаларында уртак чаралар үткәрү перспективалары тикшерелде.

Владислав Казенин - танылган композитор гына түгел. Ул, Минтимер Шәймиев бәяләвенчә, менә дигән оештыручы, үзен илебезнең күпмилләтле сәнгатенә багышлаган һәм аның үсеше өчен мөмкин булганны һәм булмаганны да эшләгән кеше.

Татарстан Президенты искәртеп узганча, ТР Композиторлар берлеге - элек-электән көчле, һәм бүген аның дәрәҗәсе, шулай ук абруе, республика музыкантларының иҗаты да Татарстанның музыка сәнгатенә генә сыешмый. Шулай ук Владислав Казенин да бу фикер белән килеште, һәм Татарстанның Композиторлар берлеге, Мәскәү һәм Санкт-Петербургтан кала, үзенең әһәмияте ягыннан Россиядә өченче оешма, дип билгеләп үтте.

Россия Композиторлар берлеге рәисенең Татарстанга килүе тиздән Казанның 1000 еллыгы билгеләп үтелүгә бәйле. Без бу датаны игътибарсыз калдыра алмадык, диде ул. Бу - бөтен халыкның бөек бәйрәме.

Яклар Татарстан башкаласының юбилеен бәйрәм итү кысаларында Күчмә музыка академиясе үткәрү турында да килештеләр. 2005 елның маенда бу академия Казанда гына түгел, республиканың музыка училищелары булган шәһәрләрендә - Чаллыда, Әлмәт, Түбән Кама, Зеле-нодолда да үткәреләчәк. Ул Казанда симфоник, камера, хор музыкасының бик зур фестивале белән төгәлләнәчәк.

Очрашу вакытында Авторлык хокукы темасына да кагылып үтелде. Владислав Казенин,

Россия Авторлар җәмгыяте советы президенты буларак, закон нигезендә әсәр авторы, кайда гына яңгыравына карамастан, үз музыкасының тиешле әҗерен алырга тиешлеген искәртте. Музыка - авторның байлыгы, һәм бары тик ул гына аның белән эш итә һәм аннан керем көтә ала, диде ул.

Очрашуда ТР Премьер-министры урынбасары Зилә Вәли-ева, Казан хакимияте башлыгы Камил Исхаков, мәдәният министры Илдус Тарханов, Татарстанның Композиторлар берлеге рәисе Рәшит Кәлимуллин һәм башкалар катнашты.