Минтимер Шәймиев Эмирали хаҗи Аблаев белән очрашты

Бүген Казан Кремлендә Татарстан Республикасы Дәүләт Киңәшчесе, "Яңарыш" фондының Попечительләр советы рәисе Минтимер Шәймиев Кырым Республикасы мөселманнары Диния нәзарәте рәисе, мөфти Эмирали хаҗи Аблаев белән очрашты.

Кырым Республикасы мөселманнары Диния нәзарәте делегациясе Татарстанга 12 июнь көнне килде һәм VI Бөтенроссия татар дин әһелләре форумында катнашты. Кичә Кырым делегациясе форум кысаларында Болгар тарих-археологик комплексында булып, “Изге Болгар җыены”ның кунаклары булдылар.

Эмирали хаҗи Аблаев Казанда, форумда һәм “Изге Болгар җыены”нда алган тәэсирләре белән уртаклашты.Ул Болгарның бөтен мөселман өммәте өчен Идел буе Болгарының дәүләт дәрәҗәсендә ирекле рәвештә ислам динен кабул итү урыны буларак зур әһәмиятен билгеләде.

Минтимер Шәймиев "Яңарыш" фондының Болгар һәм Зөядәге эшчәнлеге хакында сөйләде. Бер үк вакытта тарихи ядкәрләрне яңадан торгызу белән бергә рухи күтәрелеш тә сизелә - фәнни-танып белү процессы гына түгел, җәмгыять рухи яктан үсеш кичерә, дип ассызыклады ул. "Матди байлыкларны яңадан торгызу, аның белән бергә рухи күтәрелеш булганда гына, ышаныч, традиция һәм эчке культура яңарган вакытта гына мөһим", - диде ул.

Әңгәмә барышында Минтимер Шәймиев һәм Эмирали хаҗи Аблаев дөньяда ислам факторының роле һәм Россиядә ислам үсеше проблемалары хакында фикер алыштылар. Алар Татарстан һәм Кырым мөселманнары диния нәзарәтләре хезмәттәшлегенең кирәклеген аерым ассызыкладылар.