Минтимер Шәймиев Halcyon Gallery (Англия) сәнгать галереясе вәкилләре белән очрашты

Бүген Казан Кремлендә Татарстан Республикасы Дәүләт Киңәшчесе, “Яңарыш” фондының Попечительләр Советы рәисе Минтимер Шәймиев Halcyon Gallery (Англия) сәнгать галереясе вәкилләре белән очрашты. Галереянең президенты Пол Грин һәм башкарма директоры Уди Шелег Казанда туган Эрнст Мәһдиев озатуында Татарстан белән танышу һәм хезмәттәшлек юнәлешләрен билгеләү өчен Казанга килделәр.

Аларның программасында шәһәр буенча экскурсия каралган. Кунаклар “Казанның 1000 еллыгы”, “Кара Күл” (Черное озеро) паркларында, Казан Кремле, Кол Шәриф мәчете, Благовещенск соборы, “Хәзинә” милли сәнгать галереясендә булуны планлаштырган.

Очрашу башланганда Минтимер Шәймиев кунакларны кыскача Татарстанның мәдәни тормышы белән таныштырды. Ул дөньяга танылган Эрмитажның Россиядә беренче филиалын нәкъ менә Казанда ачуын хәбәр итте. Шулай ук “Яңарыш” фондының эшчәнлеге турында сөйләде.

Уди Шелег белдергәнчә, алар өчен Татарстанның беренче Президенты белән очрашу бик мөһим. “Без Сез җитәкчелек иткән вакытта республиканың зур казанышларга ирешүен һәм шулай ук мәдәният өлкәсендә дә уңышларын беләбез. Һәм хәзер дә мәдәният өлкәсе һәм мирасны саклау сезнең өчен бик әһәмиятле. Сәнгать халыкның күңелен, рухи ягын күрсәтә, шуңа да, без кая гына килсәк тә, иң элек кешеләр белән очрашабыз. Үзебезнең эшебезне традицияләр һәм гореф-гадәтләрне өйрәнгәннән соң гына башлыйбыз. Беренче вакытта без өйрәнәчәкбез - бу иң мөһиме. Шуннан соң гына үзебезнең тәкъдимнәребезне җиткерәчәкбез”, - диде ул.

Пол Грин очрашуда катнашучыларга Halcyon галереясен тәкъдим итте. “Безнең эшчәнлектә иң мөһиме - кешеләр белән аралашу, шуңа безнең галереянең бинасы һәр җирдә һәм һәрвакыт ачык”, - дип ассызыклады ул.
Аның сүзләренчә, Halcyon галереясе 1982 елда Лондонда нигезләнә. Бүген ул Европаның иң зур галереяләренең берсе санала. Лондонда аның өч бүлеге урнашкан, ә Мумбай, Шанхай һәм Кипр утравында вәкиллекләре бар.

Эрнст Мәһдиев билгеләгәнчә, аларның Татарстанга килүенең максаты – шәһәрне җанландыру һәм туристларны җәлеп итү өчен ачык декоратив сәнгать әсәрләрен урнаштыру мөмкинлекләрен карау.

Минтимер Шәймиев галереянең эшчәнлеген тулысынча хуплады.”Бу безнең өчен дә һәм бөтен дөнья өчен дә бик актуаль. Без сезнең тәкъдимнәрне тыңларга һәм хезмәттәшлек формалары турында фикер алышырга әзер”, - дип ышандырды ул.

Очрашуда ТР Дәүләт Советы рәисе урынбасары, “Яңарыш” фондының башкарма директоры Татьяна Ларионова, ТР Президенты ярдәмчесе Наталья Фишман, ТР мәдәният министры Айрат Сибгатуллин, ТР Министрлар Кабинеты Аппаратының ТР халыклары телләрен үстерү һәм мәдәният идарәсе башлыгы Гөлшат Нигъмәтуллина катнашты.