Мөслимдә - яңа белем сарае

Кичә Мөслим районы үзәгендә 840 укучыга исәпләнгән өч катлы 3 нче урта гомумбелем мәктәбен ачу тантаналы шартларда узды. Аны ачуда "Бердәм Россия" партиясенең Югары Советы рәистәше Минтимер Шәймиев катнашты.

... Залга "Әлифба" китаплары күтәргән I класс укучылары уза. Алар һәм башка класс укучылары моңа кадәр Мөслимнең 1 нче һәм 2 нче мәктәпләрендә укыган Хәзер менә яңа микрорайондагы үзләренең торган урыннарына якын мәктәпкә йөреп укыячаклар.

Мөслим районы хакимияте башлыгы, Татарстан халык депутаты Ришат Хәбипов тантанага җыелган укучыларны, укытучыларны, ата-аналарны һәм төзүчеләрне яңа белем сарае ачылу белән чын күңелдән котлады, рәхмәт сүзләрен җиткерде. Аннан соң сүзне М.Ш.Шәймиев алды.

- Бу мәктәп сафка басу белән Мөслимдә икенче сменада уку бетерелде, - диде ул - Икенче сменада шөгыльләнүче 500 гә якын бала иртәнге якта укый башлады.

Мәктәп район үзәгенә нур чәчеп, матурлык бөркеп тора Мөслим матурлана. Бу тирәдә яши торган халыкның тәртибе дә һәр төбәккә үрнәк булырлык. Биредә укытучылар, мәгариф һәм мәдәният өлкәсендә булмасын, гаять зур оештыру эше башкаралар, безнең киләчәгебезне тәрбиялиләр.

Быел республикада яңа ачылган мәктәпләрнең 27 нчесе икән бу. Ел азагына кадәр тагын Сарманда һәм Тукай районында яңа мәктәпләр үз ишекләрен ачарга тиеш.

- Зур мәктәпләр сафка баскан икән, аларны буш тотарга ярамый. Районга күчеп килүчеләргә һәртөрле шартлар тудырырга, демографик хәлне уңай якка яхшыртырга кирәк, - дип дәвам итте М. Ш.Шәймиев.

Мөслимдә укытучылар коллективы көчле Олимпиадаларда җиңүчеләр, призлы урыннарны алучыларның күп булуы шул турыда сөйли. Мин сораштырган балаларның берсе дә, "өчле" билгесе алам, димәде. Монысы яхшы. Белем белән бергә тәрбия бирү ягын да онытырга ярамый. Хәзер заманалар үзгәрде, укучы алган белемен ирекле җәмгыятьтә файдалана белергә, сәясәт һәм икътисадны алып бара белергә тиеш.

М.Ш.Шәймиев 2007 елга кадәр хәл ителергә тиешле программа турында да искәртте. Бу вакыт эчендә һәр авыл мәктәбе, һәр йорттагы компьютер Интернет челтәренә тоташа алырга тиеш. Мөслимдә хәзер 28 укучыга 1 компьютер туры килә. Хәзергә әлеге бу программа - Россия Федерациясендә бердәнбер. Бу дөньяда иң алга киткән мәгариф системасы булачак. Ул шулай ук Түбән Камада нефть химиясе өлкәсендә өр-яңа проект өстендә эш алып барылуы турында да әйтте КамАЗ, аякка басып, республика икътисадына зур өлеш кертә. Авыл хуҗалыгы өлкәсендә бөртеклеләрнең тулай җыемы һәм уңышы буенча Татарстан Россиядә беренче урынга чыкты. Болар күпьеллык хезмәт нәтиҗәсе. Республикабызның бюджет өлкәсендә эшләүчеләрнең хезмәт хаклары башка төбәкләргә караганда югарырак.

Татарстан мәгариф министры Фарис Харисов укучыларны һәм укытучыларны яңа белем йортына аяк басулары белән чын күңелдән котлады. Яңа мәктәпләр төзү буенча Татарстан, Мәскәүдән кала, II урында бара.

Мөслим хуҗалыкара төзелеш оешмасы генераль директоры Илдар Авзалов мәктәпнең символик ачкычын аның директоры Рафаэль Демидовка тапшырды I класс укучысы Елена Ермолаева, директор абыйсы белән бергә кыңгырау шалтыратып, укучыларны һәм кунакларны эчкә узарга чакырды.

"Бердәм Россия" партиясенең Югары Советы рәистәше Минтимер Шәймиев, мәгариф министры Фарис Харисов, Мөслим районы хакимияте башлыгы Ришат Хәбипов, мәктәпкә керү юлына тартылган ал тасманы кисеп, укучыларны белем сараена керттеләр.

Мәктәпне ачу тантанасыннан соң "Бердәм Россия" партиясенең Югары Советы рәистәше Минтимер Шәймиев Мөслим район мәдәният йортында Мөслим, Актаныш, Минзәлә районнарыннан килгән сайлаучылар вәкилләре белән очрашты. Очрашуда Әлмәт сайлау округыннан Дәүләт Думасына депутатлыкка кандидат, ТР Дәүләт Советы Рәисе урынбасары Марат Мәһдиев тә катнашты