Киләчәк яшьләр кулында

Кичә Казанның "Баскет-холл" спорт комплексында республика яшьләр иҗтимагый оешмаларының форумы булып узды. Аның эшендә республикабызның төрле төбәкләреннән 7 меңгә якын яшь кеше катнашты. Форумга килгән кунаклар арасында "Бердәм Россия" партиясе Югары Советы рәистәше Минтимер Шәймиев, "Яшьләр берлеге" Бөтенроссия иҗтимагый оешмасы лидеры Александра Буратаева, ТР Премьер-министры урынбасары Зилә Вәлиева, ТР яшьләр эшләре һәм спорт министры Марат Бариев, Казан мэры Камил Исхаков һәм башкалар бар иде.

Быелның ноябрь аенда яшьләр иҗтимагый оешмалары арасында "түгәрәк өстәл"ләр үткәрелеп, яшьләргә мөрәҗәгать һәм әлеге оешмаларның уртак форумын үткәрү турында карар кабул ителгән иде. Республикабыздагы яшьләр сәясәте инде ун елга якын аларның иҗтимагый оешмалары белән тыгыз элемтәдә тормышка ашырыла. Яшьләр мәсьәләләре дәүләт дәрәҗәсендә чишелә. ТРның "Яшьләр турында", "Яшь гаиләләрне торак белән тәэмин итүдә дәүләт ярдәме турында"гы законнары, бу мәсьәләләр буенча ТР Президенты Указлары, Министрлар Кабинеты карарлары моны ачык дәлилли. Боларның барысы да яшьләр проблемаларының чишелешенә, иҗтимагый оешмаларның эшчәнлегенә гарантия булып тора.

ТР Юстиция министрлыгы мәгълүматларына караганда, 2003 елның 1 маена Татарстанда 100 яшьләр һәм балалар оешмасы теркәлгән. Алар спорт һәм сәламәтләндерү, сәясәт, экология, иҗтимагый-мәдәни юнәлешләрдә эш алып баралар. 1994 елда исә Татарстанда бары тик 9 республика яшьләр иҗтимагый оешмасы гына эшләп килгән. Бүгенге көндә ТР Яшьләр эшләре һәм спорт министрлыгы 29 оешма белән тыгыз хезмәттәшлек итә.

ТР яшьләр эшләре һәм спорт министры Марат Бариев сүзләренә караганда, соңгы елларда беренче тапкыр менә шундый зур чара оештырылды. "Татарстанда яшьләрне торак белән тәэмин итү программасы эшләп килә, яшьләр үзәкләре ачыла. Зур спорт һәм мәдәният чаралары үткәрелә. Боларның барысы да Президентыбызның ярдәме белән тормышка ашырыла, - диде министр. - Сез - XXI гасыр яшьләре, яңа Россия кешеләре. Сайлауга килеп үз фикерегезне әйтерсез дип ышанам". "Яшьләр берлеге" Бөтенроссия иҗтимагый оешмасы лидеры, Дәүләт Думасы депутаты Александра Буратаева чыгышында: "Без үзҗаваплылыгыбызны бүтәннәргә тапшырмас өчен берләштек. Нәкъ менә яшьләр илебезне көчле һәм бердәм итә алачак", - диде. Ул форумда катнашучыларны "Бердәм Россия" сәяси партиясе өчен тавыш бирергә чакырды.

"Сез илебезнең сәяси юнәлешен үз кулыгызга аласыз. Илебездә көчле партия барлыкка килә. "Бердәм Россия" сайлауда җиңеп чыгарга омтыла. Чөнки шулай гына илебезне демократияләштерү юлыннан бара, гражданлык җәмгыятен төзи алачакбыз. Әгәр моны эшләмәсәк, сайлаулар элеккеләреннән берни белән дә аерылмаячак. Сайлау алдыннан бирелгән вәгъдәләр үтәлмәячәк", - диде "Бердәм Россия" партиясенең Югары Советы рәистәше Минтимер Шәймиев. Ул республикабызның бүгенгесе һәм киләчәге яшьләр кулында икәнлеген искәртте.

Әлеге чара яшьләрнең иҗтимагый-сәяси җитлеккәнлеген күрсәтүгә, аларның сайлау алдыннан активлыгын арттыруга юнәлдерелгән иде. Һәм, чыннан да, 7 декабрьдә булачак Дәүләт Думасына сайлауларда яшьләр илебезнең киләчәген билгеләүдә үз сүзен әйтәчәк.