Михаил Девятаев истәлегенә

Каһарман очучы, фантастикага тиң батырлыгы белән Бөек Ватан сугышы тарихына кереп калган легендар Михаил Девятаевның нәкъ менә безнең шәһәрдә яшәгәнлеге белән чиксез горурланабыз, диде Казан хакимияте җитәкчесе Камил Исхаков Арча зиратында Советлар Союзы Герое М.П.Девятаев истәлегенә куелган һәйкәлне ачу митингында.

Очучы тугыз кешедән торган хәрби әсирләр төркеме белән бергә 1945 елның февралендә фашистлар Германиясе Хәрби Һава Көчләренең шушы классындагы самолетларының иң яхшы үрнәген - "Хейнкель-111" бомбардировщигын кулга төшереп, утраудагы Пенемюнде яшерен авиация базасыннан кача. Шулай итеп, Советлар Союзы җитәкчелегенә Узедон утравындагы яшерен җитештерү турында стратегик яктан мөһим мәгълүматлар җиткерелә, ә М.Девятаев үзе Гитлерның шәхси дошманы дип игълан ителә. Әмма герой лаеклы дан-шөһрәткә күмелү урынына фашист концлагерьлары аша узган бик күп совет кешеләренең язмышына дучар була. Ул хәрби трибунал тарафыннан хөкем ителә һәм репрессияләнә. Космик корабларның генераль конструкторы С.Королев һәм Советлар Союзы Герое А.Покрышкинның тырышлыклары белән генә М.Девятаев һәм аның иптәшләренең батырлыгы лаеклы бәяләнә: аңа Советлар Союзы Герое исеме бирелә һәм Ленин ордены тапшырыла, иптәшләре дә орденнар белән бүләкләнә. Шуннан соң М.Девятаев утыз елдан артыграк вакыт дәвамында Казан елга портында эшли, биредә аңа тиз йөрешле беренче "Ракета" катерын сынау тапшырыла. Ул катерның беренче капитанына да әйләнә. Шуннан соң сугыш герое Идел елгасында тиз йөрешле "Метеор"лар йөртә.

Михаил Петрович Девятаев Бөек Ватан сугышында катнашучылар символына әйләнде, диде митингта чыгыш ясап "Бердәм Россия" партиясенең Югары Советы рәистәше Минтимер Шәймиев. Бүген без тыныч тормыш өчен көрәшкән, ирегебезгә кул сузарга ярамаганлыгын раслаган кешеләрнең истәлеген хөрмәтлибез. Һәрвакытта бердәм булдык, шуңа күрә дә көчле без. Бүгенге көндә ветераннар инде аз калды, әмма безнең беренче яуларда ук һәлак булганнар, шулай ук җиңүгә озын юллар урап килүчеләр турында да онытырга хакыбыз юк, сугыштагы һәр көн - үзе үк батырлык ул. Бу - безнең гомуми җиңүебез һәм һәр сугышчының батырлыгы.

Җиңүнең 60 еллыгына кадәр без, барлык дәрәҗәләрдәге хакимиятләргә үзләренең сорауларын биреп бетерсеннәр өчен, бүгенге көндә исән-имин яшәүче бер генә ветеранны да игътибардан читтә калдырырга тиеш түгелбез. Сугышта катнашучыларның хәл ителмәгән проблемаларын кичектерергә ярамый инде. Соңыннан араларыннан кемне дә булса игътибардан читтә калдыру җәһәтеннән кызгану хисе барлыкка килмәсен өчен барысын да эшләп өлгерергә кирәк. Алар турында кайгырту - безнең бурычыбыз, диде М. Шәймиев.

Митингта ТР Премьер-министры урынбасары Зилә Вәлиева, Премьер-министр урынбасары - транспорт һәм юл хуҗалыгы министры Владимир Швецов һәм башкалар катнашты.