Минтимер Шәймиев:”Чыңгыз Айтматов – ул күренеш, аның әсәрләрендә – дөнья фәлсәфәсе, аның иҗаты – дөнья мирасы”

Бүген Татарстан Республикасы Дәүләт Киңәшчесе Минтимер Шәймиев Кыргызстан Республикасы мәдәният, мәгълүмат һәм туризм министры Солтан Раев, Кыргызстан Республикасының Россиядәге Гадәттән тыш һәм тулы вәкаләтле илчесе Болот Джунусов, Чыңгыз Айтматовның сеңлесе - Роза Айтматова, кинорежиссер, сценарист Болот Шамшиев һәм Кыргызстан Республикасы делегациясенең башка әгъзалары белән очрашты.

Делегация Казанга язучы Чыңгыз Айтматовның 85 яшьлегенә багышланган чаралар кысасында килде. Кунаклар Чыңгыз Айтматовның юбилеена багышланган фәнни-гамәли конференциядә, Татарстанның Халыклар дуслыгы йортында кыргыз фоторәссамнарының “Чыңгыз Айтматов дөньясы” күргәзмәсе ачылуда, “Халыкның рухи терәге” исемле китап күргәзмәсе ачылуда, ТР Милли китапханәсендә “Чыңгыз Айтматов повестьләре” китабын тәкъдир итүдә һәм башка чараларда катнашачаклар. Шулай ук борынгы Болгар шәһәренә бару планлаштырыла.

“Без Мәскәүдә башланган Чыңгыз Айтматовның 85 яшьлегенә багышланган чараның Казанда дәвам итүенә бик шатбыз һәм горурланабыз”,-дип белдерде Минтимер Шәймиев. Аның фикеренчә, Чыңгыз Айтматов тормыш фәлсәфәсен бай рухи-әхлакый традицияләр, төрки халыкларның милли гадәтләре аша аңлый, шуның белән аларның киләчәк буынга тапшырасы зур потенциалын күрсәтә.

Роза Айтматова Чыңгыз Айтматовның исемен мәңгеләштерү өчен башкарыла торган эшләре турында сөйләде, аерым алганда, Шекер авылында язучы туып- үскән йортны, шулай ук авыл янындагы Маймак тимер юл полустанкасын яңадан торгызу хакында. Ул Минтимер Шәймиевкә, әтисе Торекул Айтматовка багышланган - “Белые страницы истории” китабын бүләк итте.

Солтан Раев хәбәр иткәнчә, быелгы елның 14 ноябрендә Бишкәктә Чыңгыз Айтматовка багышланган Халыкара форум булачак.

“Чыңгыз Айтматов – ул күренеш, аның әсәрләрендә – дөнья фәлсәфәсе. Шуңа алар һәрвакыт актуаль. Аның иҗаты – зур байлык, аны дөнья мирасы дәрәҗәсенә күтәрергә кирәк. Моны уртак тырышлык белән эшләргә кирәк һәм без бу юнәлештә хезмәттәшлек итәргә әзербез”,-дип йомгаклады Минтимер Шәймиев.