«Бердәм Россия» өчен 60,36 процент тавыш бирелгән

Татарстан үзәк сайлау комиссиясенең көндезге 12 сәгать утыз минуттагы мәгълүматларына караганда Татарстанда РФ Думасының дүртенче чакырылышына узган сайлаулар буенча 97,78 процент сайлау протоколлары эшкәртелгән. Татарстанда 2932 участок сайлау комиссиясе эшләде. Берсе шуның үзәк, бишесе округ, алтмыш өче исә территориягә карый. Округ сайлау комиссияләре участоклардан килгән 2867 протоколны тикшергән. Тагын 65 протоколны карыйсы бар әле.

ТР буенча тулаем «Бердәм Россия» партиясе - 60,36 процент тавыш җыйган. Икенче урында КПРФ - 8,76 процент, өченче урында ЛДПР - 5,86 процент. 4,25 процент кеше барлык партияләргә дә каршы тавыш биргән. Сәяси партияләр арасында «Родина» сайлау блогы - 3,26 процент, "Возрождения России" һәм «Российская партия «Жизни» - 2,83 процент, «Яблоко» - 2,10 процент, «Партия Пенсионеров» - 1,61 процент, СПС - 1,3 процент тавыш җыйган.

Шулай иттереп Татарстанда «Бердәм Россия» партиясе җиңү яулады. Аерым шәхесләр өчен тавыш биргәндә дә, бу партия вәкилләренең яисә якланган кешеләрнең җиңү яулавы билгеле. Алар территориаль округларда да алда бара.

23нче Әлмәт сайлау округындагы «Бердәм Россия» вәкиле Марат Мәһдиевның 71 процент тавыш җыюы иртәнге тугызда ук билгеле иде инде. Бу округта иртән «барысына да каршы» тавыш бирүчеләр 6,15 процент булуы билгеле иде. Элеккеге чакырылышта РФ Думасында депутат булган Фәндәс Сафиуллинның җиңелүе билгеле. Ул 4,72 процент кына тавыш җыя алган.

24нче Мәскәү сайлау округында иртән саналган 86 процент бюллетеньнардан исәпләнгән буенча Ринат Гобәйдуллин 56,04 процент тавыш җыеп алда бара. Бу округта 10 процент кеше «барысына да каршы» тавыш биргән булган. КПРФ кандидаты Нәсимә Столярова исә 7,91 процент тавыш җыйган дип исәпләнгән иде иртәнге тугызда.

25нче Яр Чаллы округында 70 процентка якын бюллетень эшкәртелеп, аларның 50,66 процентка якынында Олег Морозовка тавыш бирелгәне билгеле иде. Ул «Россия регионнары» депутат группасы җитәкчесе. Сайлауларда «Бердәм Россия» вәкиле буларак та катнашты. Монда шактый кеше «барсына каршы» тавыш биргән - 12,43 процент, дип хәбәр итте ТР Үзәк сайлау комиссиясе.

26нчы Түбән Кама сайлау округында исә иртәнге тугызда «Бердәм Россия» вәкиле Альберт Сәлиховның 69,78 процент тавыш җыйганы билгеле иде. Бу иртәнге санаулардан соң билгеле булганы. Биредә иртәнге тугызда ук 90 проценттан артык бюллетень эшкәртелгән иде. КПРФ вәкиле Роберт Садыйковның ул вакытта 8,59 процент тавыш җыюы билгеле иде. Бу округта 7,35 процент «барсына да каршы» сайлаган.

27нче Идел буе сайлау округында иртән ярты бюллетень саналган иде. Айрат Хәйруллин өчен 32,4 процент тавыш бирүләре билгеле. Иван Грачевка исә 21,4 процент тавыш бирелгән. Александр Сапоговский 9,2 тавыш алган. Александр Салий 6,9 процент тавыш алган. ТР Президентының элеккеге матбугат сәркатибе Ирек Мортазин исә 4,4 процент кына тавыш җыя алган. Монда «барысына да каршы» 12,4 процент тавыш алынган.