Минтимер Шәймиев "Татарстан - яңа гасыр" иҗтимагый хәрәкәтенең 25 еллыгы уңаеннан уздырылган чарада катнашты

Бүген Казанда «Татарстан – новый век» – «Татарстан – яңа гасыр» республика иҗтимагый хәрәкәте оешуга 25 ел тулуга багышлап хәрәкәтнең Югары советы утырышы узды. Утырышта Татарстан Республикасы Дәүләт Киңәшчесе Минтимер Шәймиев һәм ТР Дәүләт Советы Рәисе, «ТНВ» РИХ Югары Советы Рәисе Фәрит Мөхәммәтшин катнашты.

ТР Рәисе Администрациясе җитәкчесе урынбасары - Эчке сәясәт мәсьәләләре департаменты җитәкчесе Руслан Мөхәрләмов ТР Рәисе сәламләвен укыды. Рөстәм Миңнеханов билгеләп үткәнчә, ТЯГ, меңләгән кешеләрне үз эченә алган хәрәкәт буларак, республикада иң эресе булды һәм лаеклы абруй казанды.

Фәрит Мөхәммәтшин, үз чиратында, Татарстанның беренче Президенты Минтимер Шәймиев инициативасы белән оештырылган хәрәкәтнең республикада гражданлык җәмгыяте төзү башлангычында торуын, татарстанлыларның законлы мәнфәгатьләрен яклауга зур өлеш кертүен һәм чирек гасырлык эшчәнлегендә Татарстанның иң актив иҗтимагый көчләренең берсенә әверелүен ассызыклады.

Бүген «Татарстан – новый век» - "Татарстан – яңа гасыр" республика иҗтимагый хәрәкәте үз сафларында 100 меңнән артык татарстанлыны берләштерә. "Без уникаль ресурс потенциалын тупладык, бурычларны ышанычлы хәл итәргә һәм куелган максатларга ирешергә мөмкинлек бирүче эш стилен эшләдек, - дип билгеләп үтте Фәрит Мөхәммәтшин. - Бу елларда төп хәрәкәт чын иҗтимагый көчкә, республикада социаль, икътисадый һәм милләтара тотрыклылыкның көчле таянычына, республиканың актив битараф булмаган халкын җәлеп итү үзәгенә әверелде.

Республика Дәүләт Киңәшчесе Минтимер Шәймиев ассызыклаганча, «Татарстан – яңа гасыр» иҗтимагый хәрәкәтенең исеме күп нәрсәләр турында сөйли, республиканы алга таба үсешкә этәрә. "Без бу югары өметләрне үз өстебезгә алдык. Сайлавыбыз дөрес булды. Алга таба эшләргә кирәк. Татарстан артта калырга күнекмәгән», - диде ул.

Шулай ук утырышта республиканың фәнни-технологик үсеше дәүләт программасын гамәлгә ашыру мәсьәләләре турында фикер алыштылар. "Әлеге тематика санкцияләр басымы шартларында технологик суверенитетка ирешүгә юнәлдерелгән гомуммилли һәм төбәк көн тәртибенә табигый рәвештә үрелеп бара", - дип ассызыклады Фәрит Мөхәммәтшин.

"Республиканың фәнни потенциалы яхшы, сәнәгате үсеш алган, икътисадый куәтләре бар. Бу базада төзергә дә була һәм төзергә дә кирәк», - дип өстәде Минтимер Шәймиев.

Утырыш ахырында иҗтимагый хәрәкәт активистларына берничә бүләк тапшырылды.