Минтимер Шәймиев «Мәскәү – Татарстан күпере» форумында катнашучыларга видеоэлемтә аша мөрәҗәгать итте
Татарстан Республикасы Дәүләт Киңәшчесе Минтимер Шәймиев бүген Мәскәүдә узган «Мәскәү – Татарстан күпере» VII яшьләр форумында катнашучыларга мөрәҗәгать итте.
Чарада Татарстан Республикасы Президенты Рөстәм Миңнеханов, Россия Хөкүмәте Рәисе урынбасары Марат Хөснуллин, Татарстан Республикасы вице-премьеры – Татарстан Республикасының Россия Федерациясендәге Тулы вәкаләтле вәкиле Равил Әхмәтшин, Яшьләр эшләре буенча федераль агентлык җитәкчесе урынбасары Дамир Фәттахов һәм башкалар катнашты.
«Мәскәү – Татарстан күпере» яшьләр форумы – төрле өлкәләрдә уңышлы спикерлар, шәхси тәҗрибәгә таянып, яшьләргә һөнәр сайлау һәм куелган максатларны тормышка ашыру буенча киңәшләр бирә торган мәйданчык. Форумда Татарстанның яшьләре – шулай ук илнең башка төбәкләреннән килгән Мәскәүдә белем алучы һәм эшләүче татарлар катнаша.
Минтимер Шәймиев үзенең видеомөрәҗәгатендә «Мәскәү – Татарстан күпере» буыннар арасында диалогны ныгытуда мөһим роль уйный, дип билгеләп үтте. «Мин Татарстан Президенты булган елларда да, хәзер дә мин егет-кызларның казанышларыннан хәбәрдар булырга тырышам. Татарлар турында гына түгел, безнең республика белән бәйле барлык кешеләр турында да. Сез бөтен дөнья буенча уңышларга ирешәсез, татар милләтен, күп милләтле Татарстаныбызны дөньяга танытасыз», - дип ассызыклады ул.
Ул шулай ук «Яңарыш» республика фонды эшчәнлеге турында сөйләде: «12 ел элек без «Яңарыш» республика фондын булдырдык, ул, арттырмыйча әйтәм, барыбызны да, республиканың күп милләтле халкын берләштерде. Бу еллар эчендә борынгы Болгар шәһәре, Свияжск утрау-шәһәре яңадан торгызылды, Болгар ислам академиясе төзелде һәм Казан Изге Ана иконасы соборы торгызылды. Казан Кремле, Болгар һәм Свияжск утрау-шәһәрчегенең Успенье соборы ЮНЕСКО Бөтендөнья мирасы исемлегенә кертелде. Хәйриячелекнең көчле хәрәкәте җәелдерелде, анда яшьләр дә актив катнашты.
Хәзерге вакытта без Татарстанда «Адымнар – белемгә һәм татулыкка юл» күп телле комплекслар булдырабыз, аларда рус, татар һәм инглиз телләрендә белем алалар. Мин аларны киләчәк мәктәбе моделен булдыру юлында маяклар дип атыйм, аның төп бурычы, белемнән тыш, яшьләрне милләтара һәм диниара татулык рухында тәрбияләү», - диде ул.
Минтимер Шәймиев шулай ук билгеләп үткәнчә: «Россия Федерациясе – киңлек һәм потенциал буенча дөньяда иң зур ил, ул һәрвакыт үзенә җәлеп итә. Шуңа күрә без горурланып әйтәбез: ул көчле, үз җирен, үз халкын, гореф-гадәтләребезне һәм кыйммәтләрен якларга сәләтле булырга тиеш. Россиянең көчсез булырга хокукы юк. Көчле Россия, кадерле балалар, бу – безнең уртак максат. Билгеле булганча, без вакытны сайламыйбыз, ә вакыт безне сайлый. Үземне күпме хәтерлим, ил үсешенең барлык этапларында да тормыш безне бер генә тапкыр ныклыкка сынамады. Катлаулы заманнарда безгә барыбызга да түземлек, сабырлык һәм үз көчебезгә ышаныч кирәк. Сүз дә юк, бүген яшьләргә дә җиңел түгел, чөнки ул, һәрвакыттагыча, безнең җәмгыять авангардында. Энергия, ихтыяр, яшьләр инициативасы, сезнең киләчәккә омтылуыгыз – күбесенчә безнең ил уңышының нигезе булып тора».
Ул яшьләргә даими эшләргә һәм хәрәкәт итәргә киңәш итте. «Хәрәкәттә – бәрәкәт, ди халык мәкале. эзләргә, Җиңелрәкне эзлисе түгел! Авырлыклар чыныктыра, ихтыяр көчен ныгыта һәм үз мөмкинлекләрен күрсәтергә мәҗбүр итә. Шул ук вакытта фикерли белергә дә киңәш итәм. Белемгә омтылган кеше уңышка ирешәчәк укырга һәм өйрәнергә. Мөхәммәд галәйһи сәлләм әйткәнчә, «Бишектән ләхеткә хәтле гыйлем алырга». Өстәвенә, чын китаплар укырга. Бәлки, безнең компьютер гасырында бу бераз сәер яңгырый. Әмма кулдагы китап – тирә-юньдәге ыгы-зыгыдан арынырга һәм бөтен игътибарны кирәк җиреңә юнәлтергә мөмкинлек бирүче халәт. Һәм, мөмкин булганча, классикага игътибар итәргә кирәк. Беренче чиратта, туган әдәбият классигыннан, Габдулла Тукайдан башлыйк», - диде Минтимер Шәймиев.
Минтимер Шәймиев яшьләргә «сезгә тормышта уңыш һәм акча китерә торган түгел, ә хезмәтегез, талантыгыз һәм гамәлләрегез кешеләргә файда китерә торган юлны табуларын» теләде. «Ышанам ки, бу кеше кичерә алырлык иң матур хис», – дип ассызыклады ул.