Минтимер Шәймиев "Бөек Болгар" Бөтенроссия тарих фестивалендә булды

Бүген Болгар тарихи-археологик комплексында "Бөек Болгар" Бөтенроссия тарих фестивале ачылыш тантанасы узды, Россиянең 30 төбәгеннән, Белоруссия, Украина һәм Израильдән йөзләгән тарихи реконструкцияләрне яратучылар җыелды. Россия туроператорлары фестивальгә Ярославль, Рыбинск, Тутаево, Кострома, Иваново, Курск, Түбән Новгород, Самара, Тольятти һәм илнең башка шәһәрләреннән махсус турлар оештырган. Фестивальнең максаты - Урта гасырлар эпохасының алга киткән вакыты, шул исәптән Алтын Урда чорында Болгар шәһәре территориясендә XIV- XV гасырлардагы көнкүреш, мәдәният һәм хәрби коралларны реконструкцияләү.

Фестивальне оештыручылар - Туризм буенча ТР Дәүләт комитеты һәм “Сулица” тарихи фехтования һәм реконструкцияләү үзәге”.

Беренче "Бөек Болгар" тарихи фестивале 2014 елда уздырылган иде.

Ачылыш тантанасында ТР Дәүләт Киңәшчесе, "Яңарыш" республика фондының Попечительләр советы Рәисе Минтимер Шәймиев, "Яңарыш" республика фондының башкарма директоры, ТР Дәүләт Советы рәисе урынбасары Татьяна Ларионова, Туризм буенча ТР Дәүләт комитеты рәисе Сергей Иванов, Спас районы башлыгы Камил Нугаев, ТР Дәүләт Советы депутаты, «Алексеевскдорстрой» ААҖ генераль директоры Фоат Валиев, ТР Дәүләт Советы депутаты Анастасия Исаева, ТР Министрлар Кабинеты Аппаратының ТР халыклары мәдәнияте һәм телләрен үстерү идарәсе башлыгы Гөлшат Нигъмәтуллина, Болгар музей-саклаулыгы директоры Фәргать Мөхәммәтов катнашты.

Борынгы Идел буе Болгар дәүләте җиренә килгән кунакларны Минтимер Шәймиев сәламләде. "Узган ел фестивальгә нигез салынды, хәзер ул көч җыя, кызыклы була бара һәм сезнең өчен бөтен шартлар тудырылуга бернинди дә шик юк. Бу соңгы елларда без алып барган аеруча зур эшләрнең дәвамы булып тора. Без республикабызның ике тарихи шәһәре - федераль дәрәҗәдәге ядкәрләр - Болгар һәм Зөяне яңадан торгызабыз. Белгенегезчә, Болгар ЮНЕСКО Бөтендөнья мирас исемлегенә кертелде. Тарихи объектлар яңадан торгызылган вакытта тарихчы, археолог, реставратор һәм башка галим һәм белгечләрнең роле бик зур. Ләкин борынгы чор вакыйгаларын реконструкцияләү белән шөгыльләнеп, сез башкарган эшләр, алар хезмәтеннән аерыла һәм безнең мирасны саклап калу һәм буыннан-буынга тапшыру эшендә аның үз урыны бар", - дип белдерде ул.
ТР Дәүләт Киңәшчесе бүгенге вакыйгага катнашы булган һәркемгә рәхмәт белдерде һәм сабырлык, түземлек теләде.

Туризм буенча ТР Дәүләт комитеты рәисе Сергей Иванов үз чыгышында Минтимер Шәймиевкә фестивальне бик теләп хуплавы өчен рәхмәт белдерде. Ул шулай ук оештыручылар командасына, бигрәк тә волонтерларга рәхмәт әйтте.

Аннан соң кунаклар саклаулыкның тарихи өлешендә урнашкан фестивальнең төп мәйданчыгында башланган массакүләм сугышларны карадылар.
Татарстаннан бу ярышларда тарихи клубларның берләшкән командасы катнаша. Аның составында -19-30 яшьлек 24 кеше. Команда Алтын Урда чоры киемнәре һәм коралларында. Россия җыелмасы командасы “Россия-1”, “Россия-3” командалары - тарихи урта гасырлар сугышы буенча хәзерге дөнья чемпионнарыннан тора.

Минтимер Шәймиев һәм аны озата йөрүче рәсми затлар фестивальнең барлык мәйданчыкларын карап чыктылар: тарихи ярминкә - халык-сәнгать һөнәрчелек ярминкәсен, хәрби машиналар мәйданчыгын, “Идел буе Болгар дәүләте” интерактив тарихи лагерьны- шунда сугышчы-болгарларның сугышын күзәттеләр.

Алга таба алар Татарстанда быел җәй барлыкка килгән “Түбәтәй” татар милли фастфуды челтәре киоскысы янында тукталдылар. Проектның авторлары Солтан Сафин, Айнур Камалиев, Азат Нәҗметдинов үзләренең эшчәнлекләре турында сөйләделәр. Аларның сүзләренчә, “Түбәтәй” – ул хәләл фастфуд челтәре, замана яшьләренчә милли ашларны торгызуга ярдәм итәчәк.
Фестиваль кунаклары өчпочмак, гөбәдия белән хуш исле чәй эчтеләр һәм барысыннан да канәгать калдылар.