Безнең күңел һәрчак сезнең белән

Әниемнең җылы кочагы... Аның кочагы күңел җылысын да, наз һәм изгелекне дә сыйдыра. Һади Такташның аналар гимнына әверелгән "Ана - бөек исем" дигән юлларын искә төшергәч үк, күз алдына мөлаем карашлы, сөйкемле, шәфкатьле изге зат килеп баса.

Ел саен 30 ноябрь көнне аналарыбызны бәйрәм белән котлыйбыз, аларга дан җырлыйбыз. Быел да 28 ноябрь көнне аларны Галиәсгар Камал исемендәге Татар дәүләт академия театры бинасында узган бәйрәм чарасында "Бердәм Россия" партиясенең Югары Советы рәистәше Минтимер Шәймиев котлады.

- Россиядә менә алтынчы тапкыр инде Әниләр көнен бәйрәм итәбез, - диде ул. - Бу - изге гамәл. 8 Март хатын-кызлар бәйрәме булып торса, Аналар көне исә һәммәбезнең дә изге бәйрәме санала. Аналарга булган мөнәсәбәтебез безнең рухи дөньябызны тәшкил итә. Әгәр бала анага нинди мөгамәләдә булса, кешенең рухи дөньясын да, тәрбиясен дә шуннан аңларга мөмкин. Икенче төрле әйткәндә, анага караш синең кем икәнлегеңне күрсәтеп тора. Әгәр без, бигрәк тә яшь буын, аналар өчен кулдан килгәннең барысын да эшләсәк, тәртипле, әхлаклы, намуслы кешеләр булачакбыз. Без, иң элек, Аллаһы Тәгаләгә ничек табынган булсак, икенчесе аның әни була торгандыр. Бу изге көн киләчәктә дә Аналар көне булып калсын иде.

Менә сәхнәгә 14 ана күтәрелә. Республикабызның төрле районнарыннан килгән күп балалы аналарны күреп, ирексездән уйланып куясың: тормыш авырлыгына да карамыйча, 7-8 бала үстергән аналар бар икән әле! Әнә, Баулы районыннан килгән Рушания Васикова 5 кыз, 3 малай үстергән. Ике кызы инде Алабуга педагогия университетында белем ала. Арча районыннан килгән Зөлфия Ганиуллина биш баланы берүзе тәрбияли икән. Әлеге җырлы гаилә күп кенә конкурсларда лауреат булган. 14 гаилә арасыннан кайсын гына алсаң да, һәрберсе талантлы, белемле балалар тәрбияләп үстергән. Татьяна Воробьева (Алексеевск), Нәзимә Борһанова (Әлки), Галина Ермолаева (Буа), Илза Абакумова (Лениногорск), Гүзәлия Миргалимова, Светлана Николаева (Минзәлә), Нәсимә Дәүләтшина (Теләче), Ирина Артемьева, Светлана Столяренко, Нина Коломина, Любовь Чернова, Елена Габишевалар да барысы да (Казан) әнә шундыйлар.

Әлеге 14 ананы Татарстан вице-премьеры Зилә Вәлиева Әниләр көнендә традициягә әверелгән "Ана даны" медале белән бүләкләде. Бу медальгә республикабыздагы 91 ана лаек булган инде.

2003 елда бездә күп балалы гаиләләр саны 32284 икән. Әлбәттә, соңгы еллар белән чагыштырганда, андый гаиләләрнең саны азайганнан-азая бара. Әйтик, 1997 елда күп балалы гаиләләр саны 45219 булган.

Бүгенге көндә күп балалы гаиләләргә ташламалар да бар. Әйтик, ана баласына 16 яшь тулганчы бушка дарулар ала ала. Торак һәм коммуналь хезмәткә түләү өчен дә ташламалар каралган. Балаларның санына карап ташлама шартлары төрлечә. Әгәр гаиләдә 3 яки 4 бала икән - 30 процент, 5-9 бала икән, 50 процентын түлисең. 10 нан артык балалы гаиләләр коммуналь хезмәт өчен бөтенләй түләми.

Шуны да әйтергә кирәк, аз пособие алган балалы гаиләләргә быел шактый социаль ярдәм күрсәтелгән. 2003 елда Татарстан Республикасының социаль яклау программасы нигезендә баласы биштән артык булган 2872 гаиләгә ел саен өстәмә пособиеләр бирелгән. Нинди авыр елларда да мондый акчаларны күрмәгән, 10-12 бала тәрбияләгән аналар да бар иде залда утыручылар арасында. Чәчләренә чал керсә дә, йөзләрендә елмаюлары сүнмәгән аларның. Ана назыннан мәхрүм, ягъни балалар йортыннан 4-5 бала алып тәрбияләгән аналар да бар биредә. Олы йөрәкле, мәрхәмәтле бу аналарга карагач, шигъри юллар искә төшә.

Ана -гүя дала,
Колачы киң, йөзе кояшлы,
Ана җирдә бөтен игелекнең,
Изгелекнең гомер юлдашы.

Шигъри юлларга гына салып әнкәйләргә булган хисне биреп булыр микән соң? Юктыр, мөгаен. Танылган җырчы Фердинанд Сәлахов әниләр турында җыр башкарганда залда утыручы аналарның күзләре яшьләнде. Нечкә күңелле, сабырлык, гүзәллек кебек күркәм холыкларны үзенә сыйдырган әниләр яшь аралаш елмая. Үзләре елый, үзләре елмая.
Әниләр бәйрәме концерт белән дәвам итте. Казан дәүләт консерваториясе студентларының да, Россия һәм Татарстанның халык артисткасы Венера Ганиеваның чыгышын да тамашачылар җылы кабул итте. Бәйрәм Салават Фәтхетдиновның әниләр турындагы җыры белән тәмамланды.