Горурлыгым син, гүзәл Татарстаным!

Бу көнне татар иле чын мәгънәсендә җырга-моңга күмелде. Басуларда кызу эш барса да, хезмәт сөючән игенчеләребез янына да барып җитте бу олуг бәйрәм тантанасы. Республикабызның барлык шәһәрләрендә, авылларында, халык яши торган һәр почмагында бердәм һәм тату Татарстан халкы Республика көнен һәм башкалабыз бәйрәмен төрлечә күңел ачу, уен-көлке, җыр-бию, хезмәт һәм спорт бәйгеләре белән билгеләп узды.

Бу көндә була торган бәйрәм тантаналарының иң колачлысы һәм эчтәлеклесе быел да Казанның Үзәк стадионында иде. Бер ай дәвамында башкалабызда Россия укучыларының I җәйге Спартакиадасында катнашучы меңләгән яшь спортчы өчен дә чын мәгънәсендә хәтерләрдә озак калучы бәйрәм бу. Россиянең һәр почмагыннан җыелып, I җәйге Спартакиаданың финал ярышларында катнашу хокукы алган яшүсмерләргә Татарстан Президенты М.Шәймиев зур уңышлар теләде.

Тантанада М. Шәймиев Россия Президенты В. Путинның Татарстан халкына бәйрәм котлавын ирештерде. "Бу бәйрәм, - диелә әлеге телеграммада, - Татарстанда яшәүче күп милләтле халыкларны берләштереп кенә калмый, ә киләчәктә дә үзара тату тормышның нигезе булып тора.

Татарстанның бүгенгесе Россиядә баручы демократик үзгәртеп корулар белән бәйле. Шуның уңай нәтиҗәсе буларак, республика бүген үзенең экономик, социаль һәм мәдәни казанышлары белән чын-чынлап горурлана ала.

Россия федерализмының бай мөмкинлекләрен эшкә җигеп, Татарстан халкы киләчәктә дә зур уңышларга ирешер дип ышанам", - диелә телеграммада.

М.Шәймиев бәйрәм тантанасына җыелучыларга Халыкара Олимпия комитетыннан Хуан Антонию Самаранч һәм Россия Хөкүмәте Рәисе урынбасары Галина Карелованың да котлавын җиткерде.

Россия Федерациясе Спорт дәүләт комитеты рәисе Вячеслав Фетисов татарстанлыларны һәм бәйрәм кунакларын олуг бәйрәм белән котлады.

- Әлеге спорт бәйгеләренең нәкъ менә Татарстан башкаласында уздырылуы очраклы түгел, - диде В.Фетисов. - Татарстан соңгы елларда үзенең спорт казанышлары белән дә Россиядә алдынгы урынны били.

В.Фетисов беренче өлешендә биш миллионнан артык укучы катнашкан, Россия укучыларының I җәйге Спартакиадасының финал бәйгеләрен оештыруда башлап йөрүчеләргә, ярышларда катнашучыларга һәм Спартакиада кунакларына Россия Президенты В.Путинның котлау телеграммасын җиткерде.

Чыннан да, Татарстанда сәламәт яшәү рәвешенә, халык арасында физик тәрбия һәм спортны үстерүгә игътибар арта. Бу, билгеле, иң беренче чиратта республика җитәкчелегенең физиктәрбия һәм спорт мәсьәләләренә көндәлек кайгыртучанлык күрсәтүеннән дә килә. Бәйрәм көнне дистәләгән "Газель" микроавтобусларының балалар һәм яшүсмерләр спорт мәктәпләренә бирелүе - шуның ачык мисалы булып тора.

Бәйрәм дәвамында Россия Федерациясе Спорт дәүләт комитеты рәисе В.Фетисов Татарстан Президенты М.Шәймиевкә махсус медаль һәм Премьер-министр Р.Миңнехановка "Россия Федерациясенең атказанган спорт мастеры" дигән мактаулы исем турында таныклык тапшырды.

31 августта Татарстанга алдагы көнне Республика көнен һәм Казан шәһәре көнен бәйрәм итүгә килгән дипломатик вәкиллекләре җитәкчеләре Казан вертолет заводында булдылар. Биредә алар Казан вертолет заводы продукциясе белән генә түгел, ә бәлки Татарстанның башка предприятиеләре җитештерә торган продукцияләр белән дә таныштылар.

"Безнең республика тагын да танылучан булып әвереләчәк, кунаклар бөтен мәгьлүмати материал алачак. Без аларның барлык сорауларына да җавап бирәчәкбез", - диде ТР Премьер-министры Рөстәм Миңнеханов, әлеге визитка аңлатма биреп. Ул Татар-Информ агентлыгы хәбәрчесе белән әңгәмәсендә, нәтиҗәдә әлеге илләр белән сәүдә әйләнешенеңартуын, мәдәният һәм башка төрле өлкәләрдә тагы да тыгызрак үзара файдалы багланышлар урнаштырылуын көтәргә мөмкин булачак, дип искәртте.

Казан вертолет заводы генераль директоры Александр Лаврентьев кунакларга заводта җитештерелә торган вертолетлар һәм яңа машиналар булдыру перспективалары турында сөйләде. Ул, аерым алганда, "Ми-38" вертолеты - аның беренче очышы якынча 40 көннән соң булачак - үзенең характеристикалары буенча чит илләрдә җитештерелә торган охшашларыннан калышмый, әмма аларга караганда, шактыйга очсызрак, дип искәртте. Яңа вертолетларга яңа авионика-интеграцияләнгән элемтә, навигация җиһазлары урнаштырылачак.

Казан вертолет заводы аеруча мөһим кешеләр, әйтик, Үзбәкстан, Казахстан, Вьетнам президентлары өчен вертолетлар ясый, диде Александр Лаврентьев. Россия Федерациясе Президенты өчен вертолет җитештерү планлаштырыла. Әлеге вертолет Президентны, Кутузов проспектында хәрәкәтне япмыйча, резиденциясеннән турыдан-туры Кремльгә китерү мөмкинлеге бирәчәк, дип хәбәр итте А.Лаврентьев. Ул хәзерге вакытта зур машиналарны икътисадый яктан файдалы булмаган урыннарда эшкә җикмәс өчен чагыштырмача аз пассажирлар һәм йөкләр сыйдыручы вертолетлар эшләү һәм җитештерү тенденциясе күзәтелә башлавына игътибарны юнәлтте.

Вертолет заводы территориясендә Татарстанның егермедән артыграк предприятиесе - "Татнефть" "Казанькомпрессормаш", "Тасма", "Электроприбор" һәм "Радиоприбор", Казан авиация җитештерү берләшмәсе һ.б. предприятиеләр үзләренең эшләнмәләре һәм экспозицияләре белән таныштырдылар. Дипломатларның хатыннары игътибарын Татарстанның Сәүдә-промышленность палатасы экспозициясендә куелган остакуллар продукциясе һәм күннән киемсалым, аяк киеме һәм һ.б. җитештерүче предприятиеләр продукциясе аеруча ныкҗәлеп итте.

Экспозицияләр белән танышканнан соң ТР сәүдә һәм икътисадый хезмәттәшлек министры Хафис Салихов Татарстанның сәүдә элемтәләре һәм аларны үстерү перспективалары турында сөйләде, ә "Татнефтехиминвест-холдинг" ААҖ генераль директоры Рафинат Яруллин сәнәгатьнең төп бюджет хасил итүче секторы булып торучы республиканың нефть-газ химиясе комплексының эше турында кыскача доклад ясады. Ул, әлеге комплекс, тулаем алганда, бөтен икътисадның тотрыклы һәм эзлекле үсешен билгели, дип искәртте.

Шуннан соң очу кырында"Ми-17" һәм "Ансат" вертолетларының күрсәтмә очышлары булды. "Ми-17" вертолетларыннан десант төшерелде һәм артта урнашкан аппарель буенча бер вертолеттан очу кырына джип автомобиле төшерелде. "Ансат" вертолеты күрсәтмә очышлар барышында һавада артка таба, ян-якка очу, һавага бик тиз күтәрелү осталыкларын күрсәтте. Күрсәтмә очышлар караучыларга, Россия һәм Канада белгечләре тарафыннан вертолетларны автоматлаштырылган идарә итү системасы булдырылды, ул билгеләнгән программа буенча очышны очучысыз гына, мөстәкыйль рәвештә башкаруга сәләтле, дип хәбәр ителде.

Дипломатик вәкиллекләр башлыклары 31 августта Мәскәүгә китте.

30 августта Г.Камал исемендәге Татар дәүләт академия театры янындагы мәйдан шәһәребезнең үзәк мәйданнарының берсенә әйләнде. Монда меңнәрчә казанлы һәм башкала кунаклары җыелган иде. Аның янындагы причалга Кабан күле буйлап кунаклар белән Татарстан Президенты Минтимер Шәймиев килгән кечкенә теплоход килеп туктады. Президент җыелган халыкны татар һәм рус телләрендә Республика һәм шәһәр көне белән котлады, Татарстанның ышанычлы рәвештә алга баруына зур өлеш керткәннәре, үзара аңлашып яшәүләре өчен рәхмәт белдерде.

М.Шәймиев шулай ук татарстанлыларга Россия Президенты, Россия төбәкләре җитәкчеләренең бәйрәм уңаеннан җибәргән котлауларын җиткерде. Ул тамашачыларга бәйрәмгә Татарстанга күп санлы илләрнең Россиядәге дипломатик вәкилләре килүен, моның исә безнең республикабызга һәм бәйрәмебезгә зур хөрмәт күрсәтү икәнлеген әйтеп узды.

Дипломатлар исеменнән Швеция Корольлегенең Россиядәге Гадәттән тыш һәм Вәкаләтле илчесе Хенрик Свен Хирдман чыгыш ясап, татарстанлыларны олуг бәйрәм белән котлады.

Россия Президентының Идел буе федераль округындагы Вәкиле Сергей Кириенко котлавын аның урынбасары Александр Быков җиткерде.

Аннары традиция буенча Татарстан Президенты 2003 ел лауреатлары – “La Primavera” оркестры җитәкчесе Рөстәм Абязовка һәм язучы Мөсәгыйт Хәбибуллинга Г.Тукай исемендәге дәүләт премияләре тапшырды.

Тантаналы митингта ТР Президенты Аппараты җитәкчесе Әгъзам Гобәйдуллин, Премьер-министр урынбасары Зилә Вәлиева катнашты.

Бер күңеллелек бөтен дөньяда, бар бер ямь бүген.
Нәрсәдән бу?- Мин беләм:бәйрәм бүген, бәйрәм бүген!
Урамга чыгуга, бөек шагыйребезнең шушы юллары ирексездән искә килеп төшә. Әйе, Казаныбызның кайсы гына җиренә барма, халык шау-гөр килеп Республика һәм шәһәр көнен бәйрәм итә. Әйтерсең, Г.Тукай үзенең "Бәйрәм бүген" дигән шигырен нәкъ шушы көнне күздә тотып язган.

Г.Камал исемендәге Татар дәүләт академия театры янындагы мәйдан да халык белән шыгрым тулы. Анда сәгать 10 да бәйрәм тамашасы Кормангазә исемендәге Казахстан дәүләт халык уен кораллары академия оркестры чыгышы белән башланып китте. Бу оркестр бер сәгать буе Казан халкына һәм бәйрәмгә махсус килгән шәһәребез кунакларына казах һәм татар моңнарын ирештерде.

Аннан соң мәйдандагы иге-чиге булмаган халык хозурына "Уйна, гармун!" дигән җыр һәм музыка халык фестивале тәкъдим ителде. Ул Татарстан дәүләт җыр һәм бию ансамбленең "Әй, гармун, гармун" дигән хореографик композициясе белән (баш балетмейстеры - Раилә Гарипова) башланып китте. Бу ансамбльнең мөмкинлекләрен бик яхшы беләбез. Аның егет һәм кызлары чыгышы утлы-ялкынлы, яшьлек дәрте белән сугарылган иде.

Шулай ук Татарстан дәүләт филармониясенең татар фольклор ансамбле дә (җитәкчесе - Айдар Фәйзрахманов) тамашачылар күңелен моңлы көй-җырларыбыз белән әсир итте. Чиләбе өлкәсеннән килгән кунагыбыз Альберт Шәяхмәтов халыкка шагыйрь Мөхәммәт Мирзаның шигырен бик матур итеп җиткерде. Ә Арча районының мәдәният йорты каршындагы "Арча егетләре" халык вокаль ансамбле (җитәкчесе - Марсель Фәйзрахманов) "Гөлләр үсә" дигән татар халык җырын искиткеч матур итеп башкарды. Хәер, монда чыгыш ясаучыларны санап чыгу мөмкин түгел, чөнки бу фестиваль өч сәгать буе барды бит! Шунысын гына әйтим, анда Буа, Чирмешән, Питрәч, Кукмара, Саба, Менделеев районнарының җырчылары, биючеләре, гармунчылары да халык күңеленә бик хуш килгән чыгышлар ясады. Хәтта Әстерхан шәһәре осталары да катнашты бу концертта!

Фестиваль бетүгә, мәйданда Виктор Деринг җитәкчелегендәге Татарстан дәүләт кинематография оркестры "Татарстан - яраткан төбәгем" дигән сәнгать осталары концертын башлап җибәрде. Шөкер, республикабыз чын талантларга, халкыбыз җырларын уелып-уелып тыңлата ала торган җырчыларга гаять бай. Бу концертта да халыкка аларның бик күбесен тыңлау бәхете татыды. Анда җырчыларыбыздан беренче булып Лидия Әхмәтова яшьлек дәрте белән әйләнә-бии берничә җыр җырлады. Аны җырчы Лидия Чугунова алыштырды. Җырчыларыбыз Равил Харисов, Фердинанд Сәлахов, Әлфия Авзалова, Газинур Фарукшин, Фердинанд Фәтхи һ.б. үзләренең җыр-моңнары белән тамашачы күңелен чын-чынлап яулады, көчле алкышларга лаек булдылар.

Рөстәм Үтәй җитәкчелегендәге Татарстан дәүләт телерадио, Рөстәм Абязов җитәкчелегендәге “La Primavera” оркестры чыгышлары да алкышларга күмелде.

15 сәгатьтә Г.Тукай һәйкәле янында (Г.Тукай мәйданы) "Бу юлларны сиңа багышлыйм, яраткан Казаным!" исеме астында башланып киткән шигырь бәйрәме дә күп халыкны җыйган иде. Аны ачып, Татарстан Язучылар берлеге рәисе, Татарстан Дәүләт Советы депутаты Фоат Галимуллин үзенең чыгышында:
- Шагыйрьләр дөньяга Аллаһы тарафыннан халыкка чын сүзне, хакыйкатьне җиткерү өчен яратыла, - диде.

Тамашачылар шагыйрьләрдән Лена Шагыйрьҗан, Мөдәррис Әгъләм, Флера Тарханова, Галимҗан Гыйльманов, Әхмәт Рәшит, Рәмис Әймәт, атаклы сүз остасы Айрат Арсланов һ.б. чыгышларын зур игътибар белән тыңладылар.

Әлбәттә, шигырь бәйрәме дә җырсыз-моңсыз булмады: Асаф Вәлиев, Айдар Фәйзрахманов, Искәндәр Биктаһиров, Римма Ибраһимова, Рабига Сибгатуллина, үзешчәннәрдән Талия Нәбиуллина, Земфира Гыйльметдинова һәм Казан Татар яшьләр театры артистлары җырлары тамашачы тарафыннан җылы кабул ителде. Баяннарда Кирам Сатиев белән Фәрит Хатипов уйнады. К.Сатиев халыкны кеп-кечкенә гармуннарда уйнап та сокландырды.

Ипподромда бәйрәм

Казан ипподромы Республика көнен бәйрәм итүдә төп ареналарның берсенә әйләнде. 30 августта көн урталарында бирегә Татарстан Республикасы Президенты Минтимер Шәймиев җитәкчелегендә югары дәрәҗәле кунаклар килде.

Ат спорты бәйрәменә Президент белән бергә Чиләбе өлкәсе губернаторы Петр Сумин, ТР Дәүләт Советы Рәисе Фәрит Мехәммәтшин, Казан шәһәре хакимияте башлыгы Камил Исхаков, РФ Тышкы эшләр министрлыгы делегациясе һәм дөньяның күпләгән иленнән дипломатик вәкиллекләр җитәкчеләре, чит илләр һәм Россиянең массакүләм мәгълүмат чаралары вәкилләре килде.

Ярышларда 200 гә якын ат катнашты. Тамашачыларның игътибарын "Татарстанның алтын дагасы" призына финал ярышлары аеруча нык җәлеп итте, бу ярышларда Россиянең иң көчле ат спорты осталары катнашты. Шуны искәртеп үтү мөһим: бүгенге көндә Россиядә "Алтын дага" дәрәҗәсендәге ат спорты ярышлары юк. Хәзер Казан ипподромы һәм республиканың башка,ат заводлары элита атларының Россиядә танылган ат заводларының иң яхшы юртаклары белән көндәшлек итә алуы күпләргә мәгълүм.

Финал ярышларында Фараон кушаматлы өч яшьлек айгырда, рекордлы вакыт күрсәтеп, Ярослав Лодрин җиңде.

Президент кубогына

30 августта "Биектау" автодромында автокросс буенча Татарстан Республикасы Президенты Кубогына VIII Халыкара ярышлар булды. Аларда Россиядән, Германия, Чехия, Латвия, Литва һәм башка илләрдән 74 спортчы катнашты. Ярышларны оештыручылар - Татарстанның автомотоспорт федерациясе, ТР Министрлар Кабинеты, Транспорт һәм юл хуҗалыгы министрлыгы, республиканың Биектау районы хакимияте, ТР Эчке эшләр министрлыгы ЮХИДИ идарәсенең Юл хәрәкәте иминлеге фонды, "Татспиртпром" дәүләт унитар предприятиесе филиалы һ.б.

Ярышларның халыкара төрләрендә - 1 дивизионда спортчылар тулы приводлы, двигатель күләме 1600 куб сантиметрдан зуррак булган автомобильләрдә, ЗА дивизионында "багги" классындагы, двигатель күләме 1600 куб сантиметрдан азрак булган автомобильләрдә катнашты. Моннан тыш узышчылар "ВАЗ - 2108" автомобильләрендә милли класста ярыштылар. ТР Дәүләт Советы Рәисе Ф.Мөхәммәтшин, ярышларны ачып, автомобиль узышларында катнашучыларны һәм күп санлы спорт сөючеләрне сәламләде. Ул, безнең күп кенә спортчылар, шул исәптән автоузышчылар да бөтен Россиянең горурлыгы булып тора, дип билгеләп үтте. Ф.Мөхәммәтшин татарстанлыларны һәм кунакларны Республика көне белән котлады.

"Биектау"да мактаулы кунаклар арасында алдагы көнне Казанга Россия I укучылар җәйге Спартакиадасының финал ярышларын ачу өчен Казанга килгән РФ Спорт дәүләт комитеты рәисе Вячеслав Фетисов та бар иде. Аның әйтүенчә, Татарстанда автомобиль спорты хаклы рәвештә спортның милли төре булып тора, аның белән республика җитәкчеләре дә шөгыльләнә.

Моны 1 дивизионда финал ярышларында ТР Премьер-министры Рөстәм Миңнеханов белән автокросс буенча күп тапкырлар Европа чемпионы булган Рольф Воланд арасында тизлек буенча үтә җитди көндәшлек раслады да. Р.Миңнеханов ярыш башыннан ук алга чыгып, ахырга кадәр диярлек алда барды. Әмма, шуңа да карамастан, кунак безнең спортчыны "Биектау" трассасының соңгы әйләнешендә артта калдырды. Нәтиҗәдә Рольф Воланд 1 дивизионда халыкара ярышлар чемпионының алтын медаленә һәм Татарстан Президенты кубогына лаек булды, ә Рөстәм Миңнеханов көмеш медаль яулады.

Р.Миңнеханов "Тимерхан" спорт клубы өчен үзебездә җитештерелгән "сигезле"дә чыгыш ясап, милли дивизионда да икенче урынны алды. Бу юлы "Сувар" спорт автоклубы узышчысы Эдуард Куприянов беренчелеккә чыкты. Ул узган елда да әлеге ярышлар чемпионы исеменә лаек булган иде. ЗА дивизионында ("багги" машиналарында) Германия автоузышчыпар командасының тагын бер вәкиле - Дэнис Энгель чемпион исемен яулады.

Ярышта катнашучыларның барысына да ТРның Мактау Грамоталары һәм кыйммәтле призлар тапшырылды. 1 һәм ЗА дивизионнарында ярышларда җиңүчеләргә, ТР Президенты кубогын яулаучыларга оештыручылар 5 әр мең евро тапшырды. Ә Эдуард Куприяновка өр-яңа "тугызлы" бүләк ителде.

Спартакиаданың дәрәҗәсе югары

30 августта Казанда ике тапкыр Олимпия чемпионы, РФ Спорт дәүләт комитеты рәисе Вячеслав Фетисов спорт сараенда Россия I укучылар җәйге Спартакиадасына багышланган матбугат конференциясе үткәрде.

Ул иң элек әлеге киң колачлы чараны әзерләүдә һәм үткәрүдә катнашуы өчен Татарстан Президенты Минтимер Шәймиевкә, республика Хөкүмәтенә рәхмәт белдерде. В.Фетисов әйтүенчә, Спартакиада - бик мөһим чара. Ул меңнәрчә малай-кызга иң югары дәрәҗәдә көч сынашу мөмкинлеге бирәчәк. «Яшь спортчылар - илнең алтын фонды, алар безне якын киләчәктә халыкара ярышларда сөендерәчәкләр», — диде Вячеслав Фетисов. Спорт дәүләт комитеты рәисе, Татарстанда илнең укучылар Спартакиадасы кебек киң колачлы чаралар үткәрү өчен кирәкле спорт инфраструктурасы бар, дип билгеләп үтте. Киләсе елда Кышкы Спартакиада үткәрүгә гаризаларның күп буласына ышанам, Россия I укучылар Спартакиадасының планкасы югары, дип йомгак ясады Вячеслав Фетисов.

Матбугат конференциясендә шулай ук ТР яшьләр эшләре һәм спорт министры Марат Бариев, РФ Спорт дәүләт комитеты рәисе урынбасары, Җиңел атлетика федерациясе президенты Валентин Балахничев, Россия Теннис федерациясе президенты, Дэвис кубогы хуҗасы Шамил Тарпищев, спортның биш төре буенча Олимпия чемпионы, Спартакиаданың баш судьясы Дмитрий Сватковский, ике тапкыр Олимпия чемпионы Юрий Лаптев, ике тапкыр Олимпия чемпионы, атказанган спорт мастеры, Россиянең фехтование буенча җыелма командалар җитәкчесе Эльгар Мамедов һ.б. катнашты.

Чаллыда тантаналар

Чаллы шәһәрендә Республика көне бик күркәм төстә үтте.

Биредә әлеге бәйрәм уңаеннан тантаналы чаралар шәһәр мәйданчыкларында 29 августта ук башланып, 30,-31 августта дәвам итте. Гомумшәһәр тантанасы "Яр буе" паркы мәйданында үтте.

Шоу 11.00 сәгатьтә "Изге җир" дигән театральләштерелгән тамаша белән ачылды. Тамашачылар артистларның күз явын алырлык киемнәрен һәм хореографиясен бик югары бәяләде. Чаллының иң зур предприятиеләренең хезмәт коллективлары вәкилләренең парады бәйрәмгә ямь өстенә ямь бирде. Парадны беренче сыйныф укучылары, мәктәпкәчә учреждениеләр, мәгариф идарәләре хезмәткәрләре башлады.

Сәүдә предприятиеләре ("Чаллы-икмәк", "Чаллы-суык", "Сөт", "Болгарсыра", "Элекам") вәкилләре, медиклар, транспортчылар (ПАК, ПАТП), төзүчеләр (КамГЭСэнергострой, "Расстал") һәм Чаллы кунаклары алдыннан тыгыз, тату колонналарда үтте. Бәйрәм кортежы ахырында люкс "Ока" - "пикап" машиналары һәм Россия ярышларында күп тапкырлар җиңгән "КамАЗ-мастер" узышчылар командасы үзләренең йөк машинасында барды. Парад вакытында тамашачыларга "Чаллы-суык" АҖ туңдырмалары өләшенде, ә аяз күктән, бөтерелә-бөтерелә, төрле төстәге конфеттилар "яуды".

Бәйрәмне шәһәр хакимияте башлыгы Илдар Халиков ачты. Ул чаллылыларны һәм "шәһәр кунакларын әлеге бәйрәм белән котлап, уңышлар һәм күтәренке кәеф теләде. И.Халиковның тәбрикләү сүзеннән соң Россия Федерациясе Федераль Җыены Дәүләт Думасы депутаты, "Россия төбәкләре" депутатлар төркеме җитәкчесе, "Бердәм Россия" сәяси партиясенең генераль Советы Президиумы әгъзасы О.Морозов һәм "КамАЗ" АҖ генераль директоры С.Когогин үзләренең изге теләкләрен җиткерде.

Шуннан соң шәһәр хакимияте башлыгы кунаклар белән торак төзелешендә яшь гаиләләргә ярдәм итү программасы кысаларында Чаллыда яшәүче 46 яшь гаиләгә яңа фатир ачкычларын тапшырды.

Бәйрәм программасы шәһәрнең иҗат һәм спорт коллективлары чыгышлары белән дәвам итте.

Нурлатта күңелле булды

Юк, бәйрәм, хөррият дигән булып башлары әйләнгәнче күңел ачу галәмәте күрмәдек без Нурлат урамнарында. Гадәти эш вакыты. Әнә, Нурлат бораулау эшләре предприятиесендә эшләүче күршем иртә таңнан вахтага кузгалды. Бүген-иртәгә планнары үтәлергә тора икән. "Мәҗлесне нефтьчеләр көненә калдырабыз инде", -дип елмая ул. Кәефе шәп, бәйрәм сөенечен шәхси хезмәте белән ныгыта.

Күңелләр күтәренкелеген ашлык кырларындагы хезмәт шавында да тоярга мөмкин иде. Синдряков исемендәге хуҗалык рәисе Вәгыйз Әбдрәхимов та: "Мондый матур, кояшлы көннәр без - игенчеләр өчен үзе бәйрәм ул, - ди. - Ходай үзе белеп биргәндер, рәхәтләнеп, сөенеп эшли торган көн", - дип тә өсти. һәм эшләп күрсәттеләр механизаторлар: нәкъ шушы көнне 108 гектардагы сабан бодаен суктырып алдылар! Алдынгы комбайнчы Александр Шувалов исә районда беренче булып 20 мең центнерлы чикне узды.

Хәер, Республика бәйрәмен әнә шундый зур казанышлар белән билгеләп үтүчеләр бер анда гына түгел иде. Элеватор янында "кызыл олаулар" аеруча күп булды. Лаборатория җитәкчесе Рәмзия Зарипова әйткәнчә, бәрәкәтле көндә кабул итү пунктына 3 мең тоннага якын бөртек кергән. Соңгы арада рекордлы күрсәткеч бу! Әнә шулай фидакарь хезмәт белән бизәлде бәйрәм.

Базарлы матак гөрләде

Татарстан халкы өчен иң зур бәйрәм булган Республика көне кыр эшләренең бик кызу чорына туры килгәнлектән, авыл хезмәтчәннәре аны шәһәрдәгечә киң колач белән билгеләп уза алмый, әлбәттә. Әмма 30 августта иртәдән үк башланган бәйрәм рухы белән кояшлы, ямьле көн бер-берсенә өстәмә бизәк булып, игенченең дә, терлекченең дә хезмәт дәртен тагын да үстерергә ярдәм итте.

Бәйрәм рухы һәр тарафтан сизелеп торды. Йортларны, учреждение, оешма биналарын бизәгән дәүләт әләмнәре, һавада яңгыраган дәртле музыка, гөрләп сату итүче ярминкә - барысы да халыкның күңелен үстереп, көне буена бәйрәм хакында искәртеп торды.

Ә кичен үзәк мәйданда район үзешчәннәре концерты булды. Концертны исә яшьләр дискотекасы алмаштырды.

Сүз дә юк, байтак кына әлкилеләр башкалабыз Казанда узучы олы бәйрәм тантаналарын, күңелле манзараларны анда барып карап та хозурландылар. Ә менә районның оста тальянчыларына, баянчыларына турыдан-туры "Уйнагыз, гармуннар!" бәйгеләрендә катнашу бәхете елмайды.

Зеленодол - талантларга бай шәһәр

Шәһәрнең үзәк урамы тиз арада җыен мәйданына охшап калды. "Родина" кинотеатры, Горький исемендәге мәдәният йорты янында һәм Җиңү мәйданында куелган сәхнәләрдә башланган концертлар халыкны үзенә тартты. Шунда ук күчмә кибетләр дә рәт-рәт булып тезелгән иде.

Сәләтлеләргә бай шәһәр ул Зеленодол. Дөресрәге, табигать биргән сәләтләрен ачарга мөмкинлекләр тудырылган анда. Җыр, бию, төрле спорт түгәрәкләре ишле биредә.

Сәнгать дөньясына аяк басарга өлгергәннәре җыр йә бию белән тамашачының күңелен ачты. Спорт белән шөгыльләнгәннәре үзләренең осталыкларын "Авангард" стадионында күрсәтте.

Кичке сәгать 6 да Горький исемендәге мәдәният йорты янындагы сәхнәгә Зеленодол районы һәм шәһәре хакимияте башлыгы Равил Зиннәтуллин менде. Ул халыкны Республика көне белән тәбрикләде. Хакимият башлыгы шулай ук кыскача гына район һәм шәһәрнең йкътисадый-социаль хәлен дә бәян итте.

Хәзерге вакытта районда иң мөһим эш - иген кырларында барган яңа уңыш өчен көрәш, дип белдерде ул. Авыл хезмәтчәннәре бу көннәрдә кырда һәм ындыр табакларында аеруча зур тырышлык куеп эшли.

Мөстәкыйльлек биргән Зеленодолда үзгәрешләр шактый. Шәһәр бер һәм ике катлы агач бараклардан тәмам арынып бетеп килә. Зеленодол. Президентыбызның "Тузган торакны бетерү" программасына таянып, бөтенләй яңарды. Хакимият башлыгының капиталь төзелеш буенча урынбасары Назыйф Фатыйхов әйтүенчә, шәһәр генә түгел, районның Васильево, Свияжск кебек бистәләрендә дә яңарыш зур. Анардагы 3-4 катлы матур йортлардан торган яңа микрорайоннар - әлеге программаны тормышка ашыру нәтиҗәсе. Кыскасы, бу олы бәйрәмдә горурланып сөйләрлек эшләре бар зеленодоллыларның.