Казанда Александр Пушкин һәйкәленә чәчәкләр салу тантанасы узды
Бүген бөтен республика буенча Рус теле көненә һәм бөек рус шагыйре, хәзерге рус әдәби теленә нигез салучы Александр Пушкинның тууына 225 ел тулуга багышланган тантаналы чаралар уза.
Казанда иртән Муса Җәлил исемендәге Опера һәм балет театры янында Татарстан Республикасы Дәүләт Киңәшчесе Минтимер Шәймиев һәм Дәүләт Советы Рәисе Фәрит Мөхәммәтшин шагыйрь һәйкәленә чәчәкләр салдылар.
Татарстан Республикасы Дәүләт Киңәшчесе Минтимер Шәймиев барысын да Рус теле көне һәм Александр Пушкинның тууына 225 ел тулу белән котлады. Ул ассызыклаганча, бүгенге тантанада төрле буын вәкилләре катнаша, ата-аналар балалары белән килгән. Минтимер Шәймиев җыелганнарга татар әдәбияты классигы Габдулла Тукайның сүзләрен искә төшерде, ул рус шагыйре турында югары һәм хөрмәт белән сөйләгән, аның иҗатына якынрак килергә омтылган. Пушкин белән Лермонтовтан үрнәк алам. Торган саен югарыга үрли барам», - дип язган Габдулла Тукай. "Бу иҗатчылар, күпмилләтле халкыбызның бөек уллары турында истәлекне мәңгеләштерү өчен без барысын да эшләргә тиешбез", - дип нәтиҗә ясады Минтимер Шәймиев.
"Тарихи, истәлекле көн барыбызны да бүген бөек шагыйрь һәм фикер иясе Александр Пушкин һәйкәле янына җыйды, - диде Фәрит Мөхәммәтшин, чарада катнашучыларга мөрәҗәгать итеп, - Һәр халыкның шундый күренекле шәхесләре бар, һәм безнең бурыч – аларның бөек мирасын, фикерләрен һәм өметләрен белү, истә тоту һәм буыннан-буынга тапшыру. Аларга "халык сукмагы өзелмәсен".
Бүген Татарстан Республикасы Премьер-министры урынбасары Ләйлә Фазлыева, Дәүләт Думасы депутатлары Татьяна Ларионова һәм Илдар Гыйльметдинов, Дәүләт Советы депутаты, Татарстан Республикасы Язучылар берлеге рәисе Ркаил Зәйдулла, профильле министрлыклар һәм ведомстволар җитәкчеләре, республиканың иҗади интеллигенциясе һәм киң җәмәгатьчелек вәкилләре бөек рус шагыйре һәйкәленә чәчәкләр салдылар. Чәчәкләр салу тантанасы, бөек шагыйрь әсәрләрен башкарып, әдәби-музыкаль композиция белән дәвам итте.