Минтимер Шәймиев Милләтара һәм динара мөнәсәбәтләр буенча Татарстан Республикасы Президенты каршындагы Совет утырышында катнашты
Бүген Казан Кремлендә Милләтара һәм динара мөнәсәбәтләр буенча Татарстан Республикасы Президенты каршындагы Совет утырышы узды. Утырышны Татарстан Республикасы Президенты Рөстәм Миңнеханов алып барды. Чара республиканың барлык муниципаль районнары белән видеоконференцэлемтә режимында узды.
Утырышта ТР Дәүләт Киңәшчесе Минтимер Шәймиев, ТР Премьер-министры Алексей Песошин, Россия Президенты Эчке эшләр Идарәсенең Идел буе һәм Урал федераль округлары төбәкләре белән эш итү департаменты башлыгы Юрий Шевяков, ТР Дәүләт Советы рәисе урынбасары Юрий Камалтынов катнашты.
Утырыш үсеп килүче буынны патриотик һәм милли-мәдәни тәрбияләү темасына багышланды.
Рөстәм Миңнеханов чыгышында искәрткәнчә, бер ел элек Россия Федерациясе Указы белән 2025 елга кадәр РФндә дәүләт милли сәясәте стратегиясенә җитди үзгәрешләр кертелде.
Шул вакыт эчендә Татарстанда, билгеләнгән бурычлар һәм төбәк үзенчәлеген искә алып, зур эш башкарылды: Татарстан Республикасында дәүләт милли сәясәтен гамәлгә ашыру концепциясенең яңа редакциясе расланды, 2019-2021 елларда Стратегияне гамәлгә ашыру чаралары Планы расланды, дәүләт милли сәясәтен гамәлгә ашыру программасына үзгәрешләр әзерләнде.
Рөстәм Миңнеханов сүзләренчә, Стратегиядә балалар һәм яшьләрдә гражданнарының милли, рухи-әхлакый кыйммәтләренә хөрмәткә, Россиянең күп милләтле тарихы өчен горурлыкка, патриотлыкка нигезләнгән милләтара аралашу культурасын формалаштыру буенча мөһим бурыч актуальләштерелде.
“Төрле дәрәҗәдәге белем бирү оешмаларының, яшьләр оешмалары, яшүсмерләр клублары, милли-мәдәни, дини оешмаларның потенциалы гаять зур”, - диде ТР Президенты.
Утырышта ТР Премьер-министры урынбасары - мәгариф һәм фән министры Рафис Борһанов, яшьләр эшләре министры Дамир Фәттахов, Кукмара муниципаль районы башлыгы Сергей Дмитриев, Бөгелмәнең 14 нче гимназиясе директоры Фәнис Гайнуллин чыгыш ясады.
“Татарстан Республикасында удмуртларның милли-мәдәни автономиясе” иҗтимагый оешмасы эшчәнлеге турында башкарма директоры Марина Иванова сөйләде.
“Монда Россиянең күп милләтле, күп конфессияле халкының бер өлеше. Төрле милләт вәкилләре, шулай яшибез, эшлибез, мондый татулык шатландыра. Безнең өчен бу нормаль тормыш рәвеше. Бүген үсеп килүче буынның тәрбиясе, милләтара, динара мөнәсәбәтләр турында сөйләшәбез. Иң мөһиме – үсеп килүче буын бердәм, бер-берсен тыныч кына аңларлык халәттә, үзе дә сизмәстән күңеленә канәгатьлек алырлык булсын. Бу юка материя, моңа ирешү өчен вакыт та, акыл да, Россия Федерациясе дәүләт сәясәте дә кирәк”, - дип белдерде үзенең кыскача чыгышында Минтимер Шәймиев.