Минтимер Шәймиев II Халыкара реставраторлар съезды делегатлары белән очрашты

Бүген Казан Кремлендә Татарстан Республикасы Дәүләт Киңәшчесе "Яңарыш" фондының Попечительлек советы рәисе Минтимер Шәймиев, кичә ачылган II Халыкара реставраторлар съезды делегатлары белән очрашты.

Очрашу алдыннан ТР Дәүләт Советы рәисе урынбасары, "Яңарыш" республика фонды башкарма директоры Татьяна Ларионова кунакларга "Мәдәни мирас: борынгы Болгар шәһәре һәм Зөя утрау-шәһәрлеге" мәдәни-тарихи проектын тәкъдим итте, "Яңарыш" фонды ярдәме белән яңадан торгызылган һәм реставрацияләнгән объектлар турында сөйләде.

Минтимер Шәймиев экспертлар, галимнәр, ЮНЕСКО вәкилләре һәм ЮНЕСКОның консультатив органнары вәкилләренә Татарстан объектларын Бөтендөнья мирасы исемлегенә кертү буенча эшли башлауның беренче көненнән үк аңлашу табылганы өчен рәхмәт белдерде.
"Әлбәттә, без эшебезне дәвам итәбез, яңа элемтәләр эзлибез, шушы өлкәдәге белемгә мохтаҗлык сизәбез. Без ИКОМОС (Халыкара һәйкәлләрне һәм истәлекле урыннарны саклау советы), ИККРОМ (Халыкара мәдәни һәйкәлләрне өйрәнү, саклау һәм реставрацияләү үзәге) экспертларына ярдәмнәре, безнең белән уртаклашкан белемнәре өчен рәхмәтлебез, безнең өчен ул белемнәр ачыш булды. Без нәрсәнедер дөрес эшләмибез икән, дөресләп җибәрегез, без сезне тыңлап, алга таба цивилизацияле юл белән барырбыз. Хәзер Татарстанда башкарыла торган эшләр - бөтен Россия җәмгыятенә мөһим сигнал. Иң әһәмиятлесе, бүген һәр авыл, һәр торак пункт үз тарихын, үз тамырларын эзли. Менә нинди хәрәкәт башланды", - дип билгеләде ул.

Минтимер Шәймиев кунакларга кыскача республикада "Яңарыш" фондының тарихи мирасны саклау буенча башкарган эшләре турында сөйләде.

РФ мәдәният министры урынбасары Григорий Пирумов очрашуда катнашучыларга РФ Мәдәният министрлыгының халыкара оешмалар белән эш юнәлешләре, Халыкара реставраторлар съездын уздыру идеясенең барлыкка килү тарихы турында сөйләде. Беренче съезд 2012 елда Мәскәүдә узган иде. "Казан II съездны уздыру урыны буларак очраклы сайланмады, Татарстан – мәдәни мирасларны саклау, ядкәрләрне яңадан торгызу өчен кертелә торган инвестицияләр буенча РФсубъектлары арасында лидерларның берсе", - дип ассызыклады ул.

ИКОМОС президенты Густаво Араоз ИКОМОС экспертларының эш алымнары һәм принциплары турында сөйләде. ИКОМОС РФ Мәдәният министрлыгына, ИКОМОСның Россиядәге бүлегенә һәм барлык республикаларга эксперт ярдәме күрсәтергә тулысынча әзер, дип ассызыклады ул.

ИККРОМ бүлекчәсе җитәкчесе Джозеф Кинг соңгы вакытта кешелекнең кыйммәтле тарихи ядкәрләре төрле хәрби конфликтлар аркасында зыян күрүләре турында белдерде."Хәзер вәхшилекка каршы көчләрне активлаштырырга, мәдәният тавышын, мәгариф тавышын, ЮНЕСКО тавышын күтәрергә вакыт һәм террорчылык белән вандализмга юл куймаска кирәк. Цивилизацияләр арасында дуслык мөмкин булуын бергәләп исбатларга кирәк ", - дип билгеләде ул.

Джозеф Кинг ИККРОМ генераль директоры Стефано ди Каро исеменнән Минтимер Шәймиевкә Россияне ИККРОМ әгъзасы буларак яңадан теркәүдә ярдәм итүе өчен рәхмәт белдерде, бу хакта карарны Россия Хөкүмәте 2015 елның мартында кабул итте.

Очрашуда шулай ук ТР мәдәният министры Айрат Сибагатуллин, ТР Министрлар Кабинетының ТР халыклары мәдәниятен һәм телләрен үстерү идарәсе башлыгы Гөлшат Нигъмәтуллина, КДМСУның фәнни эшләр буенча проректоры, ЮНЕСКОның Идел буе бүлеге кафедрасы җитәкчесе Рафаэль Вәлиев катнашты.