Минтимер Шәймиев "Яңарыш" фонды Хәйриячеләр китабының V томын һәм рәхмәт хатларын тапшырды

Бүген Казан Кремлендә Татарстан Республикасы тарихи һәм мәдәни һәйкәлләрен яңадан торгызу Республика фонды Хәйриячеләр китабының V томын һәм рәхмәт хатларын тапшыру тантанасы булды.
Хәйриячеләр китабы “Яңарыш” фонды тарафыннан 2010 елда оештырылган иде. Алга таба “Яңарыш” фондында һәр елны гыйнвар аенда Хәйриячеләр китабының яңа томын тапшыру традициягә керде. Бүгенге көнгә Китапның биш томы чыкты, аларга 38 меңнән артык хәйрияченең исеме кергән.

Бүгенге чара башланганда "Татарстан Республикасының тарихи-мәдәни мирасы" видеролигы тәкъдим ителде, анда республиканың билгеле тарихи урыннары күрсәтелде: Казан,Болгар, Зөя һәм Алабуга.

Минтимер Шәймиев үзенең чыгышын бу фильмны шәрехләүдән башлады, бу роликны исемнәре бөтен дөньяга мәгълүм иң яхшы режиссерлар, операторлар эшләвен билгеләп үтте. "Без алар белән аны кат-кат карадык, фильм безнең кисәтүләрне исәпкә алып эшләнеп бетте. Бүген Татарстан аның аша дөньяга танылды. Сез күргәнчә, монда безнең катлаулы тарих чагыла. Фильмны дөньяның 67 илендә күрәчәкләр, алар белән килешүгә ирешелгән инде", - диде Минтимер Шәймиев.

ТР Дәүләт Киңәшчесе Болгар тарих-археология комплексын ЮНЕСКО бөтендөнья мирасы исемлегенә кертүне зур җиңү дип атады. Ул республиканың тарихи һәйкәлләрен яңадан торгызуга ярдәм иткән барлык хәйриячеләргә рәхмәт белдерде.

Аның сүзләренчә, алда әле Болгарда да, шулай ук Зөядә дә эшләнәсе эшләр күп. "Вакыт шуны таләп итә. Болгар һәм Зөягә килергә теләүче туристларның саны арта бара. Узган ел Болгарда 258 мең турист булып китте, Зөягә килүчеләр дә күп булды. Мәсьәләне аңлау бар, эш бара", - дип билгеләде Минтимер Шәймиев.
Ул “Яңарыш” фондының киләчәккә планнары, Болгар белән Зәядә яңа музейлар булдыру процессы турында сөйләде.
"Бүген Казанда да тарих һәйкәлләрен саклау һәм яңадан торгызу буенча күп эшләр башкарыла. Бу процесска Татарстан Президенты Рөстәм Миңнеханов җитәкчелек итә, ә зур шәһәрдә моны эшләү катлаулырак", - диде ТР Дәүләт Киңәшчесе.
"Үткәнне белү кирәк, эшләрне киләчәктә уңыш китерерлек итеп, бүген эшләргә кирәк. Барыгызга да уңышлар телим", - диде ул, тантанада катнашучыларга мөрәҗәгать итеп.

Аннары Хәйриячеләр китабын һәм Рәхмәт хатларын тапшыру тантанасы булды. “Яңарыш” фондының башкарма директоры Татьяна Ларионова, хәйриячеләрнең исемнәрен атап, аларның изге эшләре турында чын күңелдән сөйләде.

Минтимер Шәймиев Хәйричеләр китабының V томын һәм "Яңарыш" фондының Рәхмәт хатларын Болгар һәм Зәяне яңадан торгызу эшенә шәхси акчаларын керткән депутатларга, шулай ук муниципаль берәмлек һәм коммерция оешмалары вәкилләренә тапшырды, аларның исемнәре китапның "алтын" битләренә кертелгән. 2014 елда Нурлат районы халкы иң актив булган, Әлки, Алексеев, Чистай, Спасс, Яшел Үзән, Әлмәт районнары һәм Казан халкы да үз өлешләрен керткән.
Шулай ук исемнәре Хәйриячеләр китабының берничә томына кертелгән физик затлар, предприятие һәм бюджет оешмалары җитәкчеләре, шәхси эшмәкәрләр дә билгеләп үтелде.

Хәйриячеләр китабы ТРның Әлки районында "Забота" приютында тәрбияләнүчеләргә һәм республика тарихи мирасын яңадан торгызу проектына үз акчаларын керткән гаиләләргә дә тапшырылды. Болар – Әлки районыннан Дәүләтшиннар, Яшел Үзәннән Хәсәновлар, Югары Осланнан укытучылар династиясе Шәрәфиевләр гаиләләре.

Хәйриячеләр китабын Минтимер Шәймиев кулыннан шулай ук ММЧ җитәкчеләре, Болгар тарих-археология комплексын ЮНЕСКО бөтендөнья мирасы исемлегенә кертү турында сертификат тапшыру тантанасын оештыруда һәм уздыруда катнашкан мәдәният һәм сәнгать вәкилләре, “Татарстан балалары борынгы Болгарның изге җирендә” исемле республика музыкаль марафонын оештыручылар алды.

Тантана ТР Дәүләт җыр һәм бию ансамбленең хор төркеме чыгышы белән тәмамланды, алар шулай ук Хәйрияччеләр китабының V томына “Яңарыш” фонды чараларында актив катнашканнары өчен кертелгән.