Заманча, сокланырлык

Заманча ташкалага әверелде Нурлат. Хәзер аны XX гасыр башында нигезләнгән, тимер юл станциясеннән үскән шәһәр дип әйтерлек тә түгел. Бүген ул ерак дәвернең хатирәсе булып тимер юл станциясе генә торып калган иде.

Инде күп чорларны кичергән ул ташпулатны да алыштырыр вакыт җитте. Нык искергән, заман таләпләренә ярарлык түгел иде шул ул. Бөтенроссия күләмендә әһәмиятле булган Куйбышев тимер юлында эре тимер юл узелына әйләнде ич Нурлат. Биредә көн саен егермеләп пассажир һәм йөк поездлары үтә. Шуңа күрә дә моннан өч ел элек, Нурлат районының 70 еллыгын бәйрәм иткән көннәрдә, яңа бинага нигез ташы салынды. Һәм, ниһаять, менә дигән мәһабәт сарай калкып та чыкты.

НУРЛАТта кичә яңа тимер юл станциясе бинасын файдалануга тапшыру тантанасына "Бердәм Россия" сәяси партиясенең Югары Советы рәистәше М.Шәймиев, "Россия тимер юллары" ачык акционерлык җәмгыяте президенты Г.Фадеев һәм башка кунаклар килде. Тантананы шәһәр һәм район хакимияте башлыгы Ф.Сибагатуллин ачып җибәрде. Ул, иң элек, бу бинаны корып биргән тимер юлчыларга рәхмәтен җиткерде.

"Россия тимер юллары" ачык акционерлык җәмгыяте президенты Г.Фадеев сүз алып:

- Быел гына да тимер юл хуҗалыгына 14 миллиард сум акча кертелде. Аның шактый өлеше Татарстанга туры килә, чөнки сезнең республика җитәкчеләре бу тармакка зур игътибар бирә. Әлеге бу мәһабәт бина да шул тырышлыкның дәлиле, - диде.

Аннан соң сүз "Бердәм Россия" сәяси партиясенең Югары Советы рәистәше М.Шәймиевкә бирелде. Ул, тантанада катнашучыларны тәбрик иткәннән соң, болай диде: "Россия тимер юл хуҗалыгы җитәкчелеге белән хезмәттәшлегебез нык. Соңгы берничә елда гына да республикабызда шундый 7 нче тимер юл станциясе тапшырабыз ич. Нурлатныкы аеруча әйбәт килеп чыккан. Инде тимер юлчылар бистәсен дә станциясенә лаек итеп яңартасы, торак йортларны күбрәк төзисе иде. Халкыбыз яхшы юлларда йөрергә, уңайлы йортларда яшәргә бик лаек".

Кәефләре бәйрәмчә иде тантанага килүче Нурлат кешеләренең. Һәм күпләре горурлык хисләре кичерми калмаганнардыр Чыннан да, мондый матур сарай белән станциядән үтәчәк пассажирлар алдында туган як өчен кызарырга туры килмәс.

Бу көнне "Бердәм Россия" сәяси партиясенең Югары Советы рәистәше М.Шәймиев, Нурлат мәдәният сараенда берничә район сайлаучылары вәкилләре белән очрашып, әлеге партиянең сайлау платформасы белән таныштырды, алда торган проблемаларны яктыртты, сорауларга җавап бирде.

ӘГЕРҖЕдәге яңартылган вокзалны ачу тантанасына "Бердәм Россия" партиясенең Югары Совет рәистәше Минтимер Шәймиев, Удмуртия Республикасы Президенты Александр Волков, "Россия тимер юллары" ачык акционерлык җәмгыяте президенты Геннадий Фадеев килде.

Тантана вокзал алды мәйданында башланды. Әгерҗе җирендә туып үскән күренекле драматург Таҗи Гыйззәт истәлеген мәңгеләштерү максатында монда бик күркәм һәйкәл салынган.

"Без Таҗи Гыйззәт әсәрләрен укып, сәхнәдә күреп үстек, шулар рухында тәрбияләндек", - дип М.Ш.Шәймиев әдипкә зур бәя бирде һәм халыкка вокзал алды мәйданына Таҗи Гыйззәт исеме биреләчәген белдерде.

Вокзал ачу тантанасын район хакимияте башлыгы Фәрит Габбасов башлап җибәрде.

- Бүген бик символик көн. Безнең район Татарстанның Көнчыгыш капкасы, - диде ул.

Геннадий Фадеев яңартылган Әгерҗе вокзалына зур бәя бирде.

- Казаннан кала икенче урында торучы вокзал бу. Бик матур, бик күркәм. Соңгы елларда Әгерҗе районында социаль-икътисадый үсешкә зур игътибар бирелә. Бу вокзал шуның бер мисалы. Районда проблемалар бар әле. Аларны хәл итәргә булышырбыз, - диде "Бердәм Россия" партиясе Югары Советы рәистәше Минтимер Шәймиев һәм сайлау алды кампаниясенә дә тукталды. - Хәзер зәңгәр экраннарда нинди генә вәгъдәләр ишетмисең. Булдыра алмастайны ышандырмаска кирәк. Без кулдан килгән эшләрне эшләргә генә вәгъдә бирәбез. Илебез, республикабыз халкының тормышын яхшырту өчен кулдан килгәннең барысын да эшләячәкбез, - диде ул.

Сәхнәгә тимер юл алдынгылары, төзүчеләр күтәрелде. Иң булдыклыларга истәлекле бүләкләр тапшырылды.

Тантаналар тәмамланганнан соң тимер юлны реформалаштыруда бергәләп эшләү турында Татарстан Республикасы белән "Россия тимер юллары" җәмгыяте арасындагы килешүгә кул куелды. Килешүгә ТР Премьер-министры Рөстәм Миңнеханов белән Геннадий Фадеев кул куйды.

Кул кую тантанасыннан соң кунаклар журналистлар сорауларына җавап бирде.

- Тимер юлдан башка илне тагын нәрсә берләштерә? - дип сорадылар журналистлар.
- "Бердәм Россия" партиясе, - дип җавап бирде Минтимер Шәймиев.