Минтимер Шәймиев Россиянең Иҗтимагый телевидениесе советы утырышында катнашты

Бүген Мәскәүдә Татарстан Республикасы Дәүләт киңәшчесе Минтимер Шәймиев Россиянең Иҗтимагый телевидениесе советының чираттагы утырышында катнашты, ул беренче эшчәнлек елы нәтиҗәләренә багышланган иде.
Искә төшерәбез, Минтимер Шәймиев Иҗтимагый телевидениесе советы әгъзасы булып тора.

Россиянең Иҗтимагый телевидениесе 2013 елның 19 маенда эшли башлады. Беренче эшчәнлек елы нәтиҗәләре турында каналның генераль директоры, Халыкара радио һәм телевидение академиясе президенты Анатолий Лысенко доклад ясады.

Аннан соң, Совет әгъзалары каналның эшчәнлеге турындагы фикер алыштылыр. Финанслау ягыннан хәл катлаулы булуга карамастан, Россиянең Иҗтимагый телевидениесе эшчәнлеге тулысынча уңай бәяләнде. Каналның икътисад, ТКХ, сәясәт, мәдәният, мәгариф һәм фән өлкәсендәге проблемаларны күтәрергә омтылуы билгеләп үтелде.

Утырышта катнашучылар каналның тагын бер үзенчәлекле ягына игътибар иттеләр, аның программаларында Россиянең иң ерактагы һәм иң кечкенә авыл һәм шәһәрләре турында да мәгълүматлар күренә. Кешеләргә шулай ук илнең тарихы, тарихи вакыйгалар һәм шәхесләр турындагы тапшырулар да ошый.

Утырыштан соң, Минтимер Шәймиев: “Бер ел элек кайбер тәнкыйтьчеләрнең, реклама булмау һәм финанс проблемалары булу сәбәпле, канал тиз ябылачак диюләренә карамастан, Россиянең Иҗтимагый телевидениесе яши һәм бу этапта реклама җәлеп итү белән шөгыльләнмичә дә, үзенең үсеш концепциясен дәвам итәчәк”, - дип хәбәр итте.
Ул шулай ук, Совет әгъзалары төп игътибарны, Иҗтимагый телевидениенең киләчәккә бурычларын билгеләп, төбәк телекомпанияләре белән элемтәләрне ныгыту һәм хезмәттәшлек итүгә юнәлттеләр, дип белдерде. Бу илдә җирле үзидарә органнарының хокукларын һәм вәкаләтләрен киңәйтү шартларында бигрәк тә актуаль.

Утырышта шулай ук Россиянең Иҗтимагый телевидениесе советының Татарстаннан икенче әгъзасы - Россия ислам университеты ректоры Рафыйк Мөхәммәтшин катнашты.