Минтимер Шәймиев «Теләкләр чыршысы» бөтенроссия хәйрия гамәле кысаларында балаларның теләкләрен үтәде

Татарстан Республикасы Дәүләт Киңәшчесе Минтимер Шәймиев "Теләкләр чыршысы" бөтенроссия хәйрия гамәле кысаларында Биектаудан апалы-сеңелле Полина һәм Мирослава Якушевич һәм Казаннан Арсений Корниловның теләкләрен үтәде.

Аларның теләкләре язылган открыткаларны Минтимер Шәймиев «Теләкләр чыршысы»ннан гыйнвар башында алган иде.

13 яшьлек Мирослава Якушевич бүләк-сюрприз алырга теләгән. Минтимер Шәймиев аңа күп функцияле җайланма-принтер тапшырды. 16 яшьлек Полина Якушевичка ТР Дәүләт Киңәшчесе ул хыялланган винил проигрыватель бүләк итте.

Кызларның әтиләре махсус хәрби операциядә катнаша.

Бүләкләрне ТР Дәүләт Киңәшчесе ярдәмчесе Евгений Гришин тапшырды.

Артист булырга хыялланган 7 яшьлек Арсений театр сәхнәсе артында булырга теләгән. Бүген Арсений һәм аның әнисе Елена Вячеславовна «Әкият» татар дәүләт академия курчак театрында булдылар. Арсений Корнилов Минтимер Шәймиевтан бүләккә театраль костюм – эшләпә һәм канатлы япма алды.

Бүләкне ТР Дәүләт Киңәшчесе ярдәмчесе Нурсөя Шәйдуллина тапшырды.

Театрның сәнгать җитәкчесе Илгиз Зәйниев һәм театр музее мөдире Константин Карпеев Арсений өчен театрның сәхнә арты буйлап экскурсия үткәрделәр. Малай искиткеч курчакларны - спектакль геройларын күрде, курчакларның хәрәкәт механикасын өйрәнде һәм үзе дә курчак театры артисты ролендә булды. Арсений шулай ук бутафор цехында булды, анда аңа курчаклар ясау процессын күрсәттеләр.

«Әкият» курчак театры буйлап экскурсиясе тәмамлангач, Арсений «Алиса могҗизалары иле» спектаклен карады.