"Бердәм Россия"нең IV съезды

24 декабрьдә Мәскәүнең "Россия" дәүләт концертлар залында илнең барлык төбәкләреннән килгән 651 делегат катнашында "Бердәмлек һәм Ватан" - "Бердәм Россия" сәяси партиясенең IV съезды булды. Залга "Бердәм Россия"дән Дәүләт Думасы депутатлары, партиянең ышанычлылары, партия тарафдарларының оешмалары, "Яшьләр Бердәмлеге" җитәкчеләре, Россия Федерациясе Президенты һәм Хакимияте администрациясе вәкилләре җыелды.

Президиумдагы сәяси партия лидерлары Борис Грызлов, Юрий Лужков, Минтимер Шәймиев, Сергей Шойгу съезд утырышын чиратлашып алып бардылар. Съездга Россия Федерациясе Президенты В.Путин котлау җибәрде. Аны Борис Грызлов укып үтте.

Көн тәртибе расланды. Анда ике сәяси мәсьәлә - "Россия Федерациясе Федераль Җыелышы Дәүләт Думасы депутатларын сайлаулардан соң илдәге сәяси вәзгыять һәм "Бердәм Россия" Бөтенроссия сәяси партиясенең бурычлары", "Владимир Владимирович Путинны Россия Федерациясе Президенты вазифасына кандидат итеп хуплау турында"гы мәсьәлә кертелде. Көн тәртибенә шулай ук партия уставында, партиянең җитәкче органнарында үзгәрешләр, шулай ук "Бердәм Россия" Бөтенроссия сәяси партиясенең Үзәк Сәяси советы сайлау турындагы мәсьәләләр дә кертелде.

Беренче мәсьәлә буенча доклад белән "Бердәм Россия"нең Югары Советы рәисе Борис Грызлов чыгыш ясады. Ул, илдә беренче тапкыр буларак сәяси яктан җаваплы законнар чыгару хакимияте формалашты, дип искәртте. "Бердәм Россия"дән 246 депутат Дәүләт Думасында эшлиячәк. Докладта шулай ук сайлау алды кампаниясендә иң югары дәрәҗәдә нәтиҗәле эш күрсәткән ике төбәкнең - Татарстан Республикасы һәм Кемерово өлкәсенең сайлау штаблары билгеләп үтелде.

Съездда "Бердәм Россия" партиясенең Татарстан Республикасындагы бүлеге Политсоветы секретаре, Дәүләт Советы Рәисе Фәрит Мөхәммәтшин чыгыш ясады. Ул, аерым алганда, Россия Федерациясендә чынбарлыкта күп партиялелек пәйда булып килә, дип искәртте. Кискен сәяси көрәш нәтиҗәсендә хакимияткә үзенең сайлау алды йөкләмәләре өчен халык алдында җавап бирердәй партия килде. Ул үзенә ышанган һәркем алдында тулы җаваплылык тоеп эшләячәк. Бу - сәяси яктан иң катлаулы бурыч.

Съезд 14 мартта булачак сайлауларда Россия Федерациясе Президенты вазифасына Владимир Владимирович Путин кандидатурасын хуплау турында мөрәҗәгать кабул итте.

Съезд партиянең җитәкче органнарына үзгәрешләр кертте. Хәзер партиянең Югары Советында Татарстан Республикасы исеменнән партия рәистәше Минтимер Шәймиев, шулай ук Фәрит Мөхәммәтшин һәм Олег Морозов эш итәчәк.

Утырышлар арасындагы тәнәфестә партия лидерлары журналистлар өчен матбугат конференциясе үткәрде. Борис Грызлов, аерым алганда, үзенең Дәүләт Советы депутаты булып эшләячәге турындагы карарын җиткерде. Бу карар РФ Президенты Владимир Путин белән килештерелде, дип билгеләп үтте. Татарстан Президенты Минтимер Шәймиев журналистлар сорауларына җавап биреп: "Бу - депутатлар, үз сайлаучылары өчен кызыклы булырга теләүчеләр съезды түгел. Бу - җитлеккән карашлы кешеләр съезды. Биредә җаваплылык хисе бар, аның булмавы мөмкин түгел. Миңа съездда яңгыраган конкрет тәкъдимнәр - Дәүләт Думасында яшьләр сәясәте, спорт һәм туризм сәясәте формалаштыру, ипотека булдыру турындагы һ.б. тәкъдимнәр ошый. Партия үзенең вәгъдәләрен чынбарлык гамәлләрендә тормышка ашырырга тиеш", - диде.