Минтимер Шәймиев: “Иң мөһиме шул, без ядкәрләрне яңадан торгызу белән шөгыльләнәбез һәм безнең күзләребез ачыла”

Бүген “Казан Кремле” музей-саклаулыгының “Манеж” күргәзмәләр залында “Борынгы Болгар шәһәре һәм Зөя утрау-шәһәрлеге: үткәне һәм бүгенгесе” дип исемләнгән күргәзмә ачылды.

Аның ачылышында ТР Дәүләт киңәшчесе, “Яңарыш” Республика фонды попечительләр советы рәисе Минтимер Шәймиев, ТР Премьер-министр урынбасары Васыйл Шәйхразиев, ТР Дәүләт Советы урынбасары, “Яңарыш” Республика фонды башкарма директоры Татьяна Ларионова, ТР мәдәният министры Айрат Сибагатуллин, “Казан Кремле” музей-саклаулыгы директоры Зилә Вәлиева катнашты.

“Яңарыш” фондының 5 еллыгы уңаеннан оештырылган әлеге күргәзмәдә төп урынны уникаль археологик табылдыклар, Борынгы Болгар һәм Зөя утрау-шәһәрлекләренең үткәнен һәм бүгенгесен сурәтләгән сәнгать әсәрләре алып тора.

“Бу күргәзмә төрле яклап үзенчәлекле. Чөнки биредә Болгар һәм Зөя музейларында гына булган уникаль экспонатларны күрергә мөмкин. Шул ук вакытта күргәзмәдә “Яңарыш” фондының соңгы 5 елдагы эшчәнлеге нәтиҗәләре дә чагылыш таба. Шуның белән беррәттән, бу – республиканың мәдәни мирасының бүгенгесенә һәм киләчәгенә экскурс та”, – дип сөйләде “Казан Кремле” музей-саклаулыгы директоры Зилә Вәлиева.

“Яңарыш” фондының 5 еллык эшчәнлегеннән соң, без үзебезне Болгар һәм Зөя комплекслары яңарышына багышланган күргәзмә оештырырга лаеклы дип саныйбыз. Шул рәвешле, без хәтерне торгызабыз", - диде Минтимер Шәймиев үзенең чыгышында.

Ул Казан Кремле һәм Болгар тарихи-архологик комплексының ЮНЕСКО Бөтендөнья мирас исемлегенә кертелүен билгеләп узды һәм һәр тарихи объектның мондый дәрәҗәгә лаек була алмавын ассызыклады. "Бу – Татарстанлыларның уртак җиңүе. Тарихны берәү дә сайлап алу мөмкинлегенә ия түгел. Әмма һәр буын үзеннән алда булган тарих белән яшәргә мәҗбүр. Хәзерге вакытта бөтен дөньяда тарихны билгеләү, тарихи кыйммәтләрне барлау процессы бара. Бу бер көндә генә башкарыла торган эш түгел. Әмма без бу юнәлештәге эшчәнлекне дәвам итәбез”, - дип билгеләп узды Минтимер Шәймиев.

ТР Дәүләт Киңәшчесе күргәзмә ачылышына килүчеләрнең һәммәсенә рәхмәт белдерде. “ Иң мөһиме шул, без ядкәрләрне яңадан торгызу белән шөгыльләнәбез һәм безнең күзләребез ачыла. Шул рәвешле рух туа, иманга киләбез, шуның аша без көчлерәк була барабыз”,- диде ул.

“Болгар һәм Зөя шәһәрлекләре комлексларын торгызу турында сүз йөрткәндә, моның тарихчылар, археологлар, фән эшлеклеләре, студентларның эшчәнлеге нәтиҗәсе генә түгеллеген истә тотарга кирәк, бу фикерне барлык Татарстан халкы хуплап чыкты. Кереме, дине, милләтенә карамастан, кешеләр берләшеп, бу эштә ярдәм итте. Без бүген моның белән горурлана алабыз. Һәр буын үз тарихын, киләчәктә иле, зур һәм кече ватаны, гаиләсе белән горурлана алсын өчен, белеп, теркәп барырга тиеш. Татарстанда бүген мондый мөмкинлекләр тудырылган. Тарих безнең киләчәгебезне билгели”, - дип фикерләре белән уртаклашты ТР премьер-министр урынбасары Васыйл Шәйхразиев һәм әлеге күргәзмә белән танышырга теләүчеләрнең күп булачагына ышанычын белдерде.

ТР ФАнең А.Х.Халиков исемендәге Археология институты директоры Айрат Ситдиков үзенең чыгышында бу вакыт аралыгында җәмгыять үзе дә, мәдәни һәм тарихи мираска мөнәсәбәтләрнең дә үзгәрүен белдерде. “Бу, мөгаен, проектны тормышка ашыруның иң мөһим нәтиҗәләренең берседер”,- дип ассызыклады ул.

“Бүгенге күргәзмә бик әһәмиятле санала, монда күп тырышлык куелган фәнни тикшеренүләр һәм археологик эшләр барышында табылган хәзинә тәкъдим ителгән. Бу ТР Фәннәр академиясе һәм Казан федераль университеты галимнәренең, фәнни үзәкләрнең әйдәп баручы белгечләренең зур хезмәте”, - дип белдерде Айрат Ситдиков.

Аннан соң кунаклар өчен күргәзмә буйлап экскурсия уздырылды.