Дөнья тоткасы сезнең кулда

Кичә Татарстан Республикасы Президенты М. Ш. Шәймиев Кремльдә талантлы балалар белән очрашты. Президент республиканың төрле шәһәр һәм районнарыннан җыелган, инде фәннең, сәнгатьнең, спортның төрле өлкәләрендә үзләрен күрсәтергә өлгергән 70 укучыны кабул итте.

Очрашуда Президент Аппараты җитәкчесе Әгъзам Гобәйдуллин, вице-премьер Зилә Вәлиева, Дәүләт Советы Рәисе урынбасары Роберт Миңнуллин, министрлар, шәһәр һәм район хакимияте башлыклары, югары уку йортлары ректорлары, галимнәр катнашты.

Соңгы елларда Президент М. Шәймиев җитәкчелегендә республика җитәкчеләренең талантлы балалар белән очрашулары матур гадәткә кереп китте. Яңа уку елы башлангач, быелгы очрашуга да республиканың иң талантлы балалары сайлап алынды. Президент М. Ш. Шәймиев алар алдында чыгыш ясаганда.

- Безгә таныш булмаган дөньяның киләчәге сезнең кулларда, - диде - Сезнең бу җиңүегез ул ата-аналарыгыз, укытучы һәм тәрбиячеләрегезнең дә хезмәте кергән җиңү, шулай да бу барыннан да элек сезнең уңышыгыз, алга таба да җиңүләр яуларга кирәк. Шуны онытырга ярамый сезне әйләндереп алган мохиттә дә талантлы балалар күп Аларны да үз артыгыздан ияртеп китү турында уйланырга кирәк. Шул вакытта бездә республикабызны еракларда таныта алырдай талантлылар армиясе тагын да артыр.

Аннары Татарстан Президенты М. Ш. Шәймиев, республикада беренче мәртәбә Финляндия һәм Швеция мисалында "Идеяләр компаниясе" дип атала торган структур оешма төзелүе турында белдереп, талантлы укучыларны үзләренең идеяләре белән шунда катнашырга чакырды. Ул яңа идеяләр төгәл фәннәр, гуманитар юнәлешләр, спорт, мәдәният һәм сәнгать өлкәләре буенча да булырга мөмкин.

Татарстанда йөз меңләгән бала арасыннан талантлыларын табу, аларның теге яки бу юнәлештәге кызыксынуларын үстерү буенча "Татарстан балалары" - "Талантлы балалар" дигән махсус профамма тормышка ашырыла. Аерым фәннәрне тирәнтен өйрәнү 212 дәүләти лицей, гимназия һәм мәктәптә алып барыла. Аларда барлык укучыларның 18 проценты шөгыльләнә.

Предметлар буенча республика олимпиадаларының өченче этабында гына да өч мең укучы катнашты Аларда Менделеев, Кукмара, Әгерҗе районнары, Казан шәһәренең Мәскәү һәм Яңа Савин районнары, Чаллы шәһәре укучылары яхшы күрсәткечләргә ирештеләр.

Узган уку елында Татарстаннан 33 укучы Бөтенроссия олимпиадаларының йомгаклау этабында призлы урыннар алды. Химия, астрономия һәм галәм физикасы, экология буенча Халыкара олимпиадаларда безнең республика укучылары җиңүче булды.

Өстәмә белем бирү учреждениеләрендә шөгыльләнүче балалар һәм яшүсмерләрнең саны елдан-ел арта. Бүген республиканың 235 өстәмә белем бирү учреждениесендә балалар иҗатының 280 юнәлеше һәм спортның З6 төре буенча 356357 кеше шөгыльләнә. Аларның күбесе төрле дәрәҗәдәге ярышларда призлы урыннарга лаек булды.

Татарстан Президенты М. Ш. Шәймиев очрашуда катнашучы укучыларның күбесе белән аерым-аерым сөйләшеп чыкты. Аларның уңышлары турындагы хисапларын дикъкать белән тыңлады, аларга сораулар бирде. Укучылар да Президентка төрле сораулар бирделәр һәм һәркайсына аңлатмалы, тәфсилле җаваплар алуга ирештеләр.

Соңыннан укучылар Президент М. Ш. Шәймиев һәм республиканың башка җитәкчеләре белән бергә истәлеккә фотога төштеләр.