Минтимер Шәймиев «Ел җитәкчесе» конкурсы лауреатларын бүләкләү тантанасында җитәкче-хәйриячеләргә бүләкләр тапшырды
Бүген Казанның «Корстон» КСККда «Ел җитәкчесе-2023» республика иҗтимагый конкурсы лауреатларын бүләкләү тантанасы узды.
Тантанада Татарстан Президенты Рөстәм Миңнеханов, Татарстан Республикасы Дәүләт Киңәшчесе Минтимер Шәймиев һәм Татарстан Премьер-министры Алексей Песошин катнашты.
Тантанада шулай ук Татарстаннан РФ Федераль Собраниесе Дәүләт Думасы һәм Федерация Советы депутатлары, Татарстан Республикасы Дәүләт Советы депутатлары, ТР Рәисе һәм ТР Министрлар Кабинеты администрацияләренең җаваплы хезмәткәрләре, республика министрлыклары һәм ведомстволары җитәкчеләре, директорлар корпусы ветераннары, ММЧ вәкилләре катнашты.
Тантана башында узган елның төп икътисадый нәтиҗәләре һәм вакыйгалары турында фильм күрсәтелде.
Очрашуда Татарстан Республикасы Рәисе Рөстәм Миңнеханов катнашты. Ул кыскача 2023 елга йомгак ясады, 2024 елга төп бурычларны билгеләде, республиканың директорлар корпусының социаль-икътисадый үсеш мәсьәләләрен хәл итүгә керткән өлешен билгеләп үтте һәм, эшләрендә уңышлар, сәламәтлек, гаилә иминлеге теләп, барысын да Яңа ел белән котлады.
Рөстәм Миңнеханов иң лаеклы татарстанлыларга Россия Федерациясе һәм Татарстан Республикасы дәүләт бүләкләрен тапшырды.
Шулай ук Татарстан Премьер-министры Алексей Песошин чыгыш да ясады.
Татарстан Республикасы Дәүләт Киңәшчесе, «Яңарыш» республика фондының Попечительләр советы рәисе Минтимер Шәймиев Фонд эшчәнлеге кысаларында чараларны гамәлгә ашыруга зур өлеш керткән Татарстан предприятиеләре җитәкчеләренә «Яңарыш» республика фондының Рәхмәт хатларын һәм Хәйриячеләр китабының XIIXIII томын тапшырды.
"Менә инде 23 ел рәттән без елына бер тапкыр предприятие җитәкчеләренең уңышларын билгеләп үтәбез. Һәрвакыт бүләкләрлек лаеклы кешеләр бар. Бу инде безнең тормыш кагыйдәсенә әверелде. Бу безнең зур байлыгыбыз. Хәзер Россия киңлегендә һәм чит илләрдә Татарстанның уңышлары турында ешрак сөйлиләр. Соңгы елларда чикләүләр күп булды, шул исәптән тышкы киңлекләрдән дә, ләкин без үз халкыбыз өчен лаеклы шартлар булдыра алдык. Ахыр чиктә, бу – безнең бөтен еллар дәвамында башкарган гомуми хезмәтебез нәтиҗәсе. Без җитәкчеләргә зур көндәлек хезмәтләре өчен чын күңелдән рәхмәт белдерәбез. Һәм җитештерүне оештыру өчен генә түгел, бу, әлбәттә, илебезнең технологик суверенитетын булдыру шартларында бик мөһим. Әмма шунысы да мөһим: кешеләр безнең җитәкчеләргә иярәләр һәм бергәләп катлаулы мәсьәләләрне хәл итәләр», - дип билгеләп үтте Минтимер Шәймиев үз чыгышында.
Быел «Яңарыш» фонды бүләгенә «Пакер» фәнни-җитештерү фондының генераль директоры Марат Нагуманов, «Сетевая компания» АҖ генераль директоры Илшат Фәрдиев, «Чистай автодоры» ҖЧҖ генераль директоры Эльвира Рәхмәтуллина, «Гамәли оптика дәүләт институты» фәнни-җитештерү җәмгыяте генераль директоры Владимир Иванов, ТР Һөнәр берлекләре федерациясе рәисе Елена Кузьмичева, «Казан моторлар төзү җитештерү берләшмәсе» АҖ генераль директоры Дамир Кәримуллин, «ПОЗИС» АҖ генераль директоры Радик Хәсәнов, "Алабуга автомобиль заводы җитештерү берләшмәсе" АҖ генераль директоры урынбасары Эльмира Гайфуллина лаек булды.