Назраньда Минтимер Шәймиев урамы ачылды

Бүген, Ингушетиядә Татарстан Республикасы мәдәнияте көннәре кысаларында, Минтимер Шәймиев исемендә урамның ачылышы Назрань халкы өчен зур шәһәр бәйрәменә һәм күңелле вакыйгага әйләнде.

Татарстан Республикасының Беренче Президенты Минтимер Шәймиев исеме Ингушетиянең иң зур шәһәрләренең берсе – Назраньның үзәк урамына бирелде. Урам шәһәрнең җанлы өлешенә туры килә, аның яныннан Назрань – Мәскәү тимер юлы, шулай ук Ингушетияне Төньяк Осетия белән тоташтырган автомобиль юлы уза.

Минтимер Шәймиев исемендәге урамның тантаналы ачылышында Ингушетия Хөкүмәте рәисе урынбасары Мәдинә Гойгова, Назрань мэры Алихан Тумгоев, Татарстан Дәүләт Советының мәгариф, мәдәният, фән һәм милли мәсьәләләр буенча комитеты рәисе Разил Вәлиев, Ингушетия Халык җыенының фән, мәгариф, мәдәният һәм спорт буенча комитеты рәисе Василий Светличный, ИР мәдәният министры Марет Газдиев, ТР мәдәният министры урынбасары Гүзәл Нигъмәтуллина, Назрань шәһәр хакимияте башлыгы Мөхәммәд Парчиев һәм башка дәрәҗәле кунаклар катнашты.

“Минтимер Шәймиевнең сынмас ихтыяры һәм бетмәс-төкәнмәс көче ярдәмендә бүген Татарстан Россия Федерациясенең иң үсеш алган субъектларының берсе санала, монда инновацион, социаль-икътисади үсеш милләтара һәм конфессияара килешүгә ирешү белән бергә алып барыла”, -дип билгеләде Магомед Парчиев.

Тантанада бик күп шәһәр халкы катнашты, Назраньда яшәүче йөзләгән татар диаспорасы вәкилләре бәйрәмгә үзләренең гаиләләре белән килгән иде. Ингушетия татар милли диаспорасы рәисе Светлана Сәлимҗанова бу вакыйгага катнашы булган һәркемгә рәхмәт белдерде һәм Ингушетия белән Татарстанны күпьеллык, вакыт белән сыналган дуслык җепләре бәйли, дип ассызыклады.