Болгардагы кунакханә комплексына иң матур исемгә конкурс игълан ителде

Татарстан Республикасы Дәүләт Киңәшчесе, “Яңарыш” республика фондының Попечительлек советы рәисе Минтимер Шәймиев Болгар тарих-археология комплексында булды, анда ул кунакханә комплексын төзү мәсьәләләре буенча күчмә киңәшмә уздырды.

Аны төзү эшләре быел апрель аенда ТР Президенты вазифаларын вакытлыча башкаручы Рөстәм Миңнеханов катнашында беренче нигез ташын салу тантанасыннан башланды. Татарстанның “Татнефть” һәм “ТАИФ” кебек зур нефть коипанияләре яңа проектның инвесторлары булды.

Бу мунча комплексы белән бердәнбер кунакханә - Болгарда XIV гасырдагы тарихи Ак пулатның тиңдәше булачак һәм югары дәрәҗәдә хезмәт күрсәтү мөмкинлеген бирәчәк. Кунаклар өчен ресторан, тренажер залы белән SPA зона, бассейн, тарихи мунча комплексының тиңдәше, конференц-зал, сөйләшүләр алып бару өчен зал, балалар бүлмәсе булачак. Шулай ук ял итү урыны, велосипед юлы, балалар мәйданчыгы, теннис кортлары, машиналар өчен җир асты парковкалары каралган.

Киңәшмәдә ТР Тарих һәм мәдәният ядкәрләрен яңадан торгызу республика фондының башкарма директоры, ТР Дәүләт Советы рәисе урынбасары Татьяна Ларионова, Спас районы башлыгы Камил Нугаев, Туризм буенча ТР Дәүләт комитеты рәисе урынбасары Лиана Сәетова, ТР ФАнең А.Х.Халиков исемендәге Археология институты директоры Айрат Ситдиков, Россия Архитекторлар берлеге әгъзасы Сергей Шакуров, Болгар музей-саклаулыгы директоры Фәргать Мөхәммәтов катнашты.

Минтимер Шәймиев катнашучыларга Болгардагы кунакханә комплексына иң матур исемгә конкурс игълан ителүе турында хәбәр итте. “Исем өч телдә дә - татарча, русча һәм инглизчә матур яңгырарга, үзенә бу җирнең тарихын һәм рухын алырга тиеш”, - диде ул һәм барысына да җитди уйланырга һәм конкурста катнашуны тәкъдим итте.

Конкурсны оештыручылар: Туризм буенча ТР Дәүләт комитеты, “Татмедиа” республика агентлыгы, ТРның Спас муниципаль районы, Korston Hotels & Malls кунакханәләр челтәре, “Яңарыш” фонды.

Конкурс 2015 елның 11 августыннан 1 ноябрьгә кадәр уздырыла һәм үз эченә берничә этапны ала: гаризалар кабул итү (11август-1 октябрь); эксперт комиссиясе тарафыннан эшләрнең сайлап алынуы (11 август-1октябрь); Интернет челтәрендә ачык тавыш бирүне уздыру (5 октябрь- 31октябрь). Җиңүче 2015 елның 1 ноябренә билгеле булачак.

Кунакханә исеменә таләпләр: һәрбер конкурста катнашырга теләүче өч телдә 3 вариант бирергә мөмкин. Конкурста катнашу өчен исемнең вариантлары белән pr.tourism@yandex.ru электрон почтага заявка җибәрергә кирәк. Хатның темасына “Болгарда яңа кунакханә” дип күрсәтергә, яисә (843)2229028 номерына хәбәр җибәрергә, яисә Болгар шәһәре рәсемен һәм кунакханәнең исемен Instagram мобиль кушымтасына болгаркунакханәсе # хэштегы белән күрсәтергә. Шулай ук кунакханә исемен болгаркунакханәсе # хэштегы белән ВКонтакте (https://vk.com/visittatarstan) һәм болгаркунакханәсе # хэштегы белән Facebook (https://www.facebook.com/tourism.tatarstan) социаль челтәрләрендә күрсәтергә мөмкин.