Казанга ЮНЕСКО Бөтендөнья мирасы Комитеты әгъза-дәүләтләренең рәсми вәкилләре килде

Бүген Казанга ЮНЕСКО Бөтендөнья мирасы Комитететы әгъза-дәүләтләренең рәсми вәкилләре - 2012 елда 24 июннән 6 июльгә кадәр Санкт-Петербургта үткән Комитетның 36 нчы сессиясе катнашучылары килде.
Аларны "Казан" халыкара аэропортында ТР Дәүләт Киңәшчесе Минтимер Шәймиев каршы алды.
Делегацияне мәгариф, фән һәм мәдәният мәсьәләләре буенча БМО (ЮНЕСКО) каршындагы РФнең даими вәкиле, Бөтендөнья мирасы Комитеты рәисе Элеонора Митрофанова җитәкли.
Делегация составына Мәдәни кыйммәтләрне саклау һәм реставрацияләү буенча халыкара тикшерү үзәге генераль директоры Стефано де Каро, аның киңәшчесе Мунир Бушенаки, ЮНЕСКО эшләре буенча РФ Комиссиясенең җаваплы секретаре Григорий Орджоникидзе, ЮНЕСКО эшләре буенча РФ Комиссиясе каршындагы Бөтендөнья мәдәни һәм табигый мирас Россия милли комитеты рәисе, Һәйкәлләр һәм тарихи урыннар мәсьәләләре буенча халыкара советның (ИКОМОС) Россия милли комитеты президенты Игорь Маковецкий, Зимбабва, Йемен, Маврикия, Мексика, Швейцария, Эстония, Көньяк Африка Републикасы, Сербия һәм ЮНЕСКО Бөтендөнья мирасы Комитететының башка әгъза-дәүләтләре вәкилләре керә.
Татарстанда булган вакытта делегациянең программасында Кол Шәриф мәчетендә һәм Благовещенск соборында булып, Казан Кремле буенча экскурсия, борынгы шәһәр - Болгарга һәм Зөя шәһәр-утравына бару, ТРның Тарихи һәм мәдәни һәйкәлләрне торгызу республика фонды эшчәнлеге, ЮНЕСКОның Идел буе кафедрасы белән танышу, шулай ук "Бөтендөнья мәдәни һәм табигый мирасны саклау турында"гы 1972 елгы Конвенцияне куллану механизмнарын яхшырту мәсьәләләре буенча дискуссиядә катнашу каралган. Дискуссия бу көннәрдә Казанда үтә торган Бөтендөнья мирасы Комитетының Яшьләр моделе катнашучылары белән бергә уза.