Җәлилдә яңа гимназия һәм дәваханә

Көзнең беренче салкыны Сарман районының Җәлил бистәсенә шатлыклы вакыйгалар алып килде. Кичә биредә тантаналы шартларда яңа стоматология дәваханәсе һәм 660 укучыга исәпләнгән гимназия сафка басты. Яңа объектларны ачуда "Бердәм Россия" сәяси партиясе Югары Советы рәистәше Минтимер Шәймиев, Татарстанның сәламәтлек саклау министры Камил Зыятдинов, мәгариф министры Фарис Харисов, Дәүләт Советы Рәисе урынбасары Марат Мәһдиев, "Татнефть" ААҖ генераль директоры Шәфәгат Тәхаутдинов һәм башка рәсми кешеләр катнашты.

Тантананы "Татнефть" акционерлык җәмгыяте генераль директоры ШәфәгатТәхаутдинов ачты.

Минтимер Шәймиев үзенең сүзен дәваханә ишегалдына җыелган халыкны ураза бәйрәме белән котлаудан башлады. Ул ун еллар элек Җәлил бистәсендәге социаль проблемаларның күп булганлыгын искә төшерде. Бүген нефтьчеләр бистәсендә шактый проблемалар хәл ителде, диде ул. Бу чорда биредә сәламәтлек саклау, мәгариф, мәдәният, спорт, элемтә объектлары сафка баскан. Нефтьчеләр бу проблемаларны хәл итүдә үзләреннән зур өлеш керткәннәр. Хәзер сезнең белән очрашуы да күңелле, үзеңне бәйрәмгә килгәндәй хис итәсең, дип нәтиҗә чыгарды М.Ш.Шәймиев, биредәге үзгәрешләрне күздән кичереп. Хәзер, чыннан да, Җәлил бистәсе халкы барлык яктан да тәэмин ителгән. Яңа ачылган биш катлы дәваханә бер сменага 160 кешене кабул итә ала. Аны "Татнефть" ААҖ заказы буенча Чаллының 26 нчы төзү-монтаж идарәсе җитештерү кооперативы төзүчеләре торгызган. Анда авыруларны 2 сменада 50 табиб һәм медицина хезмәткәре кабул итә.

Шифаханәгә керә торган болдырга бәйләнгән ал тасманы М.Ш.Шәймиев һәм Шәфәгат Тәхаутдинов кистеләр һәм халыкны эчкә үтәргә чакырдылар.

Сәламәтлек саклау министры Камил Зыятдинов дәваханәгә теш дәвалау комплекты бүләк итте.

Җәлил бистәсендә моңа кадәр бер мәктәп һәм бер татар гимназиясе эшләгән. Кичә ачылган өч катлы гимназиядә уку инглиз телен тирәнтен өйрәнүгә юнәлеш алырга тиеш.

"Бердәм Россия" сәяси партиясе Югары Советы рәистәше М.Ш.Шәймиев гимназия ишеген ачып кергәнчегә кадәр, гадәттәгечә, урамга җыелган ата-аналар, укытучылар, укучылар белән әңгәмәләр корды, аларның сорау һәм гозерләрен тыңлады. Алар алдында республиканың бүгенге сәяси һәм икътисадый хәле турында чыгыш ясады. РФ Дәүләт Думасына быелгы сайлауларның үзенчәлеген төшендерде. Бу үзенчәлек мәктәпнең тантаналы ачылышы вакытында да сизелде. Фойе стенасында Россия һәм Татарстан герблары куелган. Укучылар команда буенча башта Россия флагын, аннары Татарстан флагын марш атлап, тантаналы шартларда залга алып керделәр. Бер-бер артлы Россия һәм Татарстан гимннары яңгырады.

Яңа гимназияне ачу тантанасын Сарман районы хакимияте башлыгы Нәфис Закиров кереш сүз белән башлап җибәрде. Ул төзүчеләргә үзенең рәхмәт сүзләрен җиткерде. "Татнефть" ААҖ генераль директоры Шәфәгат Тәхаутдинов гимназия коллективына "Караоки" музыка үзәге бүләк итте.

М.Ш.Шәймиев, укучылар, укытучылар һәм ата-аналар алдында чыгыш ясап, бу гимназиянең быел тапшырылган уку йортының 29нчысы булуын хәбәр итте. Шул ук вакытта республикада 2500 дән артык мәктәпнең 200 енә капиталь ремонт, ә 50 сен яңадан төзергә кирәклегенә басым ясады. Мәктәпләр төзү буенча безнең республика Россиядә II урында тора. Шуңа күрә бездә укучыларга белем һәм тәрбия бирү өчен бөтен шартларда диярлек тудырылган. Мәгариф министры Фарис Харисов гимназиягә компьютер классы бүләк итте.

Көннең икенче яртысында Җәлил бистәсе мәдәният сараенда "Бердәм Россия" сәяси партиясе Югары Советы рәистәше Минтимер Шәймиев һәм РФ Дәүләт Думасында сайлаулар буенча 23 нче Әлмәт сайлау округыннан депутатлыкка кандидат, Татарстан Дәүләт Советы Рәисе урынбасары Марат Мәһдиев белән Әлмәт, Бөгелмә, Лениногорск, Баулы, Сарман һәм Ютазы районнары сайлаучыларының очрашуы булды. Анда М.Ш.Шәймиев һәм М.Ф.Мәһдиев чыгыш ясадылар.