Минтимер Шәймиев Абхазия Президенты Рауль Хаджимба белән очрашты

Бүген Казан Кремлендә Татарстан Республикасы Дәүләт Киңәшчесе Минтимер Шәймиев Абхазия Президенты Рауль Хаджимба белән очрашты.
Абхазия Президенты җитәкчелегендәге делегация Казанга бүген килде, аның программасында: Казан федераль университетында,”Химград” технополисында, “Казан” агросәнәгать паркында, “ИТ- парк”та, “Алабуга” МИЗда, “КАМАЗ” ААҖдә һәм Зөя утрау-шәһәрлегендә булу, шулай ук Казандагы 2015 елгы Спортның су төрләре буенча XVI дөнья чемпионатында катнашу.

Очрашу алдыннан “Яңарыш” республика фондының Попечительлек советы рәисе Минтимер Шәймиев кунакка федераль дәрәҗәдәге “Мәдәни мирас: борынгы Болгар һәм Зөя утрау-шәһәрлеге” мәдәни-тарихи проектны тәкъдим итте, биш елда бу борынгы шәһәрләрдә башкарылган эшләр турында сөйләде, аерым алганда фонд ярдәмендә яңадан торгызылган һәм төзелгән объектларга игътибар бирде.

ТР Дәүләт Киңәшчесе Абхазия Президентына, Татарстанга нәкъ менә Спртның су төрләре буенча дөнья чемпионаты ачылган көннәрдә килү мөмкинлеген табуы өчен рәхмәт белдерде. “Безнең инде шундый зур спорт чаралары уздыру буенча тәҗрибәбез бар. Ышанам, сезгә кызыклы һәм матур булачак ачылыш тантанасы ошаячак”,-диде ул.

Минтимер Шәймиев кыскача Татарстанның социаль-икътисадый үсеше турында сөйләде. Ул шулай ук 1990-2004 елда Абхазия Президенты булган Владислав Ардзинба турындагы истәлекләре белән уртаклашты. Алар Татарстан белән Абхазиядә яңа дәүләтчелек урнашкан катлаулы елларда фикердәшләр һәм көрәштәшләр булганнар.

Очрашу барышында Татарстан һәм Абхазия арасындагы хезмәттәшлек юнәлешләре турында фикер алыштылар.
“Абхазиягә Сез һәм Владислав Григорьевич башкарган эшләрне дәвам итү бик мөһим. Без 1994 елда ике республика арасында дуслык һәм хезмәттәшлек турында төзелгән килешү һәм Татарстан Хөкүмәтенең безгә ярдәме итү турындагы карары турында хәтерлибез. Хәзер безнең максатыбыз Россия Федерациясе субъектлары белән яңа мөнәсәбәтләр төзү. Без Россия буенча актив йөрибез, аралашабыз, элемтәләрне җайга салабыз. Без Россиядән ярдәм алабыз һәм моның өчен рәхмәтлебез. Бүген биредә булуыбыз Сез нигезләгән процессларны дәвам итү белән бәйле һәм Татарстанның бүгенге җитәкчелеге дустанә һәм үзара аңлашу мөнәсәбәтләрен үстерәчәгенә шикләнмим”, -дип мөрәҗәгать итте Абхазия Президенты Минтимер Шәймиевкә.

Очрашуда ТР Премьер-министры урынбасары – ТР авыл хуҗалыгы һәм азык-төлек министры Марат Әхмәтов, РФ Дәүләт Думасы депутаты Фатыйх Сибагатуллин, Абхазия Республикасы Президенты администрациясе җитәкчесе Астамур Тания, Абхазия Республикасы Хөкүмәте вице-премьеры Дмитрий Сериков катнашты.