ЯҢАЛЫКЛАР

Казанда Татарстан дәүләт физкультура, спорт һәм туристлык академиясе инфраструктурасын карап тоту чыгымнарына ел саен федераль бюджеттан 1 млрд. сум акча бүлеп биреләчәк. Бу хакта бүген Казанда узган матбугат конференциясендә ТР яшьләр эшләре, спорт һәм туристлык министры вазыйфаларын башкаручы Марат Бариев белдерде.

16 апрельдә ТР Президенты Рөстәм Миңнеханов рәислегендә ТР Инвестиция-венчур фондының Попечительләр советы утырышы узды.

16 апрельдә Татарстан парламенты җитәкчесе Фәрит Мөхәммәтшин Ульяновскида Идел буе федераль округы РФ субъектлары дәүләт хакимиятенең Закон чыгару органнары җитәкчеләре ассациациясенең XXIII утырышында катнаша.

Утырышта Россия Президентының Идел буе федераль округындагы Тулы вәкаләтле вәкиле Григорий Рапота, РФ Президенты каршындагы Бала хокуклары буенча вәкил Павел Астахов, РФ Федераль Җыены Дәүләт Думасы депутатлары катнаша.

Татарстан Дәүләт Советы Рәисе Фәрит Мөхәммәтшин кичә республика парламенты Президиумының күчмә утырышы кысаларында "КамАЗ" ААҖнең кайбер заводларында булды.

Парламентчылар автомобиль заводында төп җыю конвейерын һәм кабиналар җыю цехын, "КамАЗ-Дизель"дә Cummins двигательләр җыю конвейерын һәм детальләрне локализацияләү цехын карады. Депутатлар Кама пресс-рам заводында эшләтеп җибәрүгә әзерләнелүче кабиналарны буяу линиясе белән танышты. Нәкъ менә биредә, предприя¬тиедә беренче тапкыр буларак, җитәкчелек инициативасы белән "Сакчыл производство" программасына старт бирелгән. Аның төп мәгънәсе эшчеләрнең рационализаторлык тәкъдимнәрен финанс белән кызыктырудан һәм аларны гамәлгә кертүдән гыйбарәт. Шушы эш нәтиҗәсендә пычрак агач әрҗәләргә алмашка төрле детальләр өчен уңайлы контейнер һәм рамнар кулланыла башлаган.

Казан Бөек Җиңү бәйрәменә әзерләнә. Төп тантананың ничек узачагы әлегә сер итеп сакланса да, башкалага бәйрәм кәефе иңде инде. Берничә көн элек студентлар һәм укучылар берьюлы ике паркта Мәңгелек ут янында кизү тора башлады. Җиңү һәм Горький исемендәге парклардагы хәтер утын сакларга яшьләр үзләре теләк белдергән. Гадәттә, Мәңгелек ут янындагы пост май аенда гына булдырылса, быел аның эшен Космонавтика көнендә үк башларга карар кылганнар. 30 апрельгә кадәр анда югары һәм һөнәри уку йортлары студентлары, яшьләр иҗтимагый оешмалары лидерлары кизү торачак. 1 майда исә аларны укучылар алыштырачак. Мәктәп балалары Мәңгелек утны 10 майга кадәр саклаячак.

18-20 апрельдә Казанда "Күптөсмерле Россия" II Бөтенроссия халыклары милли уен кораллары ансамбльләре һәм оркестрлары фестиваль-бәйгесе узачак. Анда Идел буе һәм Урал федераль округлары республикалары һәм өлкәләрендәге халык уен кораллары оркестрлары һәм ансамбльләре катнаша.

Фестивальне "Россия мәдәнияте" федераль программасы кысаларында Россия дәүләт халык иҗаты йорты, Татарстан Мәдәният министрлыгы, Республика халык иҗаты һәм мәдәни-агарту эшчәнлеге үзәге оештыралар.

15 апрель көнне Татарстан Президенты Рөстәм Миңнеханов Казан Кремлендә Венгрия Республикасының Россия Федерациясендәге Гадәттән тыш һәм Тулы вәкаләтле илчесе Дьерд Гилиан әфәнде белән очрашты.

16-17 апрель көннәрендә Казан дәүләт медицина университетында 84-нче Бөтенроссия студентлар фәнни конференциясе узачак. Аны Казан дәүләт медицина университеты, университетның студентлар фәнни җәмгыяте оештыра. Чараны ачу тантанасында университет ректоры профессор Алексей Созинов, фән һәм инновацияләр буенча ректор урынбасары Андрей Киясов, укыту-методик эш буенча ректор урынбасары Фәрит Биккинеев катнашыр дип көтелә.

Татарстан Президенты Рөстәм Миңнеханов "Түбән Кама Нефтехим" ААҖнең 2009 елдагы эш нәтиҗәләрен югары бәяләде. Бүген компания акционерларының еллык җыелышында ул әнә шулай дип белдерде.

"Мин ТАТАРЧА сөйләшәм!". 24-26 апрель көннәрендә Казанда әнә шундый акция узачак. ТР Мәгариф һәм фән министрлыгы, Казан шәһәре Башкарма комитеты, Бөтендөнья татар конгрессы Башкарма комитеты, "YZЕБЕZ" яңа буын хәрәкәте һәм Бөтендөнья татар яшьләре форумы оештыра торган бу чара быел бишенче тапкыр үткәрелә.