Рөстәм Миңнеханов һәм Минтимер Шәймиев Изге Болгар җыенында чыгыш ясадылар
Бүген борынгы Болгар шәһәре территориясендә традицион «Изге Болгар җыены» узды. Быел бәйрәм Идел буе Болгар дәүләтендә Ислам динен кабул итүгә 1100 ел тулуга багышланган иде. Тантанада Татарстан Президенты Рөстәм Миңнеханов, ТР Дәүләт Киңәшчесе Минтимер Шәймиев, ТР Дәүләт Советы Рәисе Фәрит Мөхәммәтшин, ТР вице-премьеры, Бөтендөнья татар конгрессы Милли Шурасы рәисе Васил Шәйхеразыев, төрле дин әһелләре катнашты.
Рөстәм Миңнеханов ассызыклаганча, 1100 ел – Татарстан Республикасы өчен дә, Россия һәм бөтен дөнья мөселманнары өчен дә әһәмиятле вакыйга. Ул билгеләп үткәнчә, Россия Президенты карары белән юбилей датасы дәүләт дәрәҗәсендә киң билгеләп үтелә. Бу көннәрдә Казанда зур чаралар планлаштырылган.
Татарстан Президенты Россиянең Баш мөфтие Тәлгать Таҗетдинне билгеләп үтте, ул беренчеләрдән булып Болгарның изге җирендә ел саен үткәрелә торган Мөселманнар җыеннары идеясен үстерә башлады. Рөстәм Миңнеханов Минтимер Шәймиевкә һәм «Яңарыш» фондына Ислам изге урыннарын торгызу буенча зур эшләре өчен рәхмәт белдерде.
«Болар барысы да Татарстан, Россия мөселманнарына, кунакларга 1100 ел элек дәүләт дәрәҗәсендә ата-бабаларыбызның Ислам динен кабул итүен күрергә мөмкинлек бирде. Мин һәрберегезгә рәхмәт белдерәсем килә. Сезнең бүген безнең белән булуыгыз безнең өчен зур шатлык. Бу безнең изге урыныбызның имиджын күтәрә», - дип мөрәҗәгать итте Рөстәм Миңнеханов кунакларга.
Аннары кунакларга Россия Президенты Владимир Путин, Россия Премьер-министры Михаил Мишустин һәм Төркия Президенты Рәҗәп Тайип Эрдоган исеменнән Идел буе Болгар дәүләтендә Ислам динен кабул итүгә 1100 ел тулу уңаеннан котлау телеграммаларын укыдылар.
Минтимер Шәймиев билгеләп үткәнчә, 2014 елда Болгар тарих-археология комплексы ЮНЕСКО Бөтендөнья мирасы исемлегенә кертелде. Бөтен дөнья экспертлары Болгарның иң төньяк территорияләрдә Ислам динен ирекле кабул итү урыны булуын таныды. «Бу – безнең уртак уңышыбыз, уртак эшебезнең лаеклы нәтиҗәсе. Бу эштә катнашкан һәркемгә рәхмәт. Борынгы Болгар шәһәрен торгызу безнең тарихи мирасыбызны саклаган халык булуын күрсәтте», - дип ассызыклады Дәүләт Киңәшчесе.
Шулай ук Россия мөселманнарының Үзәк диния нәзарәте рәисе, Россия югары мөфтие Тәлгать Таҗетдин, Россия мөселманнарының Диния нәзарәте башлыгы Равил Гайнетдин, Россия мөселманнарының Диния нәзарәте рәисе Альберт Крганов, Төньяк Кавказ мөселманнарының Координация үзәге рәисе Исмәгыйль хаҗи Бердиев, Татарстан мөфтие, ТР Диния нәзарәте рәисе Камил Сәмигуллин һәм Казан һәм Татарстан митрополиты Кирилл кунакларны 1100 еллык юбилей белән котлады.
Аннары Рөстәм Миңнеханов, Минтимер Шәймиев һәм башка мөхтәрәм кунаклар Җәмигъ мәйданында узган күмәк өйлә намазында катнаштылар.