М.Шәймиев "Бердәм Россия"нең телебәхәсләрдә катнашудан баш тартуын дөрес дип саный

Казан. 1 декабрь. Интерфакс. "Бердәм Россия" партиясе Югары Советы рәистәше Минтимер Шәймиев, сайлау алды телебәхәсләрендә катнашудан баш тартып, әлеге партия дөрес эшләде, дип саный.

"Кайбер сәясәтчеләрнең турыдан-туры эфирда үзләрен ничек лаексыз тотуларын күреп, кайбер партияләр телебәхәсләрдә катнашырга карар кылуларына үкенәләрдер, дип уйлыйм", - диде "Интерфакс-Сайлаулар"га биргән интервьюда М.Шәймиев.

Аның сүзләренә караганда, сүз ЛДПР лидеры Владимир Жириновскийның үзен лаексыз тотуы турында бара. Ул турыдан-туры телеэфирда "йодрык сугышы" оештырды. "Бердәм Россия" мондый шамакайлыкта һәм Жириновский кебек кеше белән мондый бәхәсләрдә катнаша алмый", - диде М.Шәймиев. Телеэфирда сайлау алды бәхәсләренә анализ ясап, ул сайлау алды сөременә кереп чумып, теге яки бу партияләр вәкилләренең ачыктан-ачык сафсата белән шөгыльләнүләреннән һәм кешеләргә чынга ашмаслык вәгъдәләр бирүләреннән гаҗәпләнүен белдерде.

Бу мәгънәдә алганда, шушы сайлау алды кампаниясе элеккесеннән әлләни аерылып тормый, дип саный Татарстан җитәкчесе. Аның фикеренчә, безнең ил сәяси партияләрнең төзелеп ныгуы юлында гына тора әле, шуңа күрә сайлауларда катнашучы партияләр арасында күп кенә кәрлә партияләр бар, аларның программалары чынбарлыктан һәм конструктивизмнан ерак тора.

М.Шәймиев күрсәтеп узганча, "Бердәм Россия" "хакимият партиясе" исеменә дәгъва итсә дә, ул бу сайлауларда катнашучы яңа партия әле, шуңа күрә илдә бүгенге икътисадый һәм сәяси хәл өчен бөтен җаваплылыкны үз өстенә ала алмый.

Шул уңайдан М.Шәймиев турыдан-туры эфирдагы бәхәсләр барышында күп партияләр, бигрәк тә "кәрлә" партияләр вәкилләренең, "Бердәм Россия"гә урынсыз тәнкыйть белән ташланып, үзләрен "күрсәтү" мөмкинлеген кулдан ычкындырмаячакларына шикләнми.

"Мондый шартларда үзеңнең хаклы булуыңны исбатлау тулысынча мәгънәсез эшкә әверелде", - дип ассызыклады ул.